१३ खाद्य तथा दाना उद्योगहे मुद्दा दायर

पहुरा समाचारदाता
धनगढी, २४ जेठ । खाद्य प्रविधि तथा गुण नियन्त्रण कार्यालय, धनगढीसे ११ ठो खाद्य तथा दाना उद्योगहे मुद्दा दायर करल जनैले बा ।

शनिच्चरके रोज आर्थिक बर्ष २०८१÷८२ के चौमासिक अवधि (२०८१ सावनसे चैतसमके प्रगती विवरण सार्वजनिक करटी खाघ तथा दाना ऐन अनुरुप संकलन करल नमूनामध्ये प्रतिकुल पाइल नमूना उपर कारबाही प्रकृया आघे बढाइल वरिष्ठ खाद्य अनुसन्धान अधिकृत तथा कार्यालय प्रमुख हरेराम प्रधान जानकारी डेलै ।

यी चौमासिक अवधिमे अनुसन्धान प्रकृया पुरा हुइल प्रतिकूल नमूना उपर खाघ निरिक्षण अधिकारीसे जिल्ला प्रशासन कार्यालय कैलालीमे ५ ठो, जिल्ला प्रशासन कार्यालय कञ्चनपुरमे १ ठो, कैलाली जिल्ला अदालतमे २ ओ कञ्चनपुर जिल्ला अदालतमे १ ठो, जिल्ला प्रशासन कार्यालयमे ४ ठो दाना उद्योग करके जम्मा १३ ठो प्रतिकूल नमूना उपर मुद्दा दायर करल उहाँ जनैलै ।
गैल आर्थिक बर्षसे लगत सरके आइल जम्मा २५ उद्योगी व्यवसायीसंग बयान लेना, घटना विवरण कागज कैना, जिल्ला सरकारी वकील कार्यालयसे निर्णय निकासा लेना कार्य आघे बह्रटी रहलफे उहाँ जनैलै ।

विगतमे दायर करल मुद्दामे ११ ठो टमान मुद्दाके फैसला हुइल बा । जेम्ने टमान कसुरमे रु. ५ हजारसे रु. २५ हजारसम जरिवाना कर ओ महके मुद्दामे २५ दिनके कैदके फैसला हुइल प्रमुख प्रधान बटैैलै । शंकास्पद मह विक्रि वितरण करल उजुरीके सम्बोधन कैना क्रममे १६ जाने भारतीय नागरिकहे पकाउ करके नमुना संकलन करेबेर उ मह दुषित रहल प्रमाणित हुइलमे करिब एक हजार किलोग्राम मह नष्ट करके ओइनहे जिल्ला अदालत कैलालीमे मुद्दा दायर करल बा । टमान सरोकारवाला निकायसंग सयुक्त अनुगमन कैना क्रममे लम्कीचुहा नगरपालिका–०१ स्थित सप्तऋषि बिजनेस सुपमे (११५ बोरा) ३४५० किलोग्राम रंग मिलाइल करिया दाल जफत करके नष्ट करल उहाँ जनैलै ।

यिहे आर्थिक वर्षमे चैत महिनामे खाद्य प्रविधि तथा गुण नियन्त्रण विभाग, काठमाडौंसे घुम्ती खाद्य प्रयोगशाला (मोवाइल फुड ल्याव) हस्तान्तरण हुइल बा । उ मोबाइल भ्यान प्रयोग करके नमुना संकलन करल स्थलमे टमान खाद्य वस्तुके गुणस्तर परिक्षण करके (विशेषतः विषादी अवशेष बुध, तेल, मिठाइ, रंग सस.के तत्काल प्रतिवेदन प्राप्त कैना ओ कैफियत आइल खण्डमे कारबाहीके प्रक्रिया आघे बह्रैना कार्य सुरुवात करलपाछे काम सहजता हुइल उहाँ बटैलै ।

