आर्ग्यनिक उत्पादनहे प्रवर्द्धन जरुरीः गापा उपाध्यक्ष भगवती

पहुरा समाचारदाता
धनगढी, १८ जेठ । कैलारी गाउँपालिकाके उपाध्यक्ष भगवतीकुमारी चौधरी कृषकसे उत्पादित आर्ग्यनिक उत्पादनहे प्रवर्द्धन कैना जरुरी रहल बटैले बटी ।

सामाजिक सेवा अध्ययन केन्द्र धनगढी कैलालीसे कैलारी गाउँपालिका वडा नम्बर २ रामपुर दिगो विकास र महिला सशक्तीकरण परियोजना अन्र्तगत सञ्चालित क्रियाकलापके अँटवारके रोज अनुगमनके क्रममे गाउँपालिका स्तरीय अनुगमन समितिके संयोजक तथा गाउँपालिका उपाध्यक्ष यी बाट कहल रहिट ।

दिगो विकास र महिला सशक्तीकरण परियोजना अन्र्तगत कैलारी–२ रामपुरमे आग्र्यानिक पि.जि.एस कृषक समु्ह ओ महिला जागरण पि.जि.एस समु्हसे लगागिल आग्र्यानिक टिना खेतीके अनुगमनके क्रममे उहाँ कृषकसे उत्पादित आग्र्यानिक उत्पादनहे प्रवद्र्धन कैना जरुरी रहल बटाइल रहिट ।

उहाँ कहली, ‘हम्रे रैथाने वाली छोरके लौव लौव बाली लगैना सुरु करले बटी । उत्पादनहे बह्रैना लालचमे रासायानिक मल, किटनाशक औषधीके प्रयोग करटी मने उहीहे हमार शरिरमे पर्ना असरबारे ध्यान जाई छोरल बा ।

रासायानिक मल, किटनाशक औषधीके प्रयोग हमार स्वास्थ्यके लाग मन्द विष हो, गाउँपालिका उपाध्यक्ष कहली, ‘हम्रे आपन शरिरके लाग दिर्घकालिन सोच जाई नैसेकल हो । उहीहे दिर्घरोगीके संख्या बह्रटी बा । रैथाने बाली ओ परम्परागत खेती प्रणालीसे छोरके लौवा प्रविधि ओ प्रयोग हुइना रासायानिक मलके प्रयोग कैना कहल रोगहे निम्ता डेना हो ।

गाउँपालिकासे कृषकसे उत्पादन करल आग्र्यानिक टिनाहे बढवा डेहक लाग हाल हाली पालिकास्तरीय हाट बजार सञ्चालन करे जैटी रहलफे उहाँ जनैली । उ कृषि हाट बजार संचालन हुइलेसे कृषकके आयस्रोतफे बह्रना ओ उपभोक्ताहुक्रे आग्र्यानिक टिना खाई पैना, बचल विक्री कैके बाँचल टिना एक जानेक जिम्मा डेहे थोक व्यापारीहे डेनाफे बाट हुइल गाउँपालिका उपाध्यक्ष बटैली ।
सामाजिक सेवा अध्ययन केन्द्र धनगढी कैलालीसे कैलारी गाउँपालिका वडा नम्बर २ मे दिगो विकास र महिला सशक्तीकरण परियोजना अन्र्तगत सञ्चालित क्रियाकलापससे आग्र्यानिक पि.जि.एस कृषक समु्ह, जनचेतना महिला बचत तथा ऋण सहकारी संस्था लिमिटेडहे फाइदा पुगल बटैली ।

कैलारी गाउँपालिकाके सामाजिक विकास शाखा प्रमुम यगम कलेल बजारमे आग्र्यानिक टिनासेफे विषादीके प्रयोग करल टिना ढेर विक्री हुइटी रहल बटैलै ।

उहाँ कहलै, हमार बानीफे विगर गैल बा । हाट बजार या टिना पसलमे टिना किने गैलबेला जौन टिना सुग्घर, टेलार, सोटैल विल्गाइल ओहरे हमार ध्यान जाइठ । जो डिखटा हे वो विक्टाहे कना हिन्दी उखानफे बा । मने ओसिन टिनामे रासायानिक ओ विषादी प्रयोग करल रहठ । हम्रे आपन स्वास्थ्यके लाग सोच पर्ना बा ।

आग्र्यानिक पि.जि.एस कृषक सुनिता चौधरी ओ उजेली चौधरी अपनेहुक्रे विना रासयानिक मलके प्रयोग जैविक मल ओ जैविक विषादीके प्रयोग करके टिना उत्पादन करटी रहल बटैलै ।

कृषक उजेली कहली, ‘हम्रे आग्र्यानिक विधिसे टिना खेती कैठी । हमार आग्र्यानिक उत्पादन भारतसे अइना विषादीयुक्त टिनासे प्रतिस्पर्धा कैना कर्रा रहठ मने, उपभोक्ताहे बुझाके विक्री करेबेर हमार टिनाहे मन परैठै ।

कृषक सुनिता चौधरी आग्र्यानिक विधिसे उत्पालन करल टिना विक्री कैनामे कौनो समस्या नैरहल बटैली । उहाँ कहली, आग्र्यानिक विधिसे उत्पादन कैना टिना हम्रे अपनेफे खेठी, विक्रीफे कैठी, मानव स्वास्थ्यहे मध्य नजर करके जैविक मल ओ जैविक विषादीके प्रयोग करके उत्पादन करल टिना जहाँफे माग रहठ ।

ओस्टेक सचेत पिजिएस समुह, गौरी गणेश पिजिएस समुह, चेतना पिजिएस समुह, सृष्टि पिजिएस समुह, संघर्षशिल पिजिएस समुहलगायत ७ ठो पिजिएस समुह कैलारी–२ मे आग्र्यानिक टिना खेती करटी रहल बटै ।

अनुगमनके क्रममे जनचेतना महिला बचत ऋण सहकारी संस्थाके व्यवस्थापक उजेली चौधरी सामाजिक सेवा अध्ययन केन्द्र धनगढी कैलालीसे दिगो विकास र महिला सशक्तीकरण परियोजना अन्र्तगत सञ्चालित क्रियाकलापबारे ओ सहकारीसे संचालन करल गतिविधि जानकारी डेहल रहिट । उ परियोजना सहकारीके आघे बह्रैना मजा भूमिका निर्वाह करल कहटी सहकारी ओ पिजिएस समुहहे आघे बह्रना मौका मिलल बटैली ।

अनुगमनमे कैलारी गाउँपालिका स्तरीय अनुगमन समितिके संयोजक भगवतीकुमारी चौधरी, सामाजिक सेवा अध्ययन केन्द्र धनगढी कैलालीके परियोजना संयोजक भक्तबहादुर खाती, परियोजना अधिकृत केशवराज घिमिरे, कृषि प्राविधिक आशिष थानी, कैलारी गाउँपालिका सामाजिक विकास शाखा प्रमुख यगम कलेल, वडा नम्बर २ के वडा अध्यक्ष विकास चौधरी, वडा नम्बर ६ के वडा अध्यक्ष प्रेमबहादुर चौधरी, अनुगमन समिति सदस्य तथा कार्यपालिका सदस्य लालबहादुर विक, सुनिला चौधरी, योजना शाखा प्रमुख सन्तोषकुमार चौधरी, कृषि शाखा प्रमुख मैया चौधरीलगायत जनचेतना महिला बचत ऋण सहकारी संस्था प्रदाधिकारी, शेयर सदस्य, कृषक समुहके सहभागिता रहे ।

अनुगमन संगे आग्र्यानिक खेतीहे निरन्तरता डेहे पर्ना, जैविक मलमे आत्मनिर्भरके लाग पहल करेपर्ना, आग्र्यानिक खेतीके क्षेत्रफल वृद्धि करके बजारीकारणके लाग पहल कैना, कृषकहुकनहे आग्र्यानिक खेतीकेबारेमे जानकारी कराई पर्ना, बालबालिका, यूवा, महिला संजाल गठन करके समुदायमे बह्रटी रहल नकारात्मक प्रभावहे न्यूनिकरणके लाग पहल करेपर्ना, बाल संजाल गठन करके बालविवाह, लागु औषध दुव्र्यशनी न्यूनिकरणमे लागे पर्ना, महिला संजाल मार्फत घरेलु हिंसा, लैङिक हिंसा न्यूनिकरणमे लागे पर्ना समिक्षाफे कैगिल बा ।