स्थानीय तहके कर्मचारी संघर्षके कार्यक्रम जारी रख्ना
पहुरा समाचारदाता
धनगढी, ३१ बैशाख । स्थानीय सेवा ऐन नैआइटसम संघर्षके कार्यक्रम जारी रहना अन्दोलनरत स्थानीय तहके कर्मचारीहुक्रे बटैले बटै ।
स्थानीय तह कर्मचारी प्रदेश संघर्ष समितिसे बुधके रोज धनगढीमे पत्रकार सम्मेलन मार्फत आन्दोलनके कार्यक्रम जारी रहना बटाइल हुइट । संघर्ष समितिके संयोजक झलक दौल्याल स्थानीय तहके कर्मचारीहुक्रनके सेवा शर्त सम्बन्धी ऐन जारी नैहुइटसम साथे नियमावली ओ कार्यान्वयनके सुनिश्चितता नैहुइटसम संघर्षके कार्यक्रम यथावत रहना बटैलै ।
कर्मचारी आन्दोलित हुइलपाछे सुदूरपश्चिम प्रदेशस्थित स्थानीय तहके कामकाज प्रभावित हुइल बावै । कर्मचारीहुक्रे प्रदेश सभामे गत माघमे दर्ता हुइल विधेयक प्रदेश सभासे पारित करे पर्र्ना अडान रख्ले बटै । बैशाख २८ गतेसे आन्दोलनमे उत्रल उहाँहुक्रे विधेयक पारित नैहुइलेसे चरणबद्ध आन्दोलन कैना चेतावनी समेत डेले बटै ।
उहाँहुक्रे सकारे ९ बजेसे ११ बजेसम मुख्यमन्त्री कार्यालय आघे धर्ना डेटी आइल बटै । स्थानीय सेवा ऐन लानक लाग घरी घरी आग्रह कैलेसे फेन नैलानल ओरसे बाध्य होके आन्दोलन करे परल संयोजक दौल्याल बटैलै ।
सुदूरपश्चिमके ८८ स्थानीय तहके कर्मचारी आन्दोलनके लाग धनगढी आइल बटै । प्रदेश सरकारसे ऐन नैलानके लम्मा समयसम अक्के स्थानीय तहमे काम करे परल ओ टमान मेरके समस्या झेल्टी आइल कर्मचारीनके गुनासो रहल बावै ।