फलफुल तथा तरकारीमे विषादीके अबषेश परिक्षण कैना क्रममे धनगढी स्थित हाटबजारमे घुम्ती खाप प्रयोगशालाके प्रयोग करके तत्काल हाटबजारमे विषादीके अवशेष परिक्षण कैना सुरुवात करल बा । उहे क्रममे धनगढी उमनपा सहिद गेट स्थित एक फलफुल गोदाममे रहल करिब २३०० किलोग्राम आममे विषादीके अवशेष अखाय मात्रा रहल पाइल ओरसे आम पालिकाके समन्वयमे नष्ट करल बा ।

यी कार्यालय अन्य सरोकारवाला निकायसे आयोजित टमान खाद्य स्वच्छता ओ गुणस्तर सम्बन्धी जनचेतना फैलैना, स्कुले विद्यार्थीनहे असल खानपान शैलीबारे जागरुक बनैना, खाद्य ऐन, नियम ओ मापदण्ड सम्बन्धी जानकारी करैना कार्यकममे प्राविधिक प्रशिक्षण कैना कार्यफे यी कार्यालयसे करटी आइलमे यी आर्थिक वर्षमे ३ हजारसे ढेर सरोकारवालाहे टमान कार्यक्रममे सहभागी कराके सचेत करैना जानकारी डेहल उहाँ डेलै ।

खाद्य प्रविधि तथा गुण नियन्त्रण कार्यालय, धनगढीके खाद्य अनुसन्धान अधिकत एवं सूचना अधिकारी सुमन लामिछाने चौमासिक प्रतिवेदन प्रस्तुत करटी खाद्य तथा दाना उद्योग अनुगमन, सिफारिस, अनुज्ञापत्र जारी तथा नवीकरण कार्यक्रम अन्र्तगत यी अवधिमे कार्यालयसे २१८ ठो खाद्य उद्योगके स्थापनाके लाग सिफारिस, अनुमति पत्र जारी तथा नविकरण करल बटैलै । ३ ठो दाना उद्योगके अनुज्ञापत्र सालवसाली नवीकरण करल, यम्ने नयाँ अनुमति पत्र जारी २७ ठो, नविकरण १३३ ठो ओ दर्ता कैना सिफारिस करल ६१ ठो रहल जनैलै ।

घरेलु तथा साना कार्यालयमे उद्योग दर्ता हुई अइना क्रममे खाद्य तथा दाना उद्योगके हकमे यी कार्यालयसे सिफारिस लेहे पर्ना व्यवस्था रहल बा । लौव उद्योगसे गुणस्तर लाइसेन्स अनिवार्य लेके केल उत्पादन विक्री वितरण करे पर्ना ओ प्रत्येक बर्ष उ लाइसेन्स नवीकरण करेपर्ना व्यवस्था रहल उहाँ जनैलै ।

उद्योगके स्थलगत अनुगमन करके स्वच्छता मापदण्ड पुरा करल, उत्पादित खाद्य तथा दानाके प्रयोगशाला परिक्षण करके गुणस्तरीय प्रतिवेदन प्राप्त हुइलेसे ओ उत्पादनके लेवलमे अनिवार्य रुपसे खुलाई पर्ना विवरण उल्लेख करलपाछे उद्योगहे अनुज्ञापत्र जारी तथा नवीकरण कैना व्यवस्था रहल बा । यैसिन उत्पादन स्थलमे सुधार करके गुणस्तरीय उत्पादनमे यी कार्यालयसे टेवा पुगैटी रहल बा ।

यी अवधिमे संवेदनशिल खाद्य पदार्थ (जस्टे दूध, तेल, पानी) उत्पादन कैना उद्योग स्थलके ४५ चो अनुगमन निरिक्षण करके खाद्य स्वच्छता कायम रख्ना करके आवश्यक निर्देशन डेहल बा ।

खाद्य बजार तथा होटल रेस्टुरेन्ट अनुगमनमे बजारमे विक्री हुइना ओ होटल रेस्टुरेन्टमे तयार