कैलारी–१ मनाउँमे पाठेघरके मुखके क्यान्सर स्क्रिनिङ

पहुरा समाचारदाता
हसुलिया, ३१ बैशाख । कैलाली जिल्लाके कैलारी गाउँपालिका वडा नम्बर १ मनाउँमे आधारभुत स्वास्थ्य सेवा केन्द्रमे पाठेघरके मुखके क्यान्सर नमुना संकलन (स्क्रिनिङ) सुरु हुइल बा ।

कैलारी गाउँपालिका स्वास्थ्य शाखाके समन्वय तथा स्वास्थ्य कार्यालय कैलालीके आयोजनामे एचपीभी, डिएनए टेष्ट मार्फत पाठेघरके मुखके क्यान्सरके नमुना संकलन (स्क्रिनिङ) कार्यक्रम मंगरके रोजसे हुइटी रहल हो । पाठेघरके मुखके क्यान्सरके स्क्रिनिङ कार्यक्रमके उदघाटन कैलारी गाउँपालिकाके उपाध्यक्ष भगवतीकुमारी चौधरी करल रहिट ।

उदघाटन कार्यक्रममे सम्बोधन करटी उहाँ महिलाहुकनसे घरपरिवार, समाजमे दोहरो टेहरो भूमिका निभाई पर्ना ओ स्वास्थ्य समस्यासे गुर्जटी रहल बटैली । उहाँ कहली, ‘महिलाहुक्रे बच्चनहे जलम डेनासे लेके हुरकैना, घरके सक्कु काम करेपर्ना ओरसे पाठेघरके समस्या हु्इठ । समयमे चेकजाँच नैहुइलेसे क्यान्सरफे हुई सेकठ ।

ग्रामीण भेगके महिलाहुक्रे समय समय पाठेघरके चेकजाँच कराई परठ कना चेतना नैरना ओ आर्थिक अभावके कारण पाठेघरके समस्या भोग्टी आइल गाउँपालिका उपाध्यक्ष बटैली ।

कैलारी गाउँपालिका वडा नम्बर १ मनाउँमे आधारभुत स्वास्थ्य सेवा केन्द्रमे पहिल रोज मंगरके हुइल पाठेघरके मुखके क्यान्सर स्क्रिनिङमे १२२ जाने चेकजाँच कराइल केन्द्रके प्रमुख कुसुम चौधरी जनैलै ।

पाठेघरके मुखके क्यान्सर स्क्रिनिङ शिविर बुध (आज) फे जारी रहल उहाँ जनैलै । पाठेघरके मुखके क्यान्सर स्क्रिनिङ कार्यक्रममे स्वास्थ्य कार्यालय कैलाली, कैलारी गाउँपालिका स्वास्थ्य शाखाके प्रतिनिधि ओ मनाउँमे आधारभुत स्वास्थ्य सेवा केन्द्रमे कार्यरत रहल स्वास्थ्यकर्मीहुकनके सहभागिता रहल बा ।