धनगढीमे अत्यधिक विषादीयुक्त २ हजार किलोसे ढेर आम नष्ट
पहुरा समाचादाता
धनगढी, १८ जेठ । कैलालीके धनगढी उपमहानगर पालिकामे दुई हजार २ सय ६७ किलोग्राम आम नष्ट करल बा ।
अँटवार करल परीक्षणमे धनगढीस्थित सहिद गेट कृषि उपज थोक बजारमे रहल जय श्री मा जानकी स्टोरमे धारल आम नष्ट करल हो । सन्जित साहके उ स्टोरसे विषादीके मात्रा अत्यधिक रहल अखाद्य आम नष्ट करल धनगढी उपमहानगरपालिकाके उपभोक्ता हित संरक्षण शाखा प्रमुख महेश मल्ल बटैलै ।
अँटवार धनगढीके थोक बजार तथा मण्डीसे टिना तथा फलफूलके १५ नमुना संकलन करके विषादीके अवशेष परीक्षण करल हो मल्ल कहलै, ‘भिन्डी, खिरा टमाटर, करेला, केरा, अङ्गुर, स्याउ, अनार ओ आममे विषादी परीक्षण करलमे आममे विषादीके मात्रा ढेर डेखल ओ उ खान अयोग्य आम बरामद करके नष्ट करल हो ।
धनगढी उपमहानगरपालिकाके संयोजनमे खाद्य प्रविधि तथा गुण नियन्त्रण कार्यालय धनगढी ओ विषादी अवशेष द्रुत विश्लेषण प्रयोगशाला अत्तरिया, जिल्ला प्रशासन कार्यालय, नेपाल प्रहरी लगायत सरोकारवालाहुकनके संयुक्त अनुगमनमे सहिद गेट कृषि उपज थोकबजार, दक्षिणकाली मार्ग सब्जीमन्डी ओ धनगढी चौराहास्थित हाट बजारसे टिना तथा फलफूलके नमुना संकलन करके परीक्षण करल हो ।
अँटवार करल द्रुत परीक्षणके क्रममे भारतसे आयात करल फलफूल मध्ये आममे विषादीके अवशेष अत्यधिक मात्रामे भेटल खाद्य प्रविधि तथा गुण नियन्त्रण कार्यालयके प्रमुख हरेराम प्रधान बटैलै । उहाँ अन्य टिना ओ फलफूलमे विषादीके अवशेष सामान्य रहलेसेफे आममे विषादीके मात्रा उच्च रहल ओरसे खान अयोग्य ठहर करके उ आम नष्ट करल बटैलै ।
