विश्व रेडक्रस दिवस मनागिल
पहुरा समाचारदाता
धनगढी, २५ वैशाख । नेपाल रेडक्रस सोसाइटी कैलाली टमान कार्यक्रम कैटी विश्व रेडक्रस दिवस मनैले बावै ।
धनगढीस्थित नेपाल रेडक्रस सोसाइटी परिसरमे रहल हेनरी ड्युनाके सालिकमे माल्यार्पण कैके कार्यक्रमके सुरु करल रहे । कार्यक्रम रेडक्रस कैलालीके सभापति लोकराज जोशीके बर्का पहुनाइमे हुइल हो । कार्यक्रममे रेडक्रसके कर्मचारीहुक्रनके उपस्थिती रहल रहे ।
विश्व रेडक्रस दिवसके अवसर पारके धनगढीमे रहल दृष्टि फाउन्डेसनहे खाद्य तथा गैर खाद्य सामाग्री समेत हस्तान्तरण करल बावै । रेडक्रस कैलालीके सभापति लोकराज जोशी फाउन्डेसनहे २५ किलो दाल, १ पेटी तेल, १० प्याकेट नोनलगायत लुगा ढुइना ओ लहैना साबुन, सर्फ हस्तान्तरण करल रहे ।
ओस्टके, कम्बल १० पिस, बाल्टिन ओ जग समेत हस्तान्तरण करल नेपाल रेडक्रस सोसाइटी कैलालीके शाखा विकास अधिकृत नरेन्द्र भट्ट जानकारी डेलै ।
रेडक्रसके संस्थापक हेनरी ड्युनाके जन्म जयन्तीके साथे प्राकृतिक प्रकोप, युद्ध, चिकित्सा सङ्कट एवं अन्य विपत्तिके सामना कैटी समाजसेवामे करुणा, निःस्वार्थता ओ एकताबद्ध होके औरेक सहयोगमे आपन जीवन समर्पण कैना विश्वव्यापी रेडक्रस ओ रेडक्रिसेन्ट संस्थाके सिद्धान्त ओ कामके बारेम चेतना फैलुइयाहुक्रनहे सम्मान कैके दिवस मनैना प्रचलन रहल बावै ।
रेडक्रस ओ रेडक्रिसेन्ट आन्दोलनमे काम करुइया लाखौँ स्वयंसेवक ओ कर्मचारीहुक्रे मानवीय प्रयासके लाग सम्मान करक लाग हरेक बरस मे ८ मे विश्व रेडक्रस ओ रेडक्रिसेन्ट दिवस मनैना प्रचलन रहल बावै ।
नोबेल शान्ति पुरस्कारसे सम्मानित रेडक्रसके अन्तरराष्ट्रिय समितिके संस्थापक हेनरी ड्युनाके जन्मदिनके अवसर पारके हरेक बरस टमान कार्यक्रम कैके दिवसके रुपमे मनैना करल बावै ।
