कैलालीके ६ पालिकाहे सिकलसेल एनिमिया चेकजाँच मेसिन हस्तान्तरण
पहुरा समाचारदाता
धनगढी, १४ जेठ । स्वास्थ्य कार्यालय कैलालीसे कैलाली जिल्लामे रहल ६ स्थानीय तहहे सिकलसेल एनिमिया, थालासेमिया स्क्रिनिङ मेसिनलगाएतके आवश्यक किट हस्तान्तरण कैगिल बा ।
कैलालीके जिल्लाके गोदावरी नगरपालिकासँगे गौरीगंगा नगरपालिका, घोडाघोडी नगरपालिका, बर्दगोरीया गाउँपालिका, लम्कीचुहा नगरपालिका ओ जानकी गाउँपालिकामे सिकलसेल एनिमिया, थालासेमिया स्क्रिनिङ मेसिन, लगाएतके आवश्यक किट हस्तान्तरण करल हो ।
सिकलसेल एनिमिया, थालासेमिया थारु समुदायमे डेखा ओ यी स्थानीय तह थारु समुदायके बसोबास गझिन रहल ओरसे स्क्रिनिङ मेसिन, लगाएतके आवश्यक किट हस्तान्तरण करल स्वास्थ्य कार्यालय कैलाली जनैले बा ।
स्वास्थ्य कार्यालय कैलालीसे सिकलसेल एनिमिया ओ थालासेमिया रोग पहिचान (स्क्रिनिङ) करे कलाग अत्याधुनिक स्क्रिनिङ मेसिन हस्तान्तरण करल हो । करिब ८ लाख ८९ हजार रुप्या मूल्यके उ मेसिनसंगे डेङ्गु परीक्षण किटसमेत स्थानीय तहहे उपलब्ध कराइल बा ।
गोदावरी नगरपालिकामे स्वास्थ्य कार्यालयके प्रतिनिधिसे औपचारिक कार्यक्रमके बीच मेसिन गोदावरी नगर प्रमुख बिरेन्द्र भट्टहे हस्तान्तरण करल रहे । स्वास्थ्य कार्यालय कैलालीसे अइसिन संवेदनशील ओ दीर्घकालीन महत्वके उपकरण प्रदान करके हम्रहिनहे भारी साथ डेहल बा । यी मेसिनसे रानाथारु, थारु समुदायमे ढेर विल्गैना रोगके पहिचान ओ समयमे उपचार कैना सहजुल हुइना जानकारी गोदावरी नगरपालिकाके नगर प्रमुख बिरेन्द्र भट्ट बटैलै ।
ओस्टेक करके गोदावरी नगरपालिकाके जनस्वास्थ्य निरीक्षक जनकराज अवस्थी गोदावरीके वडा नं. ३, ५, ६, ८ ओ ९ मे थारु, रानाथारु समुदायके गझिन बसोबास रहल बा । उहाँ सिकलसेल ओ थालासेमिया रोगके जोखिम ढेर हुइना हुइल ओरसे स्क्रिनिङ आवश्यक रहे । यी मेसिनसे समुदायमे बैठके परीक्षण कैना सुविधा डेहठ जौन भारी उपलब्धी हो ।
उहाँक अनुसार, आब स्थानीय तहमे परीक्षण सेवा उपलब्ध हुके समुदायहे सहज हुइना बा ओ रोगके प्रारम्भिक अवस्थामे पहिचान करके उपचार सुरु करे सेक्जाइठ ।
बजेट अभावसे सिकलसेल अस्पताल प्रयोग विहीन
बजेट अभावमे बर्दियाके बारबर्दिया नगरपालिकामे बनलक सिकलसेल अस्पताल प्रयोग विहीन बनल बा ।
बर्दिया बाँके, कैलाली, कञ्चनपुर, दाङ, कपिलवस्तु व रुपन्देहीमे जटिल बन्टी गैलक सिकलसेल एनिमियाके उपचार करेक लाग लुम्बिनि प्रदेशमे पहिल फ्यारा निर्माण कैगिलक १५ शैøयाके सिकलसेल एनिमिया अस्पताल बजेट अभावके कारण सञ्चालनमे निआईबेर प्रयोग विहीन बन्लक हो ।
२०७६ सालमे बारबर्दिया नगरपालिकाके तत्कालिन नगर प्रमुख दुर्गा बहादुर थारुके पहलमे नेपाल स्वास्थ्य अनुसन्धान परिषद् काठमाडौँ २० हजार जहनमे स्किृनिङ करबेर एक प्रतिशत रोगी, ११ प्रतिशत बाहक व १२ प्रतिशत सिकलसेल एनिमियाक बेरम्ह्या डेखपरल पाछे बारबर्दिया नगरपालिकासे निर्माण सुरु कर्लक सिकलसेल एनिमिया अस्पताल बजेट अभाव हुईलक कारण सञ्चालनमे आई नैसेकल हो । पूर्वाधार निर्माणके लाग नगरपालिका भवन तयार करलेसेफे भवनमे आवश्यक पर्ना जनशक्ति व उपकरणके अभावमे अस्पताल सञ्चालन र्हुई नैसेकल हो ।
बर्दिया लगायत मेह्रमेह्रीक तराईके जिल्लामे सिकलसेल ऐनिमिया फैलटी जाईबेर बेरम्हेनके सहज उपचारके लाग निर्माण कैगिलक अस्पताल बजेट अभावसे सञ्चालन करे नैसेक्लक बारबर्दिया नगरपालिकाके नगर प्रमुख छविलाल थारु बटैलै । आव फे सिकलसेल एनिमियाक बेरम्हेनके लाग छुट्टे अस्पताल नैहुईबेर नगर अस्पताल वा सदरमुकाम गुलरिया पुगके सेवा लेहेपर्ना बाध्यता रहल बा ।
भवन निर्माण हुईलसेफे ओहिम आवश्यक जनशक्ति व उपकरणक लाग बरा धनराशि खर्च हुईना हुईल पाछे बारबर्दिया नगरपालिका प्रदेश व संघीय सरकारमे आवश्यक सहयोग कैना अर्जि कर्लक बारबर्दिया नगरपालिकाके निमित्त प्रमुख प्रशासकीय अधिकृत टिकानाथ गोसाई जानकारी डेले बटै ।
