उपचारमे ५० प्रतिशत छुटके व्यवस्था कैना माग

पहुरा समाचारदाता
धनगढी, १८ जेठ । नेपाल पत्रकार महासंघ कैलाली शाखा सञ्चार क्षेत्रके टमान माग रख्टी सुदूरपश्चिम प्रदेशके सामाजिक विकासमन्त्री मेघराज खड्काहे मागपत्र बुझाइल बा ।

अँट्वारके महासंघ कैलाली शाखाके अध्यक्ष श्रवण देउवा सहितके नेतृत्वमे गैल कैलालीके पत्रकारहुक्रनके टमान पेशागत संगठनके टोलीसे मन्त्री खड्का सहित मन्त्रालयके सचिव हेमराज रेग्मीहे संयुक्त रुपमे चार बुँदे माग बुझाइल हुइट । प्रदेश सरकार मातहतके अस्पतालमे पत्रकारनके उपचारमे कम्तीमे ५० प्रतिशत छुट डेना व्यवस्था कैना माग करल बा ।

ओस्टके, पत्रकारहुक्रनके लाग स्वास्थ्य सम्बन्धि क्षमता विकास कैना तालिम, गोष्ठी सञ्चालन कैना बजेट विनियोजन करे पर्र्ना, स्वास्थ्य, शिक्षा, खेलकुद, श्रम आदि विषयमे पत्रकारहे फेलोसिपके कार्यक्रम बजेटमे समावेश करे पर्ना ओ पत्रकारहुक्रनके लाग स्वास्थ्य तथा दुर्घटना बिमाके लाग रकम विनियोजन करे पर्ना मागपत्रमे उल्लेख रहल बा ।

मागपत्र बुझ्टी मन्त्री खड्का महासंघसे राखल माग पूरा करक लाग सेक्नासम सहयोग कैना बटैलै । मागपत्र बुझैना कार्यक्रममे महासंघके पदाधिकारी, जिल्लास्थित पेशागत टमान संगठन प्रेस युनियन कैलालीके अध्यक्ष सिताराम ओझा, प्रेस चौतारी कैलालीके अध्यक्ष जनक बिष्ट, प्रेस सेन्टर नेपाल कैलालीके अध्यक्ष सुरेन्द्र ताम्राकार सहितके पत्रकारनके टोली रहल रहे ।