कैलारीसे एसइइमे ३.६ जिपिए ल्यनुइयाहे विद्यार्थीनहे ५० हजार ओ ४ जिपिए ल्यनुइयाहे एक लाख रुप्या पुरस्कार डेना निर्णय

पहुरा समाचारदाता
हसुलिया, १६ जेठ । कैलाली जिल्लाके कैलारी गाउँपालिकासे सामुदायिक विद्यालयमे अध्ययन करुइया विद्यार्थी एसइइ परिक्षामे उत्कृष्ट अंक ल्यन्लेसे विद्यार्थी ओ विद्यालयहे पुरस्कृत कैना निर्णय करल करले बा ।

कैलारी गाउँपालिकाके जेठ ५ गतेक बैठल कार्यपालिकाके निर्णय अनुसार ३.६ जिपिएसे ढेर ४ जिपिएसे कम ल्यनुइया विद्यार्थीनहे ५० हजार रुप्या पुरस्कार डेना जनैले बा । ४ जिपिए ल्यनुइया विद्यार्थी १ लाख रुप्या पुरस्कार डेना निर्णय हुइल गाउँपालिका अध्यक्ष राजसमझ चौधरी जनैलै ।

ओस्टेक सामुदायिक विद्यालय ओर कक्षा ८, १० ओ १२ मे मजा नतिजा ल्यन्ना विद्यालयहे क्रमश रु १५ हजार, २० हजार ओ २५ हजार नगद तथा सम्मानपत्र डेना निर्णय हुइल उहाँ जनैलै ।

ओस्टे संस्थागत विद्यालयसे कक्षा ८, १० ओ १२ मे मजा नतिजा ल्यन्ना विद्यालयहे क्रमश १० हजार, १५ हजार ओ २० हजार नगद रुप्या ओ सम्मानपत्र डेना निर्णय हुइलफे गाउँपालिका अध्यक्ष जनैलै । गाउँपालिकासे विद्यार्र्थीनहे प्रोत्साहन करेक लाग पुरस्कृत कैना निर्णय करल जनैलै ।