दृष्टि फाउन्डेशके लाग ५ लाख सहयोग ओ उपचार सम्झौता
पहुरा समाचारदाता
धनगढी, ८ जेठ । सामाजिक उत्तरदायित्व अन्तर्गत निसर्ग हस्पिटल धनगढीसे दृष्टि फाउन्डेशन नेपालके अक्षय कोष स्थापनार्थ रु ५ लाख बराबरके चेक हस्तान्तरण करले बा ।
उ चेक दृष्टि फाउन्डेशन नेपालके कार्यालय, धनगढी उपमहानगरपालिका–१३ मे आयोजित विशेष समारोहके बीच फाउन्डेशनके अध्यक्ष कल्पना भट्टहे हस्तान्तरण करल हो ।
कार्यक्रममे निसर्ग हस्पिटलके अध्यक्ष तथा युवा समाजसेवी तिर्थराज पन्त, डा. हेमन्त ओझा, डा. दीपक ठकुराठी, डा. प्रभात सापकोटा, डा. दीपकपौडेल लगायत अस्पतालके कर्मचारी, नर्सिङ स्टाफ तथा अन्य पदाधिकारीहुकनके उपस्थिति रहल रहे ।
हस्पिटलके अध्यक्ष पन्तसे संस्थाके स्थापनाकालसे दृष्टि फाउन्डेशनमे आश्रय लेके बैठटी आइल असहाय तथा विपन्न नागरिकहुकनहे निःशुल्क तथा भारी छुटमे उपचार सेवा डेटी आइल बटैलै ।
कार्यक्रममे बोल्टी पन्त कहलै, “निसर्ग हस्पिटलसे सदैव असहाय, गरिब तथा समाजके पाछे परल वर्गहे प्राथमिकतामे रख्टी सेवा करटी आइल बा । हमार सक्कु शेयर सदस्य, चिकित्सक, कर्मचारी, नर्सिङ स्टाफसे व्यवस्थापन तहसमके सक्कु जाने स्वेच्छिक रुपमे यी सहयोगमे सहभागी हुके एक सकारात्मक उदाहरण प्रस्तुत करले बटै ।“
उ अवसरमे निसर्ग हस्पिटल ओ दृष्टि फाउन्डेशनबीच एक महत्वपूर्ण स्वास्थ्य सम्झौतासमेत सम्पन्न हुइल बा । जौन अनुसार दृष्टि फाउन्डेशनमे बसोबास कैना सेवाग्राहीसे निःशुल्क उपचार सुविधा ओ अन्य सेवामे ३० प्रतिशतसम छुट पैही ।
पन्तसे धनगढीमे रहल आमाको माया छात्रावास, मानव सेवा आश्रम लगायतके संस्थासंगफे हस्पिटलसे टमान समयमे सहयोग करटी आइल उल्लेख करटी, आगामी दिनमे समेत सामाजिक संस्थासंग हातेमालो करटी सेवा विस्तार कैना प्रतिबद्धता व्यक्त करलै ।
