लैङिगक समानताके लाग प्रतिवद्ध बटीः गाउँपालिका अध्यक्ष

पहुरा समाचारदाता
हसुलिया, २९ बैशाख । कैलारी गाउँपालिकाके अध्यक्ष राजसमझ चौधरी लैङिक समानताके लाग गाउँपालिका प्रतिवद्ध रहल बटैले बटै ।

ओरेक नेपालके आयोजना तथा युएन वुमन, साउमी फिनल्याण्डके सहयोगमे सोम्मारके रोज हसुलियामे हुइल जेसि कार्यान्वयनके चुनौती ओ लैङिक समानता प्रवद्र्धनके लाग प्रतिविम्बात्मक सवांद कार्यक्रममे उ बाट बत्वाइल हुइट । लैङिगक समानताके लाग पालिकासे महिला तथा मानव अधिकारके क्षेत्रमे कार्यरत गैरसरकारीसे समन्वय करके टमान मेरिक कार्यक्रम कैटी बा ।

अभिनफे लैङिगक समानताके लाग बहुट काम कैना बाँकी बा, गाउँपालिका अध्यक्ष कहलै, ‘स्थानीयस्तरमे लैङिक हिंसा निवारण कोषके लाग बजेट रहल मने नीति नैबनल ओरसे हाली बनाके कार्यान्वयन कैजाई ।

गाउँपालिका उपाध्यक्ष भगवतीकुमारी चौधरी लैङिगक समानताके लाग टमान वडामे महिलाहुकनके आर्थिक शसक्तीकरणके लाग बजेट विनियोजना करके कार्यक्रम हुइटी रहल बटैली । महिलाहुक्रे आर्थिक रुपमे सवल नैहुइटसम लैङिक हिंसामे पर्ना ओरसे सीपमुलक आयमुलक तालिम डेहल उहाँ बटैली ।

वडा नम्बर ५ के वडा अध्यक्ष विष्णुप्रसाद चौधरी पाछे पारल वर्ग समुदायहे सम्मान व्यवहार कैटी राज्यके डेना सेवा सुविधामे पहुँच पुगैना उद्देश्यसे आघे बह्रल बटैलै ।

कार्यक्रममे ओरेक नेपालके कार्यक्रम व्यवस्थापक सुलोचना खनाल लैससास नीति तथा रणनीति कार्यान्वयनमे रहल प्रमुख चुनौती ओ सम्बोधनमे सरोकारवाला निकायके भूमिकाबारे प्रस्तुतीकरण करल रहिट ।

नेपालके संविधानमे लैङिगक समानता सम्बन्धी टमान मेरिक अधिकार सुनिश्चित करल मने कार्यान्वयन नैकरल उहाँ बटैली । दिगो विकास लक्ष्यमे सन २०३० मे आपुगटसम सक्कु मेरिक लैङिगक विभेदके अन्त्य करेपर्ना कहल मने पोलिसी बनाके कार्यान्वयनके नैहुइल उहाँ जनैली ।

नेपालके संविधानके धारा १८ मे समानताके हक, धारा ३८ मे महिलाके अधिकार, धारा ४० मे दलितके अधिकार, धारा ५० मे राज्यके निर्देशक सिद्धान्त, लैंगिक समानता, समानुपातिक समावेशिकरण, स्थानीय सरकार संचालन ऐन २०७४ लैंगिक समानता तथा सामाजिक समावशीकरण (लैससास) गाउँपालिका तथा नरपालिकाके काम, कर्तव्य र अधिकारमे लेैेससास सम्वन्धी व्यवस्था उल्लेख करल बा ।

वडा समितिके काम, कर्तव्य अधिकार अन्तर्गत वडामे आर्थिक तथा सामाजिक रुपमे पपाछे पारल महिला, बालबालिका, दलित अपांगता रहल व्यक्ति, जेष्ठ नागरिक, अल्पसंख्यक, सीमान्तकृत सम्मुदायके अभिलेख राखके सामाजिक ओ आर्थिक उत्थान सम्बन्धी काम कैना व्यवस्था रहल बा ।
स्थानीय तहके लाग लैङिक समानता ओ सामाजिक समावेशिकरण परीक्षण दीगदर्शन २०७८, रास्ट्रिय लैंगिक समानता नीति २०७७ रहल बा ।

लैङिक हिंसाके अवस्था हेरेबेर सन २०२३÷२०२४ मे नेपाल प्रहरीके तथ्यांक अनुसार लैङिक हिंसा घटना १६ हजार ४१६ ठो दर्ता हुइल रहे । उ मन्से ७८.३ प्रतिशत अर्थात १२ हजार ८४६ घटना घरेलु हिंसाके रहे । सुदूरपश्चिममे केल्ह १ हजार ६१४ ठो घटना दर्ता हुइल रहे ।

उहे अवधिमे ओरेक नेपालसे अभिलेखीकरण करल लैङिक हिंसाके घटना १३ सय ९३ ठो रहल बा । जेम्ने घरेलु हिंसाके सबसे ढेर ९११ ठो रहल उहाँ जनैली ।

ओस्टेक दुसर एक संस्थाके करल अध्ययन अनुसार हिंसा भोग्न ६१ प्रतिशत नेपाली महिला सामाजिक कलङक, प्रतिशोधके डर ओ सहयोगके अभावके कारण आपन अनुभव लुकैना बाध्य रहल बटै ।

लैससास मुल प्रवाहीकरणके लाग आवश्यक तत्व राजनैतिक दृढता तथा नेतृत्व, नीतिगत ढाँचा, सरकारी संरचना, संयन्त्र ओ प्रक्रिया, साधान स्रोत, तथ्यांक तथा सूचना प्रणाली, विश्लेषण कैना ज्ञान तथा औजार आवश्यक रहल कार्यक्रम व्यवस्थापक खनाल जनैली ।

कार्यक्रममे लैङिक समानता तथा सामाजिक समावेशीकरणके लाग पालिकामे हुइल प्रयास नीति, निर्देशिका, कार्यविधिबारे छलफल कैगिल रहे । ओस्टेक जेसि नीति कार्यान्वयनमे डेखल वा भोगल प्रमुख अवरोध का का बा । यी अवरोधहे सम्बोधन कैना व्यक्ति, संस्था ओ समुदाय का करेसेकी कना विषयबस्तुमे समुहगत कार्य कैगिल रहे ।

कार्यक्रममे टमान वडा अध्यक्षहुक्रे, कार्यपालिका सदस्य, ओरेक नेपालके प्रदेश संयोजक सपना थापा, जिल्ला संयोजक गीता चौधरी, ओरेक नेपालके टिम, सरोकारवालानिकायके प्रतिनिधिहुकनके सहभागिता रहे । ओस्टेक करके अँटवारके रोज ओरेक नेपालसे गाउँपालिकाके प्रमुख प्रशासकीय अधिकृत खगेन्द्रराज जोशीलगायत विषयगत शाखाके प्रमुखहुकनसेफे जेसि कार्यान्वयनके चुनौती ओ लैङिक समानता प्रवद्र्धनके लाग प्रतिविम्बात्मक सवांद कार्यक्रम कैगिल रहे ।