फोटोन विद्युतीय गाडीके नयाँ शोरुम धनगढीमे सञ्चालन
पहुरा समाचारदाता
धनगढी, १० जेठ । कैलालीके धनगढीमे नयाँ फोटोन ओ सोकोनके (बतास एमएडब्लु कमर्सियल भेकल्स) शो रूम सञ्चालनमे आइल बा । शो रुमके एक समारोहके विच धनगढी उपमहानगरपालिकाके उपप्रमुख कन्दकला राना उदघाटन तथा माउन्टेन ईभी सार्वजनिक करली ।
उ अवसरमे बोल्टी उपप्रमुख राना विद्युतिय सवारी साधनके प्रयोगसे प्रर्यावरणमे टेवा पुग्न बटैटी कहली–‘इन्धनके सवारी साधनके कारण वातावरणमे प्रदुर्षण बह्रल बा । उहे कारण अब विद्युतिय सवारी साधन उपयुक्त विल्गाइठ ।’ उहाँ धनगढीसेफे विद्युतिय सवारी साधनमे प्रयोग कैना नीति लेहल बटैटी थप्ली–‘हम्रे विद्युतिय सवारी उपयोग कैना नीति लेहल बटी । जेकर कारण गैल वर्ष हम्रे काठमाडौसे सवारी साधन ल्याने परल रहे । अब्बे यिहे शोरुम खुललपाछे सहजता हुइल बा ।’
शोरुमसे अपन उपस्थिति विस्तार कैना लक्ष्य सहित धनगढीमे शोरुम सञ्चालनमे ल्यानल कम्पनीसे जनैले बा । यी कदम कम्पनीके गुणस्तरीय व्यावसायिक सवारी ओ सेवाप्रति प्रतिबद्धताके दुसर महत्वपूर्ण पाइलाके रूपमे लेहल कम्पनीके कहाई बा । यी क्षेत्रके ‘उच्च गुणस्तर, कुशल, ओ भरपर्दो यातायात’ के बढटी माग पूरा कैना सहयोग पुगैना कम्पनीके सेल्स हेड रघुनाथ पौडेल बटैलै । नयाँ शोरूममे फोटोन ओ सोकोन सक्कु व्यवसायिक ११–१४ सिट उपलब्ध रहल उहाँकह कहाई बा ।
कौनोफे नम्मा दुरी ओ छोट दुरी यातायातके आवश्यकताहे पूरा कैना कम्पनी तयार रहल उहाँ बटैलै । धनगढी ओ वरपरके क्षेत्रके ग्राहकके लाग सहजुले पहुँच ओ उत्कृष्ट सेवा सुविधा डेना लक्ष्यसहित शोरुमके उदघाटन करल उहाँक कहाई बा ।
यहाँ ग्राहकसे फोटोनके नयाँ सवारी हेरे पैनाके साथे सल्लाह, बिक्रीपाछे सेवा ओ मर्मत सुविधाफे प्राप्त करे सेक्ना ईभी सेल्स हेड रचना राई बटैली । बी.एम.सी.भी. (बतास एमएडब्लु कमर्सियल भेकल्स) से फोटोन मोटरके धनगढी ओ सुदूरपश्चिम क्षेत्रके अधिकृत वितरकके नयाँ शोरूमके उदघाटनसंगे, कम्पनीसे अपन नयाँ विद्युतीय सवारी फोटोन माउन्टेन ईभी भ्यानफे औपचारिक रूपमे सार्वजनिक करल रहे ।
उहाँ कहली–‘नेपालके यातायात क्षेत्रके लाग एक गेम–चेन्जर बन्न अपेक्षा करल बा ।’ माउन्टेन ईभी भ्यान १४ से १६ जाने यात्रु अट्न, उच्च छाना रहल फरछवार डिजाईनमे निर्माण करल उहाँक कहाई बा । उहाँ कहली–‘यात्रुहुकनहे आरामदायी हेडरूम प्रदान करठ । ५३.५८ केडब्लुएच क्षमताके ब्याट्रीसे एक चो चार्ज करेबेर ३०० किलोमिटरसम यात्रा करे सेकठ । जिहीसे यी नेपालके सक्कु भौगोलिक क्षेत्रमेफे उपयुक्त बने सेकठ ।’
उदघाटन समारोहमे स्थानीय यातायात संघके अध्यक्ष तथा सदस्य, साथे अटोमोबाईल क्षेत्रके उत्साही सहभागी रहिट ।
बीएमसीभीके बिक्री प्रमुख रघुनाथ पौडेलको अनुसार, कम्पनी पूर्णरूपमे बिक्री, पाट्स ओ सर्भिस प्रति प्रतिबद्ध रहल बा । उहाँ कहलै, ‘फोटोन अन्तर्राष्ट्रिय बजारमे अत्यधिक सफलता प्राप्त करले बा ओ व्यावसायिक ईभीके क्षेत्रमे नेतृत्व लेटी रहल बा । उहाँ कहलै–‘धनगढीमे नयाँ इभि गाडी शोरूमके शुभारम्भसे धनगढीमे महत्वपूर्ण पाइला कोरल बा । यी उपलब्धिसे ब्रान्डके उपस्थिति मजबुत बनैनाके साथे ग्राहकहे सहज रुपमे नवीनतम ईभी समाधान उपलब्ध करैना बा ।’
