समाज रुपान्तरण समन्वय सहकार्यसे केल हुईः गाउँपालिका उपाध्यक्ष
पहुरा समाचारदाता
हसुलिया, १५ जेठ । कैलाली जिल्लाके कैलारी गाउँपालिकामे मेलमिलाप सम्बन्धी सरोकारवालासंग अन्तरक्रिया कार्यक्रम कैगिल बा ।
कैलारी गाउँपालिका न्यायिक समिति हसुलिया, कैलालीके आयोजनामे मेलमिलापकर्ता, भल्मन्सा, वडा कार्यालयके सचिव ओ सुरक्षाकर्मीहुकनके सहभागितामे मेलमिलाप सम्बन्धी अन्तरक्रिया कैगिल हो । गाउँपालिका उपाध्यक्ष तथा न्यायिक समितिके संयोजक भगवतीकुमारी चौधरीके अध्यक्षतामे हुइल कार्यक्रममे सम्बोधन करटी उहाँ समाज रुपान्तरण ओ विकासके समन्वय सहकार्य आवश्यक रहल बटैली ।
उहाँ कहली, ‘न्यायके क्षेत्रमे मेलमिलापकर्ता, भल्मन्सा, वडा कार्यालयके सचिव ओ सुरक्षाकर्मीहुकनके भारी योगदान रहल बा । विना सहकार्य समन्वय समाज रुपान्तरण ओ विकास हुई नैसेकी । सरोकारवाला निकायमे आ आपन ओरसे न्याय हेर्ना कैजाइठ ।’
स्थानीय तहके सक्कु वडामे मेलमिलाप केन्द्रामे मेलमिलापकर्ताहुक्रे विवाद मिलैना करल बटै । न्यायिक समितिसे ढेर बजेट नैरहल ओरसे उ बाफत संचारखर्च कहिके व्यवस्था करल बा । ४८ घण्टे तालिमफे डेहल उहाँ बटैली ।
उहाँ कहली, ‘गाउँघरमे हुइना विवाद सुरुमे भल्मन्साके ठेन पुगठ । गाउँघरमे मिल्ना विवाद भल्मन्सामार्फतफे मिलाजाइठ । उ परम्परासे चल्टीफे आइल बा । आ–आपन अधिकार क्षेत्रधिकार भिटर पर्ना विवाद मिलाई सेक्जाई । न्यायिक समितिमे दर्ता हुइना विवाद मेलमिलाप केन्द्रमे पठैना करल बा । ढेर विवाद ओहे समाधान हुइना करल बा । कलेसे वहाँ नैमिल्ना विवाद न्यायिक समितिसे मिलैना करल बा ।’
न्यायिक समितिमे आइल विवादहे हाली मिलैना मिलैना प्रसास करल मने दुसरा पक्ष विपक्षमन्से एक पक्ष नैआके कबु कबु ढिलाई हुइटी रहल उहाँ बटैली ।
विवाद मिलैनामे सहजुल होए कहटी मेलमिलापकर्ताहुकन ४८ घण्टे तालिम प्रदान कैगिल हो । भल्मन्साहुकनफे तालिम प्रदान करैना उहाँ बटैली ।
अन्तरक्रिया कार्यक्रममे भल्मन्साहुक्रे मेलमिलाप केन्द्रहे थप प्रभावकारी बनैना अपनेहुक्रे कानूनी परामर्श पैलेसे मजा हुइना बटैले रहिट । मेलमिलापकर्तासे प्रदान कैना सेवा सुविधाबारे सर्वसाधारणहुकन जानकारी कराई पर्ना, मेलमिलापकर्तासे भल्मन्साहुकनसंग समन्वय कैना आग्रह करल रहिट ।
मेलमिलापकर्ताहुक्रे विवाद मिलैना क्रममे एक पक्ष नैआडेना, व्यवस्थापनसहितके अलग कोठा नैरना, मिलल विवाद फेरसे दोहरैना, संचार, यातायातके आर्थिक अभाव, गाउँघर हुइना विवाद भल्मन्साहुक्रे न्यायिक समितिमे नैपठैना अवस्था रहल बटैले रहिट ।
मेलमिलाप सम्बन्धी सरोकारवालासंग अन्तरक्रियामे प्राकृतिक स्रोत द्वन्द रुपान्तरण केन्द्रके सुदूरपश्चिम प्रदेश संयोजक बल्लु चौधरी ओ जंगबहादुर चौधरी सहजीकरण करल रहिट । कार्यक्रमके संचालन कैलारी गाउँपालिका न्यायिक समितिके अधिकृत मञ्जु अधिकारी करल रहिट । ओ स्वागत मन्तव्य समितिके सदस्य हरिद्वारी चौधरी करल रहिट ।
कार्यक्रममे समितिके सदस्य तथा वडा नम्बर १ के वडा अध्यक्ष धोजहरिपाल बोहरा, वडामे रहल मेलमिलाप केन्द्रके संयोजक तथा सदस्यहुक्रे, वडा कार्यालयके सचिवहुक्रे, भल्मन्साहुक्रे, प्रहरीके सहभागिता रहल रहे ।
