चैतन्य टिसरा प्रदेश स्तरीय तेक्वान्दो प्रतियोगिता सम्पन्न टिम कैलाली पहिल
पहुरा समाचारदाता
धनगढी, १७ जेठ । शिक्षा ओ संस्कारके संगम चैतन्य पाठशालाके भगेनि संस्था चैतन्य तेक्वान्दो डोजाङसे आयोजना करल चैतन्य टिसरा प्रदेश स्तरीय तेक्वान्दो प्रतियोगिता सम्पन्न हुइल बा । जेठ १५ गते से सुरु हुइल प्रतियोगिता शनिच्चर पाठशालाके फुटसलमे एक भव्य कार्यक्रमके विच सम्पन्न हुइल हो ।
चैतन्य ग्रुप अफ कम्पनीके अध्यक्ष गणेश प्रसाद जोशीके सभापतित्वमे सम्पन्न कार्यक्रममे ओलम्पियन तथा राष्ट्रिय खेलकुद परिषद् (राखेप) के राष्ट्रिय टिम तयारी निर्देशक दीपक विष्टके प्रमुख आतिथ्यता ओ नेपालके राष्ट्रिय क्रिकेट टिमके पूर्व प्रमुख प्रशिक्षक जगत् टमटाके विशिष्ट आतिथ्यता रहे ।
कार्यक्रममे सुदूरपश्चिमके प्रत्येक जिल्लाके एक एक टिम ओ आयोजक समूहके दुई टिम करके ११ टिमके सहभागिता रहे । प्रतियोगितामे २४ जाने निर्णायक (रेफ्री) प्रतिस्पर्धामे निर्णायकके भूमिकामे रहिट । प्रतियोगितामे ७ स्वर्ण ५ काश्य करके १२ पदक सहित प्रथम हुइना सफल टिम कैलाली नगद ५० हजार ट्रफी मेडल ओ प्रमाणपत्र सहित सम्मान करल हो । ६ स्वर्ण ३ रजत ओ ४ काश्य करके १३ पदक प्राप्त करटी दुसरा हुइना सफल टिम कञ्चनपुरहे नगद ३० हजार ट्रफी मेडल ओ प्रमाण पत्र सहित सम्मान करल हो । २ स्वर्ण ७ रजत ओ २ काश्य सहित ११ पदक प्राप्त टिम आयोजकसे नगद २० हजार नगद ट्रफी मेडल ओ प्रमाणपत्र सहित सम्मान करल हो ।
साथे प्रतियोगिताके उत्कृष्ट पुरुष फाइटर अन्तरगत टिम कैलालीके डिल्लीराज जोशी ओ महिला फाइटरमे आयोजकसे रोशनी बडालहे ट्रफी मेडल ओ नगद ५ हजार सहित सम्मान करल बा ।
समापन कार्यक्रमे बोल्टी राष्ट्रिय खेलकुद परिषद् (राखेप) के राष्ट्रिय टिम तयारी निर्देशक दीपक विष्ट सुदूरपश्चिममे पहिल चो सेन्सर सिस्टमसे आयोजना करल यी खेलसे खेलाडी निर्णायकहुकनहे समेत नयाँ अनुभव हुइल बटैलै । देशके माया ओ खेलप्रतिके माया हुइल जैसिन अवस्थामेफे खेले सेक्ना ओ सफल हुइना कहाई प्रस्तुत करलै । उहाँ कहलै “विद्यालय स्तरमे यैसिन कार्यक्रम हुइना खेल क्षत्रके लाग भारी अवसर हो । यिहीसे नयाँ खेलाडीके उत्पादन ओ पुराना खेलाडीहे अवसर समेत प्रदान करी ।’
ओस्टे कार्यक्रमके सभापति समेत रहल चैतन्य ग्रुप अफ कम्पनीके अध्यक्ष गणेश प्रसाद जोशी चैतन्य पाठशाला केवल विद्यार्थीनहे किताबके पानामे रहल शब्दसे वृहत् रूपमे ओ विद्यार्थीके समग्र विकासमे केन्द्रित रहल बटैलै । उहाँ कहलै “चैतन्य पाठशाला समाजके सारथीके रूपमे आघे बह्रना प्रयासमे रहल बा । समाजमे रहल आर्थिक अवस्था कमजोर रहल ओ शिक्षाके पहुँच बाहेर रहल विद्यार्थीहे चैतन्यसे विशेष ग्राह्यता डि ।’ साथे उहाँ चैतन्यसृ खेलकुद ओ अन्य क्षेत्रमे समेत सहयोग ओ सहकार्य करटी आइल, अइना दिनमे निरन्तरता डेना बटैलै ।
कार्यक्रमके अवसरमे चैतन्य पल्स टु क्रिकेट प्रतियोगिता समेत सम्पन्न करल बा । कार्यक्रमके विशिष्ट अतिथि नेपालके राष्ट्रिय क्रिकेट टिमके पूर्व प्रमुख प्रशिक्षक जगत् टमटाके सहभागितामे सम्पन्न कार्यक्रममे क्रिकेटमे पहिल हुइना सफल टिम चैतन्य पाठशालाहे नगद १० हजार ट्रफी मेडल प्रमाण पत्र सहित सम्मान करल बा ।
