महिनावारी स्च्छता दिवसके अवसरमे वक्तृत्वकला प्रतियोगिता

पहुरा समाचारदाता
हसुलिया, १४ जेठ । महिनावारी स्च्छता दिवसके अवसरमे कैलारीमे ‘महिनावारी स्वास्थ्यके आवश्यकता ओ महत्व’ विषयमे मावि स्तरीय वक्तृत्वकला प्रतियोगिता सम्पन्न हुइल बा ।

कैलारी गाउँपालिका स्वास्थ्य शाखाके आयोजना तथा सामुदायिक विकास केन्द्र डोटीके सहकार्यमे कैलारी गाउँपालिकाके माध्यमिक विद्यालय स्तरीय वक्तृत्वकला प्रतियोगिता हुइल हो ।

गाउँपालिका उपाध्यक्ष भगवतीकुमारी चौधरीके वरका पहुनामे हुइल कार्यक्रममे उहाँ महिनावारी प्राकृतिक रुपमे हुइना ओरसे गलत व्यख्या नैकैना आग्रह करली ।

उहाँ कहली, ‘महिलामे महिनावारी नैहुइट टे समाजके सृष्टी रुक्जाइट । महिनावारी हुइल बेला और समुदाय छाउपडीके रुपमे लेहल कारण ढेर महिला अकालमे ज्यान गुमैना बाध्य हुइल बटै । महिनावारी हुइल बेला महिलाहुकनहे सरसफाईमे ध्यान डेना गाउँपालिका उपाध्यक्ष आग्रह करली ।

महिनावारीमैत्री समाजके लाग सहकार्य कना मूल नाराके साथ दिवसके अवसरमे मंगरके रोज कैलारी–४ स्थित जनकल्याण मावि के गाउँमे ओ आज (बुध)के रोज दिपेन्द्र मावि हसुलियामे वक्तृत्वकला प्रतियोगिता हुइल हो ।

प्रतियोगितामे दुनु रोज पाँच÷पाँच जाने विद्यार्थी भाग लेहल रहिट । जेम्ने कल्याण माविमे हुइल प्रतियोगितामे भाग लेहल मन्से समृद्धि सुनार (कक्षा १०) पहिल, रेखा चौधरी (कक्षा १०) दुसरा ओ अन्जली चौधरी (कक्षा १०) टिसरा हुइल रहिट । कलेसे रिता माझी (कक्षा ९) ओ अन्जली विक (कक्षा ८) सन्त्वाना पुरस्कार पाइल रहिट ।
ओस्टेक दिपेन्द्र माविमे हुइल प्रतियोगितामे खुशी विक पहिल, मुस्कान देउवा दुसरा, सुप्रिना चौधरी टिसरा स्थान हासिल करल रहिट । कलेसे जेसिका चौधरी ओ कामना चौधरी सन्त्वाना पुरस्कार पाइल रहिट ।

प्रतियोगितामे कैलारी गाउँपालिका महिला तथा बालबालिका शाखा प्रमुख बालकुमारी चौधरी, स्वास्थ्य शाखाके सिअनमी अनिता चौधरी, दिपेन्द्र माविके प्रधानाध्यक विनोद भट्टराई, कलक विक, पशुपति विनाडी, जनकल्याण माविके प्रधानाध्यापक हनुमान चौधरीलगायतके पहुनाके सहभागिता रहे । प्रतियोगिताके पहिल रोज १३३ जाने विद्यार्थी ओ दुसरा दिन १४० जाने विद्यार्थीनहे उपस्थिति रहे ।