वार्षिकोत्सवके अवसरमे रक्तदान कार्यक्रम
पहुरा समाचारदाता
धनगढी, २७ वैशाख । बातचित घर आपन डोसर वार्षिक उत्सव वृहत रक्तदान कार्यक्रम आयोजना कैटी मनैले बावै ।
शनिच्चरके रोज बातचित घरसे आपन ३१औं श्रृंखला सहित बृहत रक्तदान कार्यक्रम कैटी मनाइल हो ।
‘बचाई ज्यान, आई करी रक्तदान’ कना मूल नारा सहित करगैल रक्तदान कार्यक्रममे १५ जाने रक्तदान करल जनाइल बावै । बातचित घरके बरघर ठाकुर प्रसाद करिया प्रधान बार्षिकोत्सवके अवसरमे कुछ सामाजिक कार्य कैना उद्देश्य सहित रक्तदानके कार्यक्रम करल बटैलै । उहाँ यी क्षेत्रमे रगतके अभाव साथे थारु समुदायमे सिकलसेल एनिमियाके बिरामी रहल ओ ओइनहे फेन समय समयमे रगतके आवश्यकता पर्ना समस्याहे मध्यनजर कैटी रक्तदानके आयोजना करल बटैलै ।
उहीसे आघे बातचित घरके ३१औं श्रृंखलामे ‘बचाई ज्यान, आई करी रक्तदान’ नारा सहित रक्तदान महत्व तथा रक्तदान विषयमे सुदुरपश्चिम प्रदेश स्वास्थ्य दुत दिपक उपाध्याय ओ पत्रकार तथा सक्रिय रक्तदाता अविनाश चौधरीसे बातचित करगैल बावै ।
कार्यक्रमके बर्का पहुना रहल स्वास्थ्य दुत उपाध्याय अब्बेसम १०९औं पटक रक्तदान करसेकल बटै कलेसे पत्रकार चौधरी ३४औं पटक रक्तदान करसेकल बटै । ओहेबिच उहाँहुक्रनहे बातचित घरसे सम्मान फेन करले बावै ।
दुई बरस पहिले समाज ‘रुपान्तरणके लाग बातचित घर’ नारा सहित स्थापना हुइल बातचित घरसे मिडियामे ओझेल परल सामाजिक, आर्थिक, राजनीतिक लगायतके मुद्धा अथवा विषय बस्तुहे बातचित घर मार्फत बाहेर लन्नाके साथे सरोकारवालाके ध्यानाकार्षण करैटी आइल बावै ।
