राजतन्त्र नैलौटीः प्रचण्ड
पहुरा समाचारदाता
धनगढी, १६ वैशाख । नेकपा (माओवादी केन्द्र)के अध्यक्ष पुष्पकमल दाहाल ‘प्रचण्ड’ सामन्ती राजतन्त्र नैलौट्ना बटैले बटै ।
तराई मधेश जागरण हुलाकी मार्ग अभियानके लाग कैलाली पुगल अध्यक्ष प्रचण्ड मंगरके टीकापुर नगरपालिका–९ झुङ्गामे आयोजित सभाहे सम्बोधन कैटी ओइसीन बटाइल हुइट ।
उहाँ वंशके आधारमे राजा हुइना व्यवस्था हटाके सार्वभौमसत्ता सम्पन्न जनता हुइना संविधान जनताके छावाछाइ लिखसेकल बटैलै ।
‘बुद्धि रहल नैरहलेसे फेन, जत्रा ठग डाँका रलेसे फेन वंशके आधारमे राजा हुइना व्यवस्था हटाके सार्वभौमसत्ता सम्पन्न जनता हुइना संविधान जनताके छाइछावा लिखसेक्लै,’ उहाँ कहलै, ‘बेला मौकामे संविधान कुचलके राजा महाराजा कहाँ सत्ता लेहे सेकजाइठ् कि तानाशाही ओर जाइ सेकजाइठ् कहिके कोसिस कैटी बटै आब इतिहास नैलौटी ।’
अध्यक्ष प्रचण्ड सामन्तीहुक्रनके विरुद्ध क्रान्तिकारीहुक्रे चैत १५ गते काठमाडौँमे विशाल प्रदर्शन करलपाछे राजावादीहुक्रे हत्या, हिंसा, आगजनी कैके बितण्डा मचाइल ओ असफल होके पतनके डगरामे गैल फेन बटैलै ।
कम सिटके पार्टीसे सरकार नैचलैना कहिके बरवार दल मिलाके माओवादी सरकारसे बाहर हुइलेसे फेन फाइदा हुइल ओ भ्रष्टाचारके विरोध सुशासनके पक्षमे, विभेदके विरुद्धमे सामाजिक न्यायके पक्षमे काम कैना सङ्कल्प लेके अभियानमे आइल बटैटी अध्यक्ष प्रचण्ड आब सरकार चलाइ पुग्ना मेरके भोटके आग्रह करल रहिट ।
उहाँ सहिद परिवार, बेपत्ताके परिवार, घाइते अपाङग, जेलनेल भोगल ओ आम नागरिक सहित एक करोड मनै पुगल फेन बटैलै । ओस्टके, अध्यक्ष प्रचण्ड आपन पार्टी जगसे देशके अर्थतन्त्र मजा बनाइ लागल बटैलै ।
‘माओवादीसे जिटल १२३ पालिकामे काम हुइटी रहल बावै । वैधानिक संस्थासे करल मूल्याङ्कनसे मजा काम कैना पहिल, डोसर ओ टिसर हुइल पालिका ओ महानगरपालिकामे बर्सेनि पहिल हुइना महानगरपालिकामे फेन नेकपा माओवादी केन्द्रसे जिटल बावै । माओवादीके सरकार डुरेसे डेखजैना हुइ परल ।’
इहे बिच अध्यक्ष प्रचण्ड अनाथ तथा सहिद परिवारके बालबालिकाहुक्रनके अभिभावकत्व ग्रहण करले बटै । भजनी नगरपालिका–५ स्थित कर्मेश्वर माविमे आयोजित शैक्षिक कार्यक्रमके क्रममे अध्यक्ष प्रचण्ड अल्पसंख्यक राजी समुदायके कक्षा ३ मे अध्ययनरत निन्दु राजी ओ सहिद परिवारके कक्षा १० मे अध्ययनरत अनिशा थरूनीके अभिभावकत्व ग्रहण कैना घोषणा करल हो । उहाँ यी बालबालिकाके शिक्षा ओ भविष्य निर्माणसमके सक्कु जिम्मेवारी पार्टी ओ अपने बहन कैना प्रतिबद्धता व्यक्त करले बटै ।
ओस्टके अध्यक्ष प्रचण्ड कैलारी गाउँपालिका वडा नम्बर ५ बैजपुरमे आयोजित सभाहे सम्बोधन कैटी हुलाकी राजमार्ग नेपालके दक्षिण क्षेत्रमा बैठ्ना मजदुर किसान आदिवासी जनजाति थारु लगायतहुक्रनके जीवन रेखा रहल बटैले बटै ।
उहाँ हुलाकी रार्जमार्ग निर्माण सम्पन्न हुइलेसे यी क्षेत्रके जनताके जीवनमे आर्थिक रुपसे फेन अन्य सक्कु हिसाबसे फेन ढेर राहत प्राप्त हुइना विश्वास व्यक्त करले बटै ।
‘हुलाकी राजमार्ग ढेर बरससे निर्माण कार्य रुकके लठ्ठालिङ्ग बन्ना हो कि कना रहे, मै डोसरचो प्रधानमन्त्री हुइल बेला भारत भ्रमणके अवसरमे भारतीय प्रधानमन्त्री नरेन्द्र मोदीसे सिधा सिधा अपनेहुक्रे हुलाकी सडक बनैबी कि नैबनैलेसे नेपाल अपनही बनाइ कहल रहुँ’, अध्यक्ष प्रचण्ड कहलै, ‘ओइसीक कहलपाछे भारतीय प्रधानमन्त्री मोदी अपने जाके निर्माणके कार्य आघे बह्राइ कहलपाछे मधेस प्रदेशके सिरहा जिल्लामे हुलाकी सडक पुर्ननिर्माणके शिलान्यास करलपाछे हुलाकी मार्गके पुनःनिर्माणके काम आघे बह्रल हो ।’
अध्यक्ष प्रचण्ड हुलाकी सडक निर्माणसे आपनहे खुशी लागल बटैटी अब्बे अभियानके लाग हुलाकी मार्ग हुइटी कैलाली पुगल बटैलै । मने आभिन फेन हुलाकी सडकके काम अधुरा रहल बटैटी निर्माण कार्य सम्पन्न हुइलेसे यी क्षेत्रमे बैठुइया थारु लगायत यी क्षेत्रमे बैठुइया सक्कु आदिवासी मधेसी, मुस्लिम समुदाय ढेर सेवा सुविधा हुइना बटाइल रहिट ।
अभियानमे नेकपा माओवादी केन्द्रके नेता नारायणकाजी श्रेष्ठ, नन्दबहादुर पुन, पम्फा भुषाल, अग्निप्रसाद सापकोटा, देवप्रसाद गुरुङ, गिरिराजमणि पोखरेल, खगराज भट्ट लगायत सहभागी रहल बटै ।
