टनकपुर–ब्रह्मदेब व्यारेजमे सहज आवागमनके विषयमे बाटचिट
पहुरा समाचारदाता
धनगढी, १९ बैशाख । भारत भ्रमणमे रहल सुदुरपश्चिम प्रदेशके मानानीय मुख्यमन्त्री कमलबहादुर शाह बिफे दिल्लीमे अलग अलग भेटघाट तथा अवलोकन भ्रमण करले बटै ।
मुख्यमन्त्री शाह नयाँ दिल्ली स्थित प्रधानमन्त्री संग्राहलय, नेसनल स्किल डेभलपमेन्ट कर्पोरेसन कम्पनी, जलविद्युत विकास संगठन एनएचपीसी लिमिटेड ओ कृषि अनुसन्धान केन्द्रके अवलोकन भ्रमण करल हुइट । मुख्यमन्त्री शाह भारतके विदेश राज्यमन्त्री किर्ती बर्धन सिंहके दिवा भोजमे सरिक हुइलै ।
नेसनल स्किल डेभलपमेन्ट कर्पोरेसन कम्पनीसंगके छलफलमे प्रविधिमैत्री सीप विकास क्षमताके वारेमे छलफल हुइल रहे । सूचना प्रविधिके यूगमे डिजिटलमैत्री प्रविधिके विकास करके जनताहे आत्मनिर्भर बनाईबेर राष्ट्रहे टेवा पुग्न विश्वास लेहल बा । कृषि अनुसन्धान केन्द्रसँगके भेटमे नेपालमे आधुनिक कृषि क्षेत्रके विकासके सन्र्दभमे बाटचिट हुइल रहे । बाटचिटके क्रममे मुख्यमन्त्री शाहसे नेपालमे आधुनिक कृषि क्षेत्रके विकासके लाग भारत सरकारसंग आग्रह करल रहिट । ओस्टेक करके एनएचपीसीके प्रतिनिधिमण्डलसंगके भेटमे उर्जा क्षेत्रके विषयमे छलफल हुइल रहे ।
छलफलमे पश्चिम सेती जलविद्युत आयोजनाके डिपिआरके काम अन्तिम चरणमा पुगल ओ आर्थिक अभावसे आघे बह्रे नैसेकल अवस्था भारत सरकारसे प्राविधिक लगायतके सहयोगसे अन्तिम रुपमे डेना मुख्यमन्त्री शाह आग्रह करलै । साथे पञ्चेश्वर जलविद्युत आयोजना, वेतन कर्णाली, फुकोट कर्णाली ओ मुगु कर्णालीके सम्भावना अध्ययन प्रतिवेदनके विषयमे दुनु पक्षबीच छलफल हुइल रहे । उहे अवसरमे मुख्यमन्त्री शाह भारतके विदेश राज्यमन्त्री किर्ती बर्धन सिंहबीच टनकपुर–ब्रह्मदेब व्यारेजमे सहज आवागमनके विषयमे समेत बाटचिट हुइल रहे ।
