आठ मोटरसाइकलसहित चोरीमे संलग्न ४ जाने पक्राउ

पहुरा समाचारदाता
धनगढी, २२ जेठ । कैलालीके टमान ठाउँसे ८ ठो मोटरसाइकलसहित चोरीमे संलग्न ४ जाने पक्राउ परल बटै ।

जेठ २० गते कैलाली घोडाघोडी नगरपालिका वडा नं. ०१ लोहारपुर ओ घोडाघोडी जंगल क्षेत्रसे ईलाका प्रहरी कार्यालय सुखडसे प्रहरी नायव उपरिक्षक रमेशदत्त अवस्थीके कमाण्डमे खटल प्रहरी टोलीसे दुई चो चोरी मुद्दामे कैद भुक्तान करके छुटल कैलाली घोडाघोडी नगरपालिका वडा नं. ०२ साडेपानी बैठना बर्ष २२ के मदन सार्की, चोरीमे यिहीसे पहिले एक चो पक्राउ परल कैलाली घोडाघोडी नगरपालिका वडा नं. ०१ लोहारपुर बैठना बर्ष १४ के निराजन शाही पक्राउ परल बटै ।

कैलाली घोडाघोडी नगरपालिका वडा नं. ०१ सुखड बजारस्थित प्रकाश अटो वर्कसपमे काम कैना चोरी करके ल्यानल मोटरसाइकल सस्तामे खरिद करके नाफा लेके औरहे बेच्न कैलाली घोडाघोडी नगरपालिका वडा नं. १० पहलवानपुर बैठना बर्ष २३ के जितेन्द्र चौधरी ओ जिल्ला कैलाली घोडाघोडी नगरपालिका वडा नं. ०१ लक्ष्मीपुर बैठना बर्ष १४ के निराजन शाहीहे कैलाली जिल्ला टमान ठाउँसे चोरी हुइल मोटरसाइकलसहित पक्राउ करल जिल्ला प्रहरी कार्यालय कैलाली जनैले बा । चारु जनहनहे कैलाली जिल्ला अदालतबसे म्याद थप हुके ईलाका प्रहरी कार्यालय सुखडके हिरासतमे धारके थप अनुसन्धान कार्य हुइटी रहल जनाइल बा ।

ओइनसंगे पक्राउ परल यी मोटरसाइकल रहल बा । १. नम्बर प्लेट नैरहल हिरो कम्पनीके सुपर स्पलेण्डर लाल करिया रंग रहल मोटरसाइकल, बजाज कम्पनीके करिया रंगके १२५ सिसिके सु.प.प्र. ०१–०१२ प ९३५८ नम्बर प्लेट टांसल पल्सर मोटरसाइकल, सु.प.प्र. ०१–०११ प १५७८ नम्बर प्लेट टासल मोटरसाइकल, भे ९ प ६९५८ नम्बर प्लेट टांसल पल्सर मोटरसाइकल रहल बा ।
ओस्टेक करके हिरो कम्पनीके सुपर स्पलेण्डर लाल करिया रंग रहल से ५ प १०७२ नम्बर प्लेट टासल मोटरसाइकल, सु.प.प्र.०१–०११ प ४३८ नम्बर प्लेट टासल मोटरसाइकल, सु.प.प्र.०१–००८ प ४१२ नम्बर प्लेट टासल मोटरसाइकल, से.५.प ७१४९ नम्बर प्लेट टासल मोटरसाइकल रहल प्रहरी जनैले बा ।