मानसिक स्वास्थ्य स्वावलम्वन समूहसे मुख्यमन्त्रीहे ज्ञापनपत्र
पहुरा समाचारदाता
धनगढी, ५ जेठ । मानसिक स्वास्थ्य तथा मनोसामाजिक नीति, रणनीति ओ कार्ययोजना बनाके आवश्यक बजेटके सुनिश्चिताके लाग मुख्यमन्त्री कमलबहादुर शाहहे ज्ञापन पत्र बुझाइल बावै ।
मानसिक स्वास्थ्य स्वावलम्वन समूह जिल्ला सञ्जाल कैलालीसे सोम्मारके रोज मुख्यमन्त्री शाहहे ६ बुँदे ज्ञापनपत्र बुझाइल हो । जिल्ला सञ्जाल कैलालीके अध्यक्ष सालीभान खातीके नेतृत्वमे गैल टोलीसे मानसिक स्वास्थ्य तथा मनोसामाजिक नीति, रणनीति ओ कार्ययोजना बनाके आवश्यक बजेटके सुनिश्चिता सहित मानसिक स्वास्थ्य समस्या रोकथाम ओ न्यूनिकरण करक लाग प्रभावकारी कार्यक्रम बनाके कार्यान्वयन कैना माग करल बावै ।
ओस्टके प्रदेश मातहत रहल जिल्ला अस्पतालमे मानसिक रोग विशेषज्ञ डाक्टरके व्यवस्थापन कैके सबके लाग सरल, सहज ओ निःशुल्क औषधीके व्यवस्थापन, मानसिक स्वास्थ्य समस्या रहल व्यक्तिहे अपाङ्गता रहल व्यक्तिहुक्रनके अधिकार सम्बन्धि ऐन २०७४ मे व्यवस्था करल बमोजिम मनोसामाजिक अपाङ्गगता परिचयपत्र वितरण प्रक्रियाहे सहज रुपमे उपलब्ध करैना, मानसिक स्वास्त्थ्यसे ग्रसित होके औषधी उपचारसे चोखैटी रहल अतिविपन्न, विपन्न वर्गके व्यक्ति तथा ओइनके आश्रित परिवारके सदस्यहे पुनस्र्थापनाके लाग जीविकोपार्जनमे सहयोग हुइना खालके कार्यक्रम लागु कैना माग करल बावै ।
ओस्टके प्रदेशके सक्कु स्थानीय तहमे नेपाल सरकारससे तयार पारल सामुदायिक मानसिक स्वास्थ्य तथा मनोसामाजिक सहयोग प्याकेज २०७४ बमोजिम कार्यक्रम बनाके लागु कैना ओ सुदूरपश्चिम प्रदेशमे बन्ना प्रदेशसे जारी करल वा तयार करजैना टमान नीति तथा नियमावलीमे समेत मनोसामाजिक अपाङ्गताके विषयहे समेत समावेश कैके हरेक नीति, कानुनमे समावेशी नीति अवधारणाहे अवलम्वन कैटी कार्यन्वयन कैना माग करल बावै ।
ज्ञापनपत्र बुझ्टी मुख्यमन्त्री शाह मानसिक स्वास्थ्य स्वावलम्वन समूहसे राखल मागहे सम्बोधन कैना प्रतिवद्धता जनाइल सीएमसी नेपालके मनोसामाजिक परामर्शकर्ता सुशिला चौधरी बटैली ।
