पोषण सुधारके लाग पोषण बगैचा
पहुरा समाचारदाता
धनगढी, १६ बैशाख । कैलाली जिल्लास्थित कैलारी गाउँपालिकाके द्ुई ठो वडामे पोषण सुधारके लाग पोषण बगैचा सुरुवाट कैगिल बा ।
केयर नेपाल, आइडिइ नेपाल, म्याप इन्टरनेशनलके आर्थिक सहयोग ओ याक नेपालसे पोषण परियोजना अन्र्तगत स्वास्थ्य आमा समुहके सदस्यहुक्रे पोषण सुधारके लाग पोषण बगैचा सुरुवाट करले बटै ।
कैलारी–७ छुटकी बसन्ताके चमेली स्वास्थ्य आमा समुहके सदस्य समेट रहल खेमा चौधरी पोषण बगैचा सुरुवाट करलपाछे आपन बच्चाके पोषण अवस्थामे सुधार आइल बटैली । उहाँ कहली, ‘पोषण बगैचामे टमान मेरिक टिना टवान ओ हरियार सागपात, खरबुजा, गाजार, चुकन्डर लगैले बटु । ओकरसंगे समय समय बच्चा चेकजाँचमे ध्यान डेले बटु । मोर बच्चाके अवस्था अब्बे मजा बा ।
कैलारी–७ छुटकी बसन्तामे मुन्नीकुमारी चौधरीफे पोषण बगैचा सुरुवाट करलपाछे समय समय बच्चा स्वास्थ्य जाँच करैठी ओ पोषणयूक्त खाना अपने खैना बच्चनहे खवाई लागलपाछे स्वास्थ्य हुइल सुनैठी ।
ओस्टेक कैलारी गाउँपालिका वडा नम्बर ४ के गाउँक गौरव स्वास्थ्य आमा समुहके अगुवा कृषक आषिशमणी चौधरी पोषण बगैचा सावन महिनासे सुरु करल बटैठी । उहाँ कहली ‘पोषण बगैचामे खिरा, खरबुजा, लौका, बोरी, कबली, करैला, भिण्डी समधिनी साग, प्याज, भाजी, मुरै लगैले बटु । यम्ने आपन खैना बनल बा । ढेर हुइल विक्रीसमेट कैना सोच्ले बटु ।
याक नेपालके लैङिक समानता सामाजिक समावेशीकरण अधिकृत सरिता चौधरी पोषण परियोजना कैलारी गाउँपालिका वडा नम्बर ४ ओ ७ के २५ ठो आमा समुह पोषण सुधारके लाग पोषण बगैचा सुरुवाट करल बटैली ।
हजार दिनके लरकोरया डाई ओ बच्चाके पोषण सुधारके लाग पोषणके गतिविधि करजैटी बा, उहाँ कहली, ‘सीमान्तकृत समुदायके लाग विउ पुँजीके रुपमे १० हजार रुप्या सहितके किसान कार्ड उपलब्ध करागैल बा । जिहीहे उ समुहमे रहल लरकोरया डाई सागपात, हरियार टिना टावन उत्पादनके लाग विया किन्ना, पोषण बगैचा निर्माण कैना ओ टिना उत्पादन अन्र्तगत कृषि कार्यमे प्रयोग हुइना समान किन्ठै ।
याक नेपालसे आमा समु्हमे आवद्ध रहल ५ सय जनहनहे किसान कार्ड उपलब्ध करैले बा, जौन कार्डमे टिनाके विया, हजारी, पानी डरना पाइप, जाली, उत्पादन पोषण बगैचाके लाग सपोट करल उहाँ बटैली ।
पोषण बगैचामे दुई तिन मेरिक साग, वेमौसमी टिना उत्पादन कैगिल बा । कलेसे महिलाहुकनके बच्चनके लाग झोल लिटो पकैना तरिकाफे सिखागैल बा । पोषण परियोजना लागु हुइलपाछे पोषणयूक्त खानाके साथे स्वास्थ्य संस्थामे समय समयमे चेकजाँच करैटी रहलपाछे कुपोषणके जटिल खाले केस सामान्य अवस्थामे ल्यन्ना मद्दत मिलल उहाँ बटैली ।
पहिलेक तुल्ना महिलाहुक्रे आपन बच्चनके कुपोषणसे बचाइक लाग सचेत हुइनाके साथे चासो लेहल बटैली । याक नेपालसे उहाँहुकनहे तालिम, सामाजिक विश्लेषणके आधारमे चेतना प्रदान कैगिल उहाँ बटैली ।
ओस्टेक महिलाहुकनके क्षमता अभिबृद्धि, पोषण सुधारके लाग हजार दिनके डाईहुकनके आपन घर भिटर हुइना निर्णयमे पहुँच पुगे कना उद्देश्य सचेतीकरण करल, घरेक स्रोत साधानमे पहँुच पुगे कहिके छलफल चलैटी आइल उहाँ बटैली ।
याक नेपाल स्वास्थ्य संस्था संचालनमे प्रभावकारी बनैना ओरफे काम करटी रहल बा, उहाँ कहली ‘समुदायसे लेके सरकारके संरचनागत सुधारमे सपोट हुइना मेरिक काम करटी । ओम्ने स्वास्थ्य संस्थाहे इकुपमेन्ट सपोट, स्वास्थ्यकर्मीनके क्षमता अभिवृद्धिके काम, समुदायस्तरमे सचेतनामूलक काम परियोजना अन्र्तगत कैगिल बा ।
कैलारी गाउँपालिका स्वास्थ्य शाखा प्रमुख नरेशकुमार चौधरी कैलारीमे पहिलेक तुल्नामे पोषणके अवस्था सुधार हुइटी गैल बटैलै । उहाँ कहलै, ‘गैल माघ महिनामे वृहत पोषण लेखाजोखा कार्यक्रम संचालन कैगिल रहे । यी अभियानमे ६ महिनासे पाँच बर्षसमके पोषण लेखा जोखा कैगिल रहे । ओम्ने साम खालके कुपोषण ११ जाने, माध्यम खाले ९९ जाने रहल भेटल रहे ।’
केयर नेपाल, आइडिइ नेपाल, म्याप इन्टरनेशनलके आर्थिक सहयोग ओ याक नेपालसे पोषण परियोजना अन्र्तगत सामुदायिक सिकाई केन्द्रके स्थापना करके जलवायु अनुकुलन कृषि प्रविधि मार्फत टिना खेतीमे सहयोग करल याक नेपालके पोषण परियोजना कृषि तथा बजारीकरण अधिकृत जनक खनाल बटैलै ।
