धनगढी उप–महानगरपालिकासे खानेपानीके गुणस्तर परिक्षण सुरु
पहुरा समाचारदाता
धनगढी, २२ बैशाख । धनगढी उप–महानगरपालिकामे खानेपानीके गुणस्तर परिक्षण सुरु हुइल बा ।
बर्खायाम सुरु हुइलसंगे पानीजन्य रोग लग्ना खतरा बह्रना हुइल ओरसे ओकर पुर्व तयारी स्वरुप धनगढी उप–महानगरपालिकासे खानेपानीके गुणस्तर परिक्षण सुरु करल हो । उप–महानगरभिटर रहल खानेपानी निगम, संस्थान, डिपो तथा बोरिङके खानेपानीे गुणस्तर परिक्षण सुरु हुइल हो ।
धनगढी उप–महानगरपालिका वडा नम्बर ५ मे रहल शिवनगर खानेपानी तथा सरसफाई उपभोक्ता संस्थासे पानी परिक्षण सुरु करल हो । विगतके बर्षमे समेत धनगढीमेकुछ पानीजन्य रोग डेखा परल ओरसे ओकर पुर्व सुरक्षा अनुरुप धनगढीके सक्कु खानेपानी संस्थाके पानी गुणस्तर परिक्षण करे लागल उप–महानगरपालिकाके स्वास्थ्य शाखा प्रमुख योगेश अवस्थी जानकारी डेलै ।
नगरबासीहे खानेपानीसे सर्ना रोगसे बचाइक लाग पुर्व तयारी स्वरुप हरेक खानेपानी वितरणके केन्द्रके ट्याङ्कीसे नमूना निकारके परिक्षण सुरु करल उहाँ बटैलै ।
खानेपानी ट्याङ्की ओ उ संस्थासे वितरण हुइल अन्तिम बिन्दुसेफे पानीके नमूना लेके खानेपानीके गुणस्तर परिक्षण करटी रहल बटी अवस्थी कहलै, “हम्रे पानीके स्वच्छता कटराके बा ओ पानीसे फैल्ना रोग बिशेष करके छाडापखालाके किटाणु बटै की नैहुइट, पानी सामान्यतया धमिलोपन कटराके बा उ हेरटी, पानी अमलियपना तथा छारियपना का बा उ फे चेक करटी, हम्रे धनगढी उप–महानगरपालिका भिटर जटरफे खानेपानी वितरण केन्द्रके ट्याङ्की बटै ओकर पानी ओ उहीसे वितरण करल अन्तिम बिन्दुमे जाकेफे नमुना परिक्षण करटी रहल बटी ।”
उप–महानगरपालिकाभिटर वितरण हुइटी रहल सक्कु वितरण केन्द्रके ट्याङ्की ओ कुछ समुदायमे समेत जाके नमूना सकंलन करके परिक्षण कैना अवस्थी बटैलै । पानीके गुणस्तर परिक्षण कार्यक्रम कुछ दिन सञ्चालन रही । सक्कु क्षेत्रके नमुना सकंलन करसेकलपाछे खानेपानीके गुणस्तर पत्ता लग्ना जनाइल बा । यकर साथे खानेपानी नैपुगल क्षेत्रमे ह्याण्डपम्पके पानी समेत परिक्षण कैना बा ।
