सर्वोच्चके आदेशपाछे रेशम चौधरी पक्राउ
पहुरा समाचारदाता
काठमाडौं, १७ वैशाख । नागरिक उन्मुक्ति पार्टी (नाउपा) के संरक्षक रेशम चौधरी पक्राउ परल बटै । बुधके रोज नाउपा ओ जनमत पार्टीके एकता सभा कैना तयारी करटी रहल बेला चौधरीहे कमलादीसे पक्राउ करल काठमाडौं प्रहरीके प्रहरी वरिष्ठ उपरीक्षक (एसएसपी) विश्वराज अधिकारी बटैलै ।
टीकापुर घटनापाछे पाँच बरस सजाय भोगल चौधरीहे गणतन्त्र दिवसके दिन गत जेठ १५ गते आममाफी डेहल रहे । ओकरपाछे उहाँ रिहा हुइल रहिट ।
प्रहरी प्रमुख अधिकारीके अनुसार उ रिटमे सुनुवाई हुइटी सर्वोच्चसे तत्कालके लाग थुनामे रख्ना कहिके आदेश करलपाछे उहाँहे पक्राउ कैके डिल्लीबजार लैगिल उहाँ जानकारी डेलै ।
काठमाडौं प्रहरी परिसरके प्रवक्ता अपिलराज बोहराके अनुसार उहाँहे फैसला कार्यान्वयनके लाग पक्राउ करल हो । ‘हम्रे सर्वोच्च अदालतके आदेश कार्यान्वयन करल हुइटी,’ बोहरा कहलै, ‘उहाँहे नियन्त्रणमे लकेके डिल्लीबजार कारागार लैगिल हुइटी ।’
थरुहट ओ अखण्ड सुदूरपश्चिमके आन्दोलनके क्रममे २०७२ भदौ ७ गते कैलालीके टीकापुरमे हिंसात्मक घटना हुइल रहे । उ घटनामे परके तत्कालीन सेती अञ्चल प्रहरी प्रमुख एसएसपी लक्ष्मण न्यौपानेसहित ८ प्रहरी ओ एक बालकके मृत्यु हुइल रहे । उहे घटनाके अरोपमे चौधरीहे अदालतसे जन्मकैदके सजायँ सुनाइल रहे । मने राष्ट्रपतिसे कैद मिनाहा पाके उहाँ २०८० जेठ १५ गते जेलमुक्त हुइल रहिट ।
मने आममाफीविरुद्ध सर्वोच्चमे रिट परल रहे । राष्ट्रपति कार्यालय, मन्त्रिपरिषद, गृह मन्त्रालय ओ रेशम चौधरीहे विपक्षी बनाके दायर करल रिटमे सर्वोच्चसे आममाफीके फैसला उल्टा डेहलपाछे रेशम पक्राउ परल हुइट ।
चौधरीहे आममाफी डेना निर्णयविरुद्ध शारदा कडायत सर्वोच्चमे रिट दर्ता कराइल रही । कडायत टीकापुरमे हुइल हिंसात्मक घटनामे परके मरल इन्स्पेक्टर केशव बोहराके गोसिनीया हुइटी ।
चौधरी संरक्षक रहल नाउपा ओ जनमत पार्टीबिच बैशाख १७ गते पार्टी एकता घोषणा कैना तयारी करल रहे । चौधरीके पक्राउसँगे एकता घोषणा कैना कार्यक्रम बिथोलल् बावै ।
यहोर संरक्षक चौधरीके रिहाइके माग कैटी ओहकान समर्थकहुक्रे नाराबाजी करले बटै । उहाँ पक्राउ परलपाछे कार्यकर्ताहुक्रे प्रज्ञा प्रतिष्ठान परिसरमे नाराबाजी करल हुइट । ‘नश्लवादी सरकार मुर्दावाद’के नारा लगैटी उहाँहुक्रे सरकारविरुद्ध नाराबाजी करल हुइट ।
चौधरीहे पक्राउ करल प्रति जनमत पार्टीके अध्यक्ष सिके राउत भत्र्सना करले बटै । उहाँ सामाजिक सञ्जालमे पोष्ट कैटी पत्र्सना करल हुइट । ‘पार्टी एकीकरण प्रज्ञा प्रतिष्ठानमे घोषणा हुक्ष् लागल बेला रेशमलाल चौधरीहे नेपाल प्रहरी कार्यक्रमस्थलमे नै पक्राउ कैके पुराने फैसला कार्यान्वयन करक लाग डिल्लीबजार जेल पठाइल खबर प्राप्त हुइल बावै । यकर हम्रे घोर भत्र्सना करटी’, राउत सामाजिक सञ्जालमे लिख्ले बटै ।
ओस्टके जनमत पार्टीसे देशमे पहिचानवादी शक्ति एक हुइ नैडेहक लाग संरक्षक चौधरीहे पक्राउ करल आरोप लगाइल बावै । पार्टीके प्रवक्ता शरदसिंह यादव प्रज्ञा ओइसीन बटाइल हुइट । ‘यी देशमे पहिचानवादी शक्तिहुक्रे एक ठाउँमे एक हुइ नैडेना कहिके रेशम चौधरीहे पक्राउ करल डेखजाइठ्,’ उहाँ कहलै ।
