ढकिया, दालो ओ बास्केट बनैना तालिम सुरु
पहुरा समाचारदाता
हसुलिया, १२ जेठ । कैलाली जिल्लाके कैलारी गाउँपालिकामे आठ दिने ढकिया, दालो ओ बास्केट बनैना एक महिने तालिम सुरु हुइल बा ।
कैलारी गाउँपालिका गरिबी निवारणका लागि लघु उद्यम विकास कार्यक्रम मेड्पा अन्तर्गत ८ दिने उद्यमशीलता विकास तालिम पासेकल वडा नं १ ओ ३ के सम्भाबित उद्यमीहुकनके माग तथा सम्भाव्यतामे उ तालिम सुरु हुइल हो ।
गाउँपालिका उपाध्यक्ष भगवतीकु्मारी चौधरीके वरका पहुनामे हुइल तालिम उदघाटन कार्यक्रममे उहाँ गाउँपालिका महिलाके आर्थिक शसक्तीकरणमे जोर डेहल बटैली ।
उहाँ कहली गाउँपालिकासे महिलाहुकनहे आर्थिक रुपमे सवल बनाइक लाग टमान मेरके तालिम संचालन करटी आइल बा । महिला उद्यमीहुकनसे तयार पारल सामाग्री बजारीकरण कैनाफे कहल बा ।
उपाध्यक्ष कहली, ‘और वडामे ढकिया, डालो, बास्केट लगायत लेहङगा सिल्ना तालिम संचालन कैगिल बा । आर्थिक रुपमे कम्जोर महिलाहुकनहे लैङिक हिंसाफे भोगे परल बा । हिंसा न्यूनिकरणके लाग फे महिलाहुकनके सीप ओ आयआर्जनसे जोरना आवश्यक बा ।
ढकिया, दालो तथा बास्केट बनैना सीप बिकास तालिम कैलारी गाउँपालिका वडा नम्बर १ के वडा अध्यक्ष धोज हरिपाल बोहराके अध्यक्षतामे हुइल रहे ।
