राज्यके नीतिके कारण अन्तरलिङगी व्यक्तिके पहिचान खुल्न कठिन हुइल गुनासो
पहुरा समाचारदाता
धनगढी,, २३ जेठ । अन्तरलिङगी व्यक्तिहुक्रे अपन पहिचान अनुसार बाँचे पाई नैसेकल जनाइल बा । राज्यके कानूनके कारण ओइने जीवन जिना कठिन रहल शुकके धनगढीमे हुइल कार्यक्रममे जनाइल हो । एकता नेपालके संयोजन ओ क्याम्पेन फर चेन्जके आयोजनामे हुइल कार्यक्रममे यैसिन बताइल हो ।
एक वा एकसे ढेर यौन विशेषता, शारीरिक विविधता (यौन अङ, प्रजनन् अङ क्रोमोजोम वा हार्मोन) सहित जन्मल, महिला पुरुषके परम्परागत ओ सामाजिक परिभाषामे नैमिल्न अन्तरलिङगी व्यक्तिहे ओइनके सहमति नैलेके सल्यक्रिया करके दुःख डेटी रहल पाइल ओरसे ओसिन नैकरके अपन पहिचानअनुसार बाँचे डेहे पर्ना क्याम्पेन फर चेन्ज निर्देशक इशान रेग्मी कार्यक्रममे बटैलै ।
उहाँ बालबालिकाहे उहाँहुकनके रुचि ओ इच्छाके जानकारी नैहुइटी परिवारके दवाबसे कैना शल्यक्रियासे वयस्क अवस्थामे पुग्के अपने कौन पहिचानमे बँच्न कना अन्योल हुइना करल बटैलै । अपने अन्तरलिङगी हुके भोगल समस्या अन्य व्यक्तिसेफे भोग्टी रहल बटैटी उहाँ आत्महत्या कैना वा भिटरे भिटरे दबके बाँच्टी रहल उल्लेख करलै ।
अन्तरलिङगी व्यक्तिके तथ्याङकके अभाव, समाजमे विभेद, लाल्छना, हिंसा हुइना ओ परिवारसे समेत नैस्विकर्ना स्थितिसे अन्तरलिङगी व्यक्तिके मानवअधिकारके हनन् हुइटी रहल उहाँ प्रस्तुतीमे उल्लेख करलै । कानूनी पहिचान हुई पर्ना, जथाभावी शल्यक्रिया कैना प्रवृत्ति विरुद्ध शारीरिक अखण्डता ओ आत्मनिर्णयके अधिकारके सुनिश्चित करेपर्ना उहाँ उहाँ जोड डेलै ।
अन्तरलिङगी हुके जन्मलके आधारमे भेदभाव हिंसा करे नैपैना, गुणस्तरीय ओ समावेशी स्वास्थ्य सेवाके पहुँच हुई पर्ना, अनुसन्धान ओ तथ्याङक संकलन हुईपर्ना, शिक्षा ओ रोजगारीके क्षेत्रमे समान अवसर डेहे पर्ना आवश्यक रहल जनाइल बा ।
जनगणना करेबेर महिला, पुरुष उल्लेख कैना ठाउँमे अन्तरलिङगी व्यक्तिके फे अन्तरलिङगी पहिचान समावेश करेपर्नामे उहाँक जोड बा । जनगणनाके महलमे अन्य उल्लेख करल हुइलेसेफे ओम्ने अन्तरलिङगी पहिचान नैहुइना उहाँ उल्लेख करलै ।
अन्तरलिङगी व्यक्तिहुकनके संख्या जम्मा जनसंख्याके झण्डै २ प्रतिशत रहल उहाँ बटैलै । जेम्ने कुछ विविधता बच्चा जन्मना बेला बाल्यकाल वा किशोरावस्थामे ओ कुछ विविधता वयस्य अवस्थामे बच्चा जन्मना बेला, बाल्यकाल वा किशोरावस्थाम ओ कुछ विविधता वयस्क अवस्थामे पत्ता हुइठ कलेसे कतिपय विविधता कबु पत्ता नैहुइफे सेक्ना उहाँ बटैलै ।
संयुक्त राष्ट्र संघसे सन २०१५ मे जारी करल तथ्याङक अनुसार अन्तरलिङगी ५८ जनहनमे एक जाने अर्थात जम्मा जनसंख्याके १.७ प्रतिशत रहल बा ।
अन्तरलिङगी विविधता रहल व्यक्तिहुकन उप्पर नेपालके टमान अस्पतालमे हुइल अनावश्यक चिकित्सासे अन्तरलिङगी समस्या गुजरटी रहल उहाँ बटैलै ।
ओस्टेक उहाँ अन्तरलिङगी विविधता हुइल व्यक्तिहुकनके अधिकारके मुद्दाबारे जानकारी डेहल रहिट ।
कार्यक्रममे सुदूरपश्चिम प्रदेश सभा सांसद सन्तोषी शर्मा थापा अन्तरलिङगीहुकनके अधिकारके लाग अपन जबफे सहयोग रना प्रतिवद्धता जनैली । मनैनके बाँचे पैना अधिकारहे हनन् करे नैहुइना उहाँ जोड डेली । कार्यक्रमके सहभागिहुक्रे अन्तरलिङगी पहिचानके बारेमे समाज स्पष्ट हुई पर्ना बटैली । कार्यक्रममे ओेरेक नेपालके सचिव संगिता अधिकारी, सामाजिक विकास मन्त्रालय महिला तथा बालबालिका शाखाके प्रमुख जयन्ती गिरी, टिपिओ नेपालके कमला बुढाथोकी, पिसविनके हर्क ओली, डब्लुएचआरके मीना भण्डारी, सचितानन्द जोशीलगायत आ आपन बाट राखल रहिट ।
कार्यक्रमके संचालन एकता नेपालके संस्थापक तथा कार्यकारी निर्देशक राज चौधरी करल रहिट । कार्यक्रममे प्रदेशसभा सदस्य, सरकारी तथा गैर सरकारी संस्थाहुकनके प्रमुख एवं प्रतिनिधिहुकनके सहभागिता रहल रहे ।
