आमसञ्चार क्षेत्रके लाग यथोचित बजेट विनियोजन करबः मन्त्री सार्की
पहुरा समाचारदाता
धनगढी, १२ जेठ । सुदूरपश्चिम प्रदेशके आन्तरिक मामिला तथा कानून मन्त्री हिरा सार्की आमसञ्चार क्षेत्रके लाग अइना आर्थिक बरस यथोचित बजेट विनियोजन कैना बटैले बटै ।
आन्तरिक मामिला तथा कानून मन्त्रालयके आर्थिक सहयोगमे नेपाल पत्रकार महासंघ सुदूरपश्चिम प्रदेश समितिसे आयोजना करल ‘विकास पत्रकारिता सम्बन्धी प्रदेश स्तरीय अभिमुखीकरण कार्यक्रम’ मे बर्का पहुनाके रुपमे सम्बोधन कैटी मन्त्री सार्की ओइसीन बटाइल हुइट ।
‘चालु आर्थिक बरसमे आमसञ्चार क्षेत्रके लाग विनियोजन हुइल बजेटमे मोर फेन चित्त बुझल नैहो । यद्यपी यी बेर आन्तरिक मामिला तथा कानून मन्त्रालयके बजेट सिलिङ घटके आइल बावै । मने मोर प्रयास आमसञ्चार क्षेत्रके लाग यथोचित बजेट विनियोजन कैना प्रतिवद्धता ब्यक्त करटुँ’ उहाँ कहलै ।
मन्त्री सार्की मस्यौदाके रुपमे रहल आमसञ्चार विधेयक भर्खरे सञ्चालन हुइल बजेट अधिवेशनमे दर्ता कैना मेरके तयारी हुइल बटैलै । ‘मन्त्रालय सम्हरटी रहल बेलासे मोर पहिल प्राथमिकतामे आम सञ्चार विधेयक परल हो । मस्यौदा उपर एक चरणके छलफल होसेकल बावै । ओम्ने कुछ सुझाव आइल बावै । मस्यौदामे उ सुझाव समेटजैना बावै ओ अन्तिम पटक मस्यौदाउपर छलफल कैके प्रदेश सभामे लैजैना तयारी हुइटी रहल बा’ उहाँ कहलै ।
कार्यक्रममे खास पहुना रहल आन्तरिक मामिला तथा कानून मन्त्रालयके सचिव डा दिपेन्द्र कुमार मिश्र फेन आन्तरिक मामिला तथा कानून मन्त्रालय सञ्चार मन्त्रालय फेन रहल ओरसे ओम्ने आमसञ्चार क्षेत्रके लाग बजेट आवश्यक रहल बटैलै । उहाँ सरकारके तीन अंग जस्टे पत्रकारिता क्षेत्र फेन खबरपालिकाके रुपमे सरकारके अंग रहल बटैटी यकर लाग विगतसे मजा बजेट अइना बटैलै ।
नेपाल पत्रकार महासंघ प्रदेश अध्यक्ष भरत बहादुर शाहके अध्यक्षतामे हुइल उद्घाटन समारोहमे मुख्यमन्त्रीके राजनीतिक सल्लाहकार जीतु उपाध्याय, पत्रकार महासंघके पूर्व केन्द्रीय अध्यक्ष धर्मेन्द्र झा, केन्द्रीय सदस्य योगेन्द्र बलायर, प्रदेश समितिके सल्लाहकार अर्जुन शाह ओ मीन बम शुभकामना मन्तव्य व्यक्त करल रहिट ।
ओस्टके कार्यक्रममे नेपाल प्रेस युनीयनके प्रदेश अध्यक्ष मनमोहन स्वार, प्रेस चौतारी के केन्द्रीय सदस्य पार्वती धामी, आदीवासी जनजाती पत्रकार महासंघ (फोनिज)के प्रदेश अध्यक्ष उन्नती चौधरी लगायत मन्तव्य व्यक्त करल रहिट । कार्यक्रममे आथित्य शाखाके रुपमे कैलाली शाखाके अध्यक्ष श्रवण देउवा स्वागत मन्तव्य व्यक्त करल रहिट ।
