लगानी सम्मेलनसे आर्थिक विकासमे टेवाः परराष्ट्र मन्त्री राणा

पहुरा समाचारदाता
धनगढी, २० जेठ । परराष्ट्र मन्त्री डा. आरजु राणा देउवा लगानी सम्मेलनसे सुदूरपश्चिमके आर्थिक विकासमे महत्वपूर्ण भूमिका खेल्ना बटैले बटी ।

सुदूरपश्चिम प्रदेश सरकारसे आयोजना करल लगानी सम्मेलनमे सहभागी हुइक लाग धनगढी पुगल परराष्ट्र मन्त्री राणा धनगढी विमानस्थलमे सञ्चारकर्मीनसँग संक्षिप्त प्रतिक्रिया डेटी लगानी सम्मेलनसे सुदूरपश्चिमके विकासमे टेवा पुग्ना बटाइल हुइटी ।

उहाँ लगानी सम्मेलनसे सुदूरपश्चिममे बरवार विकासके योजना निर्माणमे महत्वपूर्ण भूमिका खेल्ना बटैली । उहाँ कहली, ‘सुदूरपश्चिम प्रदेश सरकारके परिकल्पनामे लगानी सम्मेलनके आयोजना करले बा, जेम्ने सुदूरपश्चिम प्रदेशसे प्रतिनिधित्व करुइया केन्द्र सरकारके मन्त्रीहुक्रनके सहयोगी भूमिका रहना बावै ।’

उहाँ सुदूरपश्चिमसे प्रतिनिधित्व करुइया केन्द्रीय सरकारके मन्त्रीहुक्रे सुदूरपश्चिममे लगानी भिœयाइना भूमिका खेल्नामे समेत विश्वास व्यक्त करली । सुदूरपश्चिममे लगानीके लाग प्रचुर सम्भावना रहल ओरसे टमान क्षेत्रसे निजी लगानीके लाग व्यवसायी ओ दातृ निकाय उत्साहित हुइल बटैली ।

उहाँ लगानी सम्मेलनसे दातृ निकाय ओ निजी व्यवसायीहे सुदूरपश्चिममे भिœयाइ लागलमे खुसी व्यक्त करली । विदेशी लगानीकर्ता ओ एनआरएनसे लगानी करक लाग इच्छा व्यक्त कैना सुदूरपश्चिमके लाग सकारात्मक रहल बटैली । उहाँ पाछेक समयमे नेपालमे लगानी करुइयनके संख्यामे वृद्धि हुइ लग्लेसे फेन सरकारी ऐन कानुनके कारण कुछ कठिनाई हुइना करल बटैटी मन्त्री राणा ऐन कानुन परिमार्जन कैके लगानीमैत्री कानुन निर्माण करे पर्नामे जोड डेली ।

सुदूरपश्चिममे अथाह जलस्रोत रहल बटैटी उहाँ कहली, ‘यहाँके जलस्रोतके सदूपयोग कैके लगानी करे सेकल खण्डमे सुदूरपश्चिम आर्थिक रुपमे समृद्ध हुइना निश्चित बा ।’

सुदूरपश्चिममे पर्यटन, जलस्रोत, कृषिके साथे उद्योग क्षेत्रमे लगानी कैना उहाँ सक्कु दातृ निकाय तथा निजी क्षेत्रके व्यवसायीहे आग्रह करले बटी । कञ्चनपुरके विपिन जोशीके अवस्थाबारे सञ्चारकर्मीसे पुछल प्रश्नमे परराष्ट्र मन्त्री राणा हालसम अवस्था अज्ञात रहल ओरसे सकूशलके कामना कैटी कूटनीतिक पहल जारी रहल बटैली ।

सुदूरपश्चिम प्रदेश सरकारसे आयोजना करे लागल लगानी सम्मेलनमे सहभागी हुइ धनगढी पुगल परराष्ट्र मन्त्री राणालगायत सुदूरपश्चिम प्रदेशके मुख्यमन्त्री कमलबहादुर शाह, मन्त्री, विदेशी नियोगके अधिकारी ओ लगानीकर्ता कञ्चनपुर क्षेत्रके फिल्ड अवलोकन कैना कार्यक्रम रहल बा ।

अवलोकनके क्रममे दोधरा चाँदनीके सुख्खा बन्दरगाह, शुक्लाफाँटा राष्ट्रिय निकुञ्ज, बेदकोट औद्योगीक क्षेत्र लगायतके क्षेत्रके अवलोकन कैके लगानीके सम्भावना पहिचान कैना कार्यक्रम रहल सुदूरपश्चिम प्रदेश नीति आयोगके सदस्य नृपबहादुर सुनार जानकारी डेलै ।