निसर्ग अस्पतालमे ओठ तथा तालु सम्बन्धी निःशुल्क उपचार

पहुरा समाचारदाता
धनगढी, २४ जेठ । धनगढीके निसर्ग हस्पिटल एण्ड रिसर्च सेन्टर प्रालि धनगढीसे स्माइल ट्रेनके सहकार्यमे जन्मजात ओठ ओ तालु काटल समस्या रहल बिरामीके लाग निःशुल्क शल्यक्रिया शुरू करले बा ।

यी सेवा सुदूरपश्चिम प्रदेशमे पहिलचो सञ्चालनमे आइल हो । जिहीसे पश्चिम नेपालके बासिन्दाहे काठमाडौं जाइ पर्र्ना बाध्यतासे मुक्ति प्रदान करल बा । फाटेको ओठ÷प्यालेट एक जन्मजात समस्या हो, जेम्ने ओठ वा तालु काटल रहठ् । यी समस्या प्रत्येक ५०० मध्ये १ जनहनमे डेखजैना ओ शल्यक्रियासे पूर्ण उपचार सम्भव रहल बा । स्माइल ट्रेन, अमेरिकाके गैरनाफामूलक संस्थासे विश्वके ७० देशमे निःशुल्क व्यापक क्लेफ्ट केयर प्रदान कैटी आइल बा ।

यी कार्यक्रम सुदूरपश्चिममे पहिलचो निसर्ग अस्पतालमार्फत शुरू हुइल अस्पतालके अध्यक्ष तिर्थ राज पन्त जानकारी डेलै । निसर्ग अस्पताल पश्चिम नेपालमे नियमित रूपमे अइसीन शल्यक्रिया कैना पहिल स्वास्थ्य संस्था बनल बा । स्माइल ट्रेन दक्षिण एसिया डिभिजनके दक्ष टोलीसे अस्पतालके अपरेशन थिएटर, ईसीयू, पीआईसीयू, ओ सम्पूर्ण स्टाफके निरीक्षण कैके उच्च मापदण्ड पूरा करल प्रमाणित करले बा । शल्यक्रियाके लाग डा. दीपक ठकुराठी ओ डा. हेमन्त ओझा तथा डा. सुनिल भट्टहे स्वीकृति प्रदान करले बा । यी कार्यक्रममे बाल रोग विशेषज्ञहरू (डा. प्रदीप मिश्र ओ डा. दीपक पौडेल), डेन्टल, स्पीच थेरापी, पोषण, नर्सिङ, मनोविज्ञान, ओ सामाजिक सञ्जालके टोली समावेश रहल बा ।

बिरामीसे शल्यक्रिया, जाँच, अस्पताल भर्ना, औषधि, ओ अन्य सम्पूर्ण खर्च निःशुल्क पैना बटै । हस्पिटलके अध्यक्ष पन्त यी सेवासे सुदूरपश्चिमके जनताहे स्थानीय स्तरमे गुणस्तरीय उपचार प्रदान कैना लक्ष्य राखल बटैलै । यी पहलसे क्षेत्रके बासिन्दाहुक्रनके स्वास्थ्य सेवामे सहज पहुँच सुनिश्चित कैना अपेक्षा राखल बा ।