पाचौं भजहर कपके सेमिफाईनल समिकरण पुरा
पहुरा समाचारदाता
धनगढी, २३ वैशाख । कैलालीके कैलारी गाउँपालिका वडा नम्बर–८, लोहरपुरमे हुइटिरहल निसर्ग हस्पिटल पाचौं भजहर कप फुटबल प्रतियोगिताके सेमिफाईनल समिकरण पुरा हुइल बा ।
थारु समुदायके पर्व भजहरके अवसरमे हरेक वर्ष हुइटि रहल निसर्ग हस्पिटल पाचौं भजहर कपके हालसम सम्पन्न हुइल खेलके निर्णयके अधारमे अन्तिम चारमे पुग्ना टीमके टुंगो लागल हो ।
समुह ए से भजनी नगरपालिका वडा नम्बर ५ स्तरीय क्लब ओ गौरीगंगा स्पोर्टस क्लब सेमिफाईनल पुगल बा । समुह बी से न्यू सुभित फेन्सी एण्ड श्रृंगार पसल उदासीपुर सेमिफाईनलमे पुगल बा । प्रतियोगितामे सहभागी १६ टीमहे समुह ए ओ बी मे आठ÷आठ टीम ढरल रहे ।
नकआउट आधारमे हुइटिरहल प्रतियोगिताके फाइनल प्रवेशके लाग भजनी नगरपालिका वडा नम्बर ५ स्तरीय क्लब ओ गौरीगंगा स्पोर्टस क्लब तथा न्यू सुभित फेन्सी एण्ड श्रृंगार पसल उदासीपुर प्रतिस्पर्धा करहि ।
प्रतियोगिताके विजेता नगद एक लाख तथा उपविजेता नगद ५० हजार सहित ट्रफी प्राप्त करि । प्रत्येक खेलके म्यान अफ द म्याच नगद एक हजार पाइ कलेसे टमान विधाके उत्कृष्ट खेलाडीहे फेन पुरस्कार वितरण करना आयोजक जनहित युवा क्लबके अध्यक्ष मणिराम चौधरी जानकारी डेलैं ।
थारु समुदायके पर्व भजहरहे नयाँ पुस्तामे संरक्षण करटि आगे बह्राइक लाग करटि रहल प्रतियोगितामे फुटबल प्रतियोगिताके साथे पौराणिक खेलके फेन आयोजना करल बा । ओकर साथे थारु कला संस्कृति फेन प्रस्तुत करटिरहल आयोजक जनैले बा ।
