महिला आत्मनिर्भर हुइलेसे केल्ह महिला शसक्तीकरण हुईः गाउँपालिका उपाध्यक्ष भगवती

पहुरा समाचारदाता
हसुलिया, २१ जेठ । कैलाली जिल्लाके कैलारी गाउँपालिकामे उपाध्यक्ष समावेशी कार्यक्रम अन्र्तगत टिसरा तहके एक महिने निशुल्क सिलाई कटाई तालिम सम्पन्न हुइल बा ।

कैलारी गाउँपालिकाके सहयोगमे तथा शसक्त आवाज महिला संस्थाके कैलारी गाउँपालिका हसुलिया कैलालीके आयोजनामे उपाध्यक्ष समावेशी कार्यक्रम अन्र्तगत एक महिने तालिम संचालन कैगिल रहे ।

शसक्त आवाज महिला संस्थाके अध्यक्ष गीता चौधरीके अध्यक्षतामे हुइल कार्यक्रममे गाउँपालिका उपाध्यक्ष भगवतीकुमारी चौधरी प्रमुख अतिथि रहल रहिट । कार्यक्रममे सम्बोधन करटी उहाँ महिला आत्मनिर्भर हुइलेसे केल्ह महिला शसक्तीकरण हुईना बटैली ।

यी तालिम महिलाहुकनहे आर्थिक रुपमे बल्गर बनाइक लाग संचालन कैगिल हो, गाउँपालिका उपाध्यक्ष कहली, ‘एक÷ दुई लेवल लेके घरमे सिलाई कटाई करटी रहुइयाहे समावेश कैगिल बा । सिलाई कटाईमे निखार आगिलेसे सफल उद्यमी बने सेक्जाईठ । अडर अनुसार ग्राहकमे मन जिटना लुगरा सिए जन्लेसे जहाँफे तयारी पोषक, पहिरनके उद्योग संचालन करे सेक्जाईठ ।’

उहाँ कहली, ‘गाउँपालिकासे महिला उद्यमी तयार कैना सोच लेके आघे बह्रल बा । महिलाहुक्रे मजा सिए जन्लेसे प्रशिक्षकके रुपमे तयार हुइलेसे कहुसे प्रशिक्षक ल्याने नैपरी, बल्की बाहेरसे माग हुइलेसे उल्टे यहाँसे पठाई सेक्जाई ।’
कार्यक्रममे विशिष्ट पहुनामे सामाजिक सेवा अध्ययन केन्द्र कैलालीके परियोजना संयोजक भक्तबहादुर खाती, वडा नम्बर ३ के वडा सदस्य शकुन्तला चौधरीलगायतके सहभागिता रहे ।

तालिममे एक÷दुई तहके सिलाई कटाई सिख्के व्यवसाय करटी रहल ओ ओइनके सिलाईमे ठप सफाई ल्यानेक लाग सक्कु वडाके व्यवसायी महिलाहुकनहे समावेश करल रहे । तालिममे चम्पा बोहरा प्रशिक्षण डेहल रही ।