महिला स्वरोजगारके लाग ढकिया बनैना तालिम

पहुरा समाचारदाता
जोशीपुर, २० जेठ । कैलालीके जोशीपुरमे महिला हुक्रन स्वरोजगार बनैना उद्देश्यसे ढकिया बनैना तालिम सुरु हुईल बा ।

“आजके सीप काल्हके सफलता” कना मुल नारा रहल तालिममे परम्परागत विधि प्रयोग कैके आधुनिक ढकिया बनाके महिलन स्वरोजगार ओ व्यवसायिक बनैना उद्देश्यसे तालिम संचालन करल महिला शाखा प्रमुख कल्पना मिश्र बटैली । उ तालिममे कलमदानी, खुत्रुके, चिया ट्रे, ज्वैलरी बक्स, हटकेस, फुलदानी जैसिन दैनिक जीवनमे प्रयोग हुईना आकर्षक सामानफे बनाजिना बटैली ।

ओस्टेक सीपहे आयआर्जनसंग जोरे पर्ना वडा नं. ७ के अध्यक्ष बमबहादुर शाह बटैलै । यहाँ कहलै, “सीप सिखके कुछ आर्थिक समृद्धि करेसेक्ना हो तर पालिकासे प्रत्येक वरष हुईना तालिम सीप तालिममे केल सिमित रहल कुछ उपलब्धी नैडेखल हुईलेक वरसे सीप सिख्के व्यवसायिक तरिकासे काम कैना उद्देश्य लैके तालिम संचालन करल हो ।”

जोशीपुर गाउँपाकिा उपाध्यक्ष रेखादेवी कठरिया पहिले मुक्तकमैया महिलाहुक्रन यी तालिम डैगिल रहे मने उपलब्धी मूलक नैदेखगिल बटैली । उहाँ कहली, ‘यी वरष साविक महिला विकास कार्यालयसे गठन कैगिल महिला समूह, समिति ओ सहकारीके महिला हुक्रन तालिम डैजाईटा । यकर जिम्मेवारी महिला समूह, समिति ओ सहाकारीहे लेहक परि ओ बनाईल उत्पादनके बजारीकरणके लाग महिला शाखा ओ पालिकाके पहल ओ प्रयास रही ।”

ढकिया बनैना तालिमके लाग आवश्यक पर्ना पुंजा, मुंज, छेड्ना लगायतके बस्तु हेरैटी गैल वरसे यकर संरक्षण करेपर्नाफे उपाध्यक्ष कठरिया बटैली । महिलाहुक्रे घरके काममे केल सिमित नैहोके सीप सिख्के आर्थिक समृद्धि हुईना काम अब्बेक समयमे कर्ना जरुरी रहलफे वहाँ बटैलै ।

जोशीपुर गाउँपालिका महिला बालबालिका जेष्ठ नागरिक शाखाके आयोजनामे हुईल तालिममे साविक महिला विकास कार्यालयसे गठन कैगिल महिला समूह समिति ओ सहकारीके ३० जाने सहभागि महिला हुक्रन सीप विकास अन्तरगत ढकिया बनैना तालिम डेहे लागल हो ।