थारु संस्कृति पुस्तान्तरण जरुरीः उपकुलपति जोशी
पहुरा समाचारदाता
धनगढी, १० जेठ । सुदूरपश्चिम प्रज्ञा प्रतिष्ठानके उपकुलपति डा. टिएन जोशी थारु संस्कृति पुस्तान्तरण जरुरी रहल बटैले बटै ।
महिला शसक्तीकरणके संगे थारु कला, संस्कृति संरक्षणके लाग स्थापना हुइल सखी मञ्च कैलालीके उदघाटन तथा सांस्कृतिक कार्यक्रममे सम्बोधन कैटि उहाँ थारु समुदायके लौव पिढीमे परम्परागत कला, संस्कृति हस्तान्तरण करेपर्नामे जोर डेहल रहिट । उहाँ कहलै, प्रदेशमे रहल महत्वपूर्ण थारु, रानाथारु, कठरियाथारु, डोटेली, राउटे संस्कृति बचाउ हुइना जरुरी बा । सरकार महीहे जिम्मेवारीफे डेले बा । ओकर मै नेतृत्वफे करटु । बचाउके लाग अभियानफे सुरु हुसेकल बा ।’
उपकुलपति जोशी कहलै, ‘सक्कु समुदायके संस्कृति संरक्षणके लाग यिहे जेठ २४ व २५ गते धनगढीमे अन्तर्राष्ट्रिय साहित्य व संस्कृति सम्मेलन हुइना बा । थारु समुदायमे रहल पौराणिक नाँच सहभागी करैना बा । यहाँक सक्कु समुदायके सहभागी रही सँगे भारतसेफे सहभागी रही ।
संघीयता आइलपाछे सुदूरपश्चिम प्रदेशके नाउँ बडल्ना चर्चा व छलफल हुइटी रलक कटि यहाँ बसोबास कैना सक्कु जातजाति वर्गहे मिलाके सबजानेक पाच्य हुइना मेरके नाउँ रख्ना जरुरी बा, उहाँ कहलै ।
थारु संस्कृति जिवन्त हुइना चाही,’ उपकुलपति डा. जोशी कहलै, ‘थारु समुदाय भिटर परम्परागत ढेर संस्कृति बा । जौन कुछ कुछ केल्ह बाहेर आइटा । बहुट जैसिन अभिन बाहेर आइनैसेकल हो । उहीहे पुनःजागरण कैटि यूवा पुस्तामे हस्तान्तरण कैना जरुरीफे बा ।
थारु कल्याणकारिणी सभाके केन्द्रीय सदस्य पुरन चौधरी महिलाहुकन हरेक ठाउँमे समावेश जरुरी रहल बटैलै । संस्कृति संरक्षणमे महिलाहुकनमे भारी योदादान रहल बा । महिलाहुकनहे संग संगे लैजाइक हातेमालो जरुरी रहल उहाँ बटैलै ।
थारु कल्याणकारिणीसभाके केन्द्रीय सदस्य होरीलाल चौधरी महिला शसक्तीकरणक लाग स्थापना हुइलक सखी मञ्च थारु समुदायके संस्कृति जोगैनामे योगदान पुग्न विश्वास व्यक्त करलै । उहाँ कहलै, थारु समुदायमे पुरान संस्कृति अनुसन्धान ओ शब्दकोष बनैना यी मञ्चसे कैना जरुरी बा । यिहीहे आघे बह्राइक लाग सबजाने समन्वय कैना जरुरीफे बा ।
कार्यक्रमम नेपाली काँग्रेसके महाधिवेशन प्रतिनिधि मनिराम चौधरी, सिएफसीसीके अध्यक्ष रमेश चौधरी, कैलारी गाउँपालिका वडा नम्बर ३ के वडा अध्यक्ष सन्तराम चौधरीलगायत मन्तव्य व्यक्त करल रहिट ।
सखी मञ्च कैलालीके अध्यक्ष फुलमति चौधरीके अध्यक्षमे हुइलक कार्यक्रमके उद्देश्यबारे मञ्चके सल्लाहकार माधव थारु व स्वागत मन्तव्य कोषाध्यक्ष माया चौधरी करल रल्ही । मञ्चके उदघाटन कार्यक्रममे बैसपुरके सखिया, गोबरैलाके सखिया नाँच गोबरैलाके झुम्रा नाँच, नेपाल महिला संघके जिल्ला उपाध्यक्ष अमरकेटी चौधरीसे सजना गित, थारु महालोक गायक मनिराम करिया मघरियासे थारु संस्कृतिसंगे बनसंरक्षण सम्बन्धी गित, थारु मोडेल सिरिया चौधरीके एकल नृत्य प्रस्तुती रहे । कार्यक्रमके संचालन मञ्जु चौधरी करल रल्ही । सुदूरपश्चिम प्रज्ञा प्रतिष्ठानके सहयोगमे सखी मञ्च कैलालीके आयोजनामे कार्यक्रम हुइल रहे ।
