निःशुल्क विशेषज्ञ वडास्वास्थ्य क्लिनिकसे एक लाख २४ हजार जाने सेवा लेलै

पहुरा समाचारदाता
धनगढी, २४ बैशाख । कैलालीके धनगढी उपमहानगरपालिकासे सञ्चालनमे ल्यानल निःशुल्क विशेषज्ञ वडास्वास्थ्य क्लिनिकसे हालसम एक लाख २४ हजार बिरामी निःशुल्क स्वास्थ्य जाँच करले बटै ।

उपमहानगरपालिकासे २०७९ साल साउनसे सुरु करल उ सेवासे ओइने स्वास्थ्य जाँच करल हुइट । आव २०७९÷८० सालमे ४५ हजारसे सेवा लेहल ओ गैल आर्थिक बर्ष २०८०÷८१ मे ५० हजार बिरामी सेवा लेहल विशेषज्ञ डाक्टरसहितके निःशुल्क वडा स्वास्थ्य क्लिनिकके फोकल पर्शन कृष्ण बोहरा जानकारी डेलै ।

चालु आर्थिक बर्षके चैत मसान्तसम २९ हजार ३२७ जाने सेवा लेहल उहाँ बटैलै । ‘चेकजाँच करे अइना बिरामीके आकर्षण बह्रल बा’ उहाँ कहलै ‘वडा स्वास्थ्य क्लिनिकसे नैसर्ना रोग, गर्भवती जाँच, महिलाके पाठेघरके चेक जाँच, डाइबिटिज, क्यान्सर स्क्रिनिङ, ब्लड प्रेसरके बिरामीके चेकजाँच ओ उपचार कैना करल बा ।’

उहाँ आज वडा नं ३ मे स्वास्थ्य चेकजाँच हुइटी रहल बटैलै । उहाँ कहलै ‘यी वडामे अधिकतम ३ सय जाने नियमित सेवा लेटी रहल बटै । आजफे उ रेसियोमे चेकजाँच हुई ।’

आज दुपहर १२ बजेसम १२७ जाने स्वास्थ्य सेवा लेहल उहाँ बटैलै । बिहान १० बजेसे २ बजेसम टिकट काटके चेकजाँच कैना करल उहाँक कहाई बा । हरेक महिना प्रत्येक वडामे एक दिन क्लिनिक सञ्चालन हुइना करल उहाँ बटैले ।
वडा नं ३ चटकपुरके तेजराज भाट अपने निःशुल्क स्वास्थ्य चेकजाँच कराई पाके बहुट खुशी हुइल बटैलै । उहाँ धनगढी उपमहानगरपालिकासे करल यी काम बहुट प्रशंसनीय रहल बटैलै ।

उहाँ कहलै, ‘यी ढेर मजा काम बा, यी सदा हुइटी रहे कना मै चाहठु ।’ वडा नं ३ के नरेशबहादुर चन्द स्वास्थ्य शिविर मजा ओ सह्रानीय हुइल बटैलै । उहाँ कहलै ‘बाहेर अस्पताल जाई पर्ना बिरामी यिहे चेकजाँच कैना अवसर पैलै । औषधीफे निःशुल्क पैटी रहल बटै । कुछ औषधी पाइल नैहो । ओकर व्यवस्थापन अनुरोध करटु ।’