जानकी–५ मे जग्गाको नापनक्सा सुरु
पहुरा समाचारदाता
टीकापुर, १० जेठ । कैलाली जिल्लाके जानकी गाउँपालिकाके वडा नं ५ के नवलपुरसे भूमिहीन दलित, भूमिहीन सुकुम्बासी ओ अव्यवस्थित बसोबासीहुकनके जग्गाके नापनक्सा सुरु हुइल बा ।
जग्गाके नापनक्साके सुरुवात करटी गाउँपालिका अध्यक्ष गणेश चौधरी भुमिहिनहे लालपुर्जा डेना प्रतिवद्धता जनैलै । उहाँ भूमिहिनके जग्गाधनी पुर्जा प्राप्तीके अपेक्षा ओ जनप्रतिनिधिके प्रतिबद्धताहे पूरा कैना गाउँपालिकासे पूर्ण सहयोग रना बटैलै । गाउँपालिकामे भूमिहीन दलित ४ सय ९०, भूमिहीन सुकुम्बासी १ हजार ४ सय २९ ओ अव्यवस्थित बसोबासी ३ हजार २ सय ५७ करके ५ हजार १ सय ७६ जाने रहल बटै ।
जानकी गाउँपालिकाके आयोजनामे सुरु हुइल जग्गा नाप नक्सा उदघाटन कार्यक्रममे भूमि समस्या समाधान आयोगके अध्यक्ष यज्ञ प्रसाद उपाध्याय, सदस्य सचिव जनक राज भट्ट, सदस्य दान बहादुर विक, गाउँपालिका उपाध्यक्ष लालमती कठरिया, वडा अध्यक्ष भीम बहादुर चौधरी, वडा सदस्य लगायतके उपस्थिति रहे । गाउँपालिकामे रहल भूमिहीन दलित,भूमिहीन सुकुम्बासी ओ अव्यवस्थित बसोबासीहुकनहे समयमे जग्गा नापनक्सा करके यिहे आर्थिक वर्षके मसान्तसे जग्गाधनी पूर्जा वितरणके थालनी हुइना प्रतिबद्धता करल बा ।
