प्राविधिक जनशक्ति उत्पादन कैना नाष्टके महत्वपूर्ण भूमिका
पहुरा समाचारदाता
धनगढी, १४ जेठ । सुदूरपश्चिम प्रदेशके सामाजिक विकास मन्त्री मेघराज खड्का नाष्ट कलेज प्रदेशमे प्राविधिक तथा व्यवस्थापन ओर जनशक्ति उत्पादन कैना महत्वपूर्ण भूमिका खेलल् बटैले बटै ।
नाष्ट रिसर्च म्यानेजमेन्ट सेल धनगढीके आयोजना तथा विश्वविद्यालय अनुदान आयोगके सहयोगमे लावा प्रविधिके प्रयोग ओ व्यवस्थापन प्रणालीबारे धनगढीमे हुइटी रहल दुईदिने सम्मलेन उद्घाटन समारोहहे सम्बोधन कैटी मन्त्री खड्का नाष्टसे प्राविधिक जनशक्ति ओ व्यवस्थापकीय जनशक्ति उत्पादनमे महत्वपूर्ण भूमिका खेलल बटाइल हुइट ।
‘नाष्टहे मै सुदूरपश्चिममे प्राविधिक तथा व्यवस्थापकीय जनशक्ति उत्पादन कैना शैक्षिक धरोहरके रुपमे चिन्हले बटुँ,’ मन्त्री खड्का कहलै, ‘नाष्ट यहाँके विद्यार्थीहे गुणस्तरीय शिक्षा क्षेत्रमे बरवार योगदान करले बा ।’
टाइपराइटरसे सुरु हुइल शिक्षा अब्बे लावा लावा प्रविधि आइल बटैटी मन्त्री खड्का समय ओ बजारमे माग हुइल अनुसारके शिक्षा आवश्यकता रहल बटैलै ।
नाष्ट कलेजके प्रवन्ध निर्देशक शिवहरी मुडभरी प्रदेश सरकारहे नीजि शैक्षिक क्षेत्र ओर फेन सरकारके लगानी हुइ पर्ना बटाइल रहिट । ‘शिक्षा कबु नीजि ओ कबु किनबेच नैहुइठ् । ओहेमारे प्रदेश सरकारहे मोर का आग्रह बा कलेसे, नीजि क्षेत्रके स्कूल कलेजहे फेन पुस्तक लगायत आवश्यक श्रोत साधन सहयोग कैना जरुरी रहल बा,’ उहाँ कहलै ।
प्रवन्ध निर्देशक मुडभरी नाष्टसे उत्पादन हुइल जनशक्ति यहाँके हरेक वैंक तथा वित्तिय क्षेत्र ओ स्थानीय तहमे कार्यरत रहल दाबी समेत करलै । उहाँ नाष्टसे हालसम आइटी ओर १७७ जाने, बीबीए तर्फ ३८२, सिभिल तर्फ ३०६, बीइ कम्प्युटर ओर २९९ जाने ओ कक्षा १२ ओर ६ हजार ढेर विद्यार्थी पासआउट होके गैल जानकारी डेलै ।
कार्यक्रम नाष्ट रिसर्च म्यानेजमेन्ट सेलके संयोजक तथा नाष्ट कलेजके प्रिन्सिपल डा. प्रेम बहादुर चन्दके अध्यक्षतामे हुइल रहे । दुईदिने कार्यक्रमके पहिल रोज प्रदेश सभा सदस्य डा. तारा प्रसाद जोशी, कैलाली बहुमुखी क्याम्पसके प्राध्यापक डा. राजेन्द्रबीर चन्द, नाष्ट कलेजके देवराज अवस्थी, सन्ध्या श्रेष्ठ लगायतके कार्यपत्र प्रस्तुतीके कार्यक्रम रहल बा । ओस्टके डोसर रोज इन्जिनियर यम कृष्ण पौडेल, प्रकाश जोशी, कृष्ण चन्द, किशोर थापा, रविन खड्का, हिकमत चौधरी, नविन प्रसाद पन्त, भरत बहादुर शाही लगायतके कार्यपत्र प्रस्तुतके कार्यक्रम रहल बा ।
‘उच्च अनुशासन तथा दक्ष व्यवस्थापन, उत्कृष्ट शैक्षिक वातावरण तथा गुणस्तरीय शिक्षा’ मूल नारा सहित वि.स. २०५७ सालमे स्थापना हुइल कलेज अब्बे विज्ञान व्यवस्थापन तथा प्रविधिके पठन पाठनसे सर्वांगीण विकासके लाग गन्तब्य शिक्षालयके रुपमे चिन्हजाइठ् ।
कलेज विश्व विद्यालय अनुदान आयोग (यूजीसी) से निर्धारित संस्थागत गुणस्तरके टमान चरण पार कैटी राष्ट्रिय तथा अन्राष्ट्रिय जगतमे सम्मान ओ उपलब्धिके सूचक गुणस्तर सुनिश्चितता तथा प्रत्यायन (क्यूएए) फेन प्राप्त कैटी पोखरा विश्व विद्यालयसे सम्बन्धन प्राप्त निजी क्षेत्रमे पहिल हुइ पुगल बावै ।
नाष्टमे कक्षा ११ ओ १२ ओर विज्ञान ओ व्यवस्थापन, स्नातक ओर बीइ कम्प्युटर, बीसीए, बीबीए, बीइ सिभिल ओ स्नाकोत्तर ओर एमबीएसमके पह्राइ हुइटी रहल बावै । हाल नाष्टमे कक्षा ११ ओ १२ मे एक हजार १५०, स्नातक तहमे ७७० ओ स्नाकोत्तर तहमे ११ विद्यार्थी अध्ययनरत रहल बाटै । कलेजमे ५१ जाने प्राध्यापक ओ ३९ जाने कर्मचारी रहल बाटै ।
