रेशम चौधरी थुनामुक्त
पहुरा समाचारदाता
काठमाडौँ, १७ वैशाख। नागरिक उन्मुक्ति पार्टी (नाउपा) के संरक्षक रेशम चौधरी थुनामुक्त हुइल बटै । उहाँहे सर्वोच्च अदालतके फैसला कार्यान्वयन कैना कहटी बुधके रोज प्रज्ञा प्रतिष्ठान कमलादीसे प्रहरी पक्राउ करल रहे । उहाँहे पक्राउ कैके लैजैटी किल डिल्लीबजार कारागारमे बुझाइल रहे ।
चौधरीहे सर्वोच्च अदालतके प्रशासनसे नै इजलाससे आइल फैसला शैलीमे पत्र लिखके प्रहरीहे डेहलपाछे चौधरी पक्राउ परल रहटि । सर्वोच्च अदालतके मुद्दा तथा रिट महाशाखाके शाखा अधिकृत महिमानसिंह विष्ट राष्ट्रपित रामचन्द्र पौडेलसे उहीसे आघे हुइल आम माफीके निर्णय नै उल्टैटी पक्राउ कैना पत्र काटल रहिट ।
विष्टके पत्र ’अनधिकृत’ रहल पाइलपाछे प्रहरी विष्टहे पक्राउ करले बावै । विष्ट पक्राउ परलसँगे चौधरी डिल्लीबजार कारागारसे छुटल हुइट । सर्वोच्च अदालतसे चौधरीहे थुनामुक्त करक लाग प्रहरीहे पत्र पठाइल सर्वोच्चके सूचना अधिकारी निराजन पाण्डे जानकारी डेलै ।
थरुहट ओ अखण्ड सुदूरपश्चिमके आन्दोलनके क्रममे २०७२ भदौ ७ गते कैलालीके टीकापुरमे हिंसात्मक घटना हुइल रहे । उ घटनामे परके तत्कालीन सेती अञ्चल प्रहरी प्रमुख एसएसपी लक्ष्मण न्यौपानेसहित ८ प्रहरी ओ एक बालकके मृत्यु हुइल रहे । उहे घटनाके अरोपमे चौधरीहे अदालतसे जन्मकैदके सजायँ सुनाइल रहे । मने राष्ट्रपतिसे कैद मिनाहा पाके उहाँ २०८० जेठ १५ गते जेलमुक्त हुइल रहिट ।
मने आममाफीविरुद्ध सर्वोच्चमे रिट परल रहे । राष्ट्रपति कार्यालय, मन्त्रिपरिषद, गृह मन्त्रालय ओ रेशम चौधरीहे विपक्षी बनाके दायर करल रिटमे सर्वोच्चसे आममाफीके फैसला उल्टा डेहलपाछे रेशम पक्राउ परल हुइट ।
चौधरीहे आममाफी डेना निर्णयविरुद्ध शारदा कडायत सर्वोच्चमे रिट दर्ता कराइल रही । कडायत टीकापुरमे हुइल हिंसात्मक घटनामे परके मरल इन्स्पेक्टर केशव बोहराके गोसिनीया हुइटी ।
चौधरी संरक्षक रहल नाउपा ओ जनमत पार्टीबिच वैशाख १७ गते पार्टी एकता घोषणा कैना तयारी करल रहे । चौधरीके पक्राउसँगे एकता घोषणा कैना कार्यक्रम बिथोलल् बावै ।
यहोर संरक्षक चौधरीके रिहाइके माग कैटी ओहकान समर्थकहुक्रे नाराबाजी फेन करल रहे । उहाँ पक्राउ परलपाछे कार्यकर्ताहुक्रे प्रज्ञा प्रतिष्ठान परिसरमे नाराबाजी करल रहिट । ‘नश्लवादी सरकार मुर्दावाद’के नारा लगैटी उहाँहुक्रे सरकारविरुद्ध नाराबाजी करल रहिट ।
चौधरीहे पक्राउ करल प्रति जनमत पार्टीके अध्यक्ष सिके राउत भत्र्सना फेन करले रहिट । उहाँ सामाजिक सञ्जालमे पोष्ट कैटी पत्र्सना करल हुइट । ‘पार्टी एकीकरण प्रज्ञा प्रतिष्ठानमे घोषणा हुइ लागल बेला रेशमलाल चौधरीहे नेपाल प्रहरी कार्यक्रमस्थलमे नै पक्राउ कैके पुराने फैसला कार्यान्वयन करक लाग डिल्लीबजार जेल पठाइल खबर प्राप्त हुइल बावै । यकर हम्रे घोर भत्र्सना करटी’, राउत सामाजिक सञ्जालमे लिख्टी भत्र्सना करले रहिट ।
ओस्टके जनमत पार्टीसे देशमे पहिचानवादी शक्ति एक हुइ नैडेहक लाग संरक्षक चौधरीहे पक्राउ करल आरोप लगैले रहे । पार्टीके प्रवक्ता शरदसिंह यादव प्रज्ञा ओइसीन बटाइल हुइट । ‘यी देशमे पहिचानवादी शक्तिहुक्रे एक ठाउँमे एक हुइ नैडेना कहिके रेशम चौधरीहे पक्राउ करल डेखजाइठ्,’ उहाँ कहलै ।
