सामुदायिक भवन, मन्दिर उदघाटन ओ कोटा सप्तरङ्गी पार्कके वार्षिकोत्सव
पहुरा समाचारदाता
पहलमानपुर, १९ बैशाख । कैलाली जिल्लाके घोडाघोडी नगरपालिका–१२ कोटामे रहल सामुदायिक भवन, मन्दिर उदघाटन ओ कोटा सप्तरङ्गी पार्कके वार्षिकोत्सव कार्यक्रम हुइल बा ।
घोराही सामुदायिक वन कार्यक्रमके आयोजनामे हुइल कार्यक्रम उ सामुदायिक वनके अध्यक्ष आकाश परियारके घरगोस्यामे हुइल रहे ।
कार्यक्रम उदघाटन घोडाघोडी नगरपालिकाके नगर प्रमुख खडक बहादुर रावत करल रहिट । कार्यक्रममे सम्बोधन करटी इमानदारीपूर्वक काम करलेसे कौनोफेन काम ढिला सुस्ती हुइसेक्ना बटैलै ।
विशिष्ट पहुना वसन्ता परिषदके अध्यक्ष पुस्कलबहादुर वम जनइच्छा ओ जनशक्ति जग्लेसे किल वनवा बचाई सेक्ना बटैलै ।
घोडाघोडी नगरपालिका–१२ के अध्यक्ष रामदुलारे चौधरी मानव जातिनके लाग पहिल स्थान बास ओकर पाछे वनुवा, यी हुइलेसे व्यवस्था मिलाइ सेक्ना बटैलै ।
स्वागत मन्तव्य समुहके उपाध्यक्ष अनिल चौधरी ओ संचालन समुहके सचिव बन्द्ना चौधरी करल रही ।
