एक महिने पावर टिलर मर्मत तालिम सम्पन्न

पहुरा समाचारदाता
हसुलिया, १९ बैशाख । कैलारी गाउँपालिका वडा नम्बर १ हसुलियामे संचालन हुइल एक महिने पावर टिलर मर्मत तालिम शुकके सम्पन्न हुइल बा ।

सिप सिकौ, आत्मनिर्भर बनौ कना मुल नाराके साथ अध्यक्ष स्वरोजगार कार्यक्रम अन्र्तगत कैलारी गाउँपालिकाके सहयोग तथा कैलाली एकिकृत उत्थान कार्य सञ्जाल नेपाल (किरण नेपाल)के आयोजनामे चैत १२ गतेसे तालिम सुरुवाट हुइल रहे ।

तालिम समापन कार्यक्रम गाउँपालिका उपाध्यक्ष भगवतीकुमारी चौधरीके प्रमुख आतिथ्यतामे हुइल रहे । कार्यक्रममे सम्बोधन करटी पावर टिलर मर्मत तालिमसे किसानहुकन ढेर फाइदा पुग्ना बटैली । उहाँ कहली, ‘अब्बे घर घर पावर टिलर रहल मने विगरेबेर प्राविधिक नैमिल्ना ओरसे प्राविधिक जनशक्ति उत्पादन करटी वेरोजगार यूवाहे रोजगारी सृजना करेक लाग पावर टिलर मर्मत तालिम आवश्यताके आधार संचालक कैगिल यी बहुट मजा हो ।

कैलारी गाउँपालिकासे यहाँक यूवा यूवतीहुकनके स्थानीय स्तरमे रोजगारी सृजनाके लाग टमान तालिम संचालन कैसेकल बा । उहाँहुक्रे उ सीपके सदुपयोग करलेसे अपने गाउँठाउँ वा स्वदेशमे जीवन निर्वाह करे सेक्ही । महिलाहुकनके उत्पादन करल हस्ताकला बस्तु बजारीकरण कैना पालिकासे कैनाफे उहाँ बटैली ।

किरण नेपालके अध्यक्ष अमृतचन्द्र चौधरीके अध्यक्षतामे हुइल तालिम समापन कार्यक्रममे उहाँ किरण नेपालसे यूवा अपने गाउँठाउँमे स्वरोजगार बनाइक लाग टमान तालिमके आयोजना करसेकल बटैलै । तालिम समापन कार्यक्रममे विशिष्ट अतिथि थारु संघ केन्द्रीय कार्य सम्पादन समिति सदस्य रामचरण चौधरी, नेपाली कांग्रेस कैलारी गाउँपालिका सभापति कृष्णप्रसाद चौधरी, कैलारी गाउँपालिका वडा नम्बर ३ के वडा अध्यक्ष सन्तराम चौधरी, प्रशिक्षक अशोक चौधरी लगायत मन्तव्य व्यक्त करल रहिट । कार्यक्रमके संचालन सचिव मुकेश बखरिया ओ स्वागत मन्तव्य किरण नेपालके उपाध्यक्ष मिराकुमारी चौधरी करल रहिट ।

तालिममे सक्कु वडासे दुई÷दुई जानेक सहभागिता रहल रहे । समापन कार्यक्रममे सहभागिहुकनके प्रमाणपत्र वितरण ओ टुल्स सामाग्री बितरण कैगिल रहे ।