जेठ १५ से प्रदेशस्तरीय तेक्वान्दो प्रतियोगिता हुइना
पहुरा समाचारदाता
धनगढी, १३ जेठ । शिक्षा ओ संस्कारके संगमके रूपमे रहल चैतन्य पाठशाला यी वर्ष ‘चैतन्य तेसर सुदूरपश्चिम प्रदेशस्तरीय तेक्वान्दो प्रतियोगिता २०८२’ आयोजना करना हुइल बा ।
जेठ १५ से १७ गतेसम धनगढी–५, शिवनगरस्थित चैतन्य पाठशाला फुटसल मैदानमे आयोजना हुइना प्रतियोगिताके प्रमुख अतिथि ओलम्पियन तथा राष्ट्रिय खेलकुद परिषद् (राखेप) के राष्ट्रिय टिम तयारी निर्देशक दीपक विष्ट रहहि । उ प्रतियोगिताके उद्घाटन एरोनोटिकक्स इन्जिनियरिङमे अन्वेषण करटिरहल युवा वैज्ञानिक आर्यान विकके नयाँ आर्सी प्लेन उडानसे हुइना हो ।
पाठशालाके भगिनी संस्था ‘चैतन्य तेक्वान्दो डोजाङ’के आयोजनामे हुइना प्रतियोगिता सेन्सर सिस्टम प्रयोग कैके सञ्चालन करजाइ । प्रतियोगितामे सुदूरपश्चिम प्रदेशके सक्कु जिल्लासे खेलाडीहुकनके सहभागिता रहना आयोजक जनैले बा । आयोजकके अनुसार यीे प्रतियोगिता तेक्वान्दो खेलमे युवा खेलाडीके रुचि ओ प्रतिस्पर्धात्मक क्षमताहे उजागर करटि खेलकुद क्षेत्रके समग्र विकासमे टेवा पुगैना विश्वास करल बा ।
मंगरके रोज आयोजित पत्रकार सम्मेलनमे चैतन्य पाठशालाके निर्देशक कटकबहादुर सिंह सुदूरपश्चिमके खेलाडीहुकनहे खेलके माध्यमसे आगे बह्रैना चैतन्यके लक्ष्य रहल ओ विगतके वर्षमे समेत नगर ओ जिल्लास्तरीय प्रतियोगिता सम्पन्न कैकसेकल अनुभव अपन रहल बटैलैं ।
समाजके विकास ओ सक्षम नागरिक उत्पादन करटि रहल चैतन्यके पहिचान फरक रहल ओ चैतन्यके हरेक गतिविधि समाजसँग जोरल चैतन्य पाठशालाके प्राचार्य प्रेमनिधि ओझा बटैलैं ।
गैल दुई वर्ष नगर ओ जिल्लास्तरमे सफल प्रतियोगिता कैसेकल डोजाङ यी चो प्रतियोगिताहे प्रदेशस्तरमे स्तरोन्नति करले बा । प्रतियोगितामे करिब दुई सय ढेर खेलाडी सहभागी हुइना अपेक्षा करल बा । प्रतियोगिता सञ्चालनके लाग कुल ७ लाख ७५ हजार रुपैयाँके अनुमानित खर्च लग्ना आयोजक जनैले बा ।
कैलाली जिल्लाके खेलाडीके लाग दर्ता शुल्क प्रति खेलाडी पाँच सय ओ कैलाली बाहेक जिल्लाके खेलाडीके लाग एक हजार तोकल बा । प्रतियोगितामे उत्कृष्ट प्रदर्शन करना टिमहे नगद पुरस्कार फेन बा । प्रथम टिम ५० हजार, द्वितीय टिम ३० हजार ओ तृतीय टिम २० हजार पाइ । अस्टेक, ‘वेस्ट फाइटर’ पुरुष तथा महिलाहे जनही पाँच हजार पुरस्कार प्रदान करजैना आयोजक जनैले बा ।
प्रतियोगिताके मुख्य प्रायोजक दहपाल बुक्स एन्ड स्टेसनरी बा कलेसे राज ग्रुप सह–प्रायोजकके रूपमे रहल बा । अस्टेक, धनगढी उपमहानगरपालिका वडा नं. ५ प्रवद्र्धकके रूपमे रहल बा ।
आयोजक प्रतियोगिताहे भव्य ओ सफल बनाइक लाग टमान संघसंस्था, व्यवसायी तथा उद्योगीहुकनहे सहयोग ओ प्रायोजनके लाग आह्वान करले बा ।
