भ्रष्टाचार कैलक पुष्टि करिट राजीनामा डेना तयार बटुः गापा अध्यक्ष

पहुरा समाचारदाता
जोशीपुर, १२ जेठ । कैलाली जिल्लाके जोशीपुर गाउँपालिका अध्यक्ष चित्रबहादुर चौधरी भ्रष्टाचार करल पुष्टि करलेसे अपने राजीनामा डेना बटैले बटै ।

अँटवारके रोज कार्यालयके काम सेक्के साँझके ५ः५० बजे घर जैना क्रममे मैनपोखरी पुलठेन अपनेसे काम बा कहटी ८÷१० जाने कम्युनिष्ट युवा संगठन नेपाल वटुइया अराजक युवासे मोर चरित्रहत्या कैना नियतसे करल दुव्र्यवहार ओ अपमानजनक व्यवहारप्रति गम्भीर ध्यानाकर्षण हुइल जानकारी उहाँ जनैलै ।

यैसिन गतिविधि न केवल मोर व्यक्तिगत मर्यादा ओ प्रतिष्ठा उप्परके हमला हो यी सक्कु जोशीपुर गाउँपालिका ओ यहाँके जनताके अस्मिता उप्परफे आघाट हो ।

कुछ व्यक्ति योजनाबद्ध रुपमे झुठा आरोप अफुवा ओ सामाजिक संजालमे गलत सूचनाके प्रचारप्रसार करके मोर छविमे दाग लगैना प्रयासमे बटै । मै उ सक्कु असत्य ओ कपोल कल्पित आरोपके खण्डन करटु उहाँ कहलै ।

जनप्रतिनिधि हुईबेर आलोचना स्वभाविक हो मने नियोजित बदनाम कैना अभियान ओ असिस्त व्यवहारहे सहन करे नैसेक्जाई । मै स्पष्ट रुपमे कहे चाहटु की मोर कार्यकालमे मै जनताके हकहित ओ सम्वृद्धिओर समर्पित बटु ओ कौनोफे अमर्यादित तत्वसे मोर निष्ठा ओ समर्पणहे कमजोर पारे नैसेकी ।

मै यी घटनामे संलग्न दोषी उपर कानुनी कारबाहीके लाग प्रहरी प्रशासनहे हार्दिक अनुरोध कैना समाजमे शान्ति, मर्यादा ओ अनुशासन कायम रख्ना सक्कु जोशीपुरवासीहुकनहे आग्रह करटु ।

यिहे विच आपनहे कालोमोसो घस्ना प्रयासके घटनापाछे सोम्मार पत्रकार सम्मेलन करके आपनहे लगाइल आरोप पुष्टि कैलेसे राजीनामा डेना तयार रहल अध्यक्ष चौधरी बटैलै । उहाँ कहलै, ‘दुई जाने यूवा महीहे चन्दा मग्न मनसाय बैठे खोजल रहिट । मै ओइनहे कहनु ओस्टेक पैसा डेहे नैसेक्जाई । कुछ कार्यक्रम कैके पैसा लैजाउ । ओइनके चित्त बुझाई नैसेकलपाछे ओक्रे प्रतिसोधमे दुव्र्यवहार करल हुइट ।

गाउँपालिकामे सिचाईके लाग जे जे फारम भरलेले ओइने पानीमोटर पैलै । नैभरल मनैन कैसिक डेजाई, उहाँ कहलै ।
ओस्टे कार्यालयमे आइल कौनोफे सेवाग्राहीहे दुव्र्यवहार नैकरल हो ।

घटनाके सर्वत्र विरोध

कम्युनिष्ट युवा संगठन नेपाल वटुइया अराजक युवा समुहसे जोशीपुर गाउँपालिका अध्यक्ष चित्रबहादुर चौधरी उप्पर हुइल दुव्र्यवहारके घटनाप्रति सर्वत्र विरोध कैगिल बा ।

थारु कल्याणकारिणी सभा कैलाली, नागरिक उन्मुक्ती पार्टी केन्द्रीय कार्यालय, जिल्ला कार्यसमितिसे विज्ञप्ती जारी करके विज्ञप्ती जारी करटी अपमानजनक, अमर्यादित ओ अराजक कार्यप्रति गम्भीर ध्यानाकर्षण हुइल जनैले बा ।

नागरिक उन्मुक्ती पार्टीके केन्द्रीय अध्यक्ष रञ्जिता चौधरी विज्ञप्ती जारी करटी अपमानजनक, अमर्यादित ओ अराजक कार्यप्रति गम्भीर ध्यानाकर्षण हुइल जनैले बा । उ कार्यके घोरभत्सर्ना करटी दोषी पत्ता लगाके कार्वाहीके माग करल करले बटी । ओस्टेक नागरिक उन्मुक्ती पार्टी, थारु कल्याणकारिणी सभा कैलाली उ कार्यप्रति घोर विरोध करले बटै ।