उपमहानगरपालिकासे बेहडाबाबा मेला जैना निःशुल्क बस सेवा

पहुरा समाचारदाता
धनगढी, २१ जेठ । गंगा दशहरामे लग्ना बेहडाबाबा मेलाके लाग धनगढी उपमहानगरपालिकासे निःशुल्क बस सेवा सञ्चालन कैना जनैले बा ।

मेला हेरे जैना सर्वसाधारणके सुविधाके लाग निःशुल्क बस सेवा सञ्चालन करे लागल हो । धनगढी –१६ मे रहल बेहडाबाबा मेलाके जेठ २२ गते मुख्य दिन हो । मन्दिर दर्शन करे जउइया सर्वसाधारणहे सुविधा होए कहिके निःशुल्क बस सेवा सञ्चालन करे लागल नगर प्रमुख गोपाल हमाल बटैलै । उहाँ यात्रुके सुविधाके लाग धनगढी –१७ शिवगंगा लडियासे बेहडाबाबा मन्दिरसम बुधके रात १२ बजेसे बिफे साँझसम तीर्थालु भक्तजनहुकनके सहजताके लाग निःशुल्क बस सञ्चालन कैना बटैलै ।

बेहडाबाबा मन्दिर जैना सडक साकिर हुइल ओरसे यात्रुहुक्रे जाममे पर्ना समस्या समाधान कैना निःशुल्क बस सेवा प्रदान कैना नगर प्रमुख हमाल बटैलै । नगर बससे सर्वसाधारणे निःशुल्क बस सेवा डेना नगर प्रमुख हमाल भिडियो सन्देशमार्फत जानकारी डेलै ।

गंगादशहराके अवसरमे टमान स्थानीय तहसे स्थानीय विदा

जेठ महिनाके शुक्लपक्ष दशमी तिथिमे मनैना गंगा दशहराके टमान स्थानीय तहसे सार्वजनिक विदा डेहल बा ।

गंगा दशहराके अवसरमे २२ गते स्थानीय टमान स्थानीय तहसे गंगा दशहराके विदा डेगिल हो । धनगढी उपमहानगरपालिका, कैलारी गाउँपालिका, वेलौरी नगरपालिका, लालझाँडी गाउँपालिकासे स्थानीय विदा डेहल बा । ओम्ने मन्से लालझाँडी गाउँपालिकासे भर २२ ओ २३ गते स्थानीय विदा डेहल बा ।

कैलारी गाउँपालिकासे बुधके रोज सार्वजनिक सूचना जारी करटी हरेक बर्ष जेठ महिनाके शुक्लपक्ष दशमी तिथिके दिन मनैना गंगा दशहरा हमार ठाउँके ऐतिहासिक वा धार्मिक पर्वके रुपमे विशेष आस्था ओ महत्वके साथ मनैटी रहल ओरसे जेठ २२ गते (विफेक रोज) एक दिन सार्वजनिक विदा डेहल हो ।

विफेक रोज गाउँपालिका, वडा कार्यालय, स्वास्थ्य संस्था, विद्यालय, बैक तथा वित्तीय संस्थामे सार्वजनिक विदा डेहल निमित्त प्रमुख प्रशासकीय अधिकृत गणेश प्रसाद मिश्रसे हस्ताक्षरित सूचनामार्फत जानकारी डेहल बा ।
ओस्टेक करके लालझाडी गाउँकार्यपालिकाके जेठ १९ गतेक निर्णयानुसार जेठ २२ ओ २३ गतेक दिन (अत्यावश्यक सेवा बाहेक) स्थानीय सार्वजनिक बिदा डेना निर्णय करल जनैले बा ।

जेठ महिनाके शुक्लपक्ष दशमी तिथिके दिन मनैना गंगा दशहरा मेला यी क्षेत्रके ऐतिहासिक पर्वके रुपमे सक्कु समुदायसे विशेष आस्था ओ महत्वके साथ मनैना करल लालझाडी भकुण्डा स्थित कालेश्वर महादेव नक्टाबाबा मन्दिर ओ रामलक्ष्मण वाटीकामे समेत मेला लग्ना हुइल ओरसे विदा डेना निर्णय हुइल गाउँपालिका अध्यक्ष निर्मल रानासे हस्ताक्षरित सूचनामार्फत जानकारी डेहल बा ।

गाउँपालिका भर गंगा दशहरा मेलाके पावन अवसरमे सक्कु लालझाडी गाउँवासीमे सुख, शान्ती ओ भाइचाराके हार्दिक मंगलमय शुभकामना व्यक्त करटी लालझाँडी अन्तर्गतके सक्कु सरकारी कार्यालय, शिक्षण संस्था एवं संघ संस्थामे विदा रना जनागिल बा ।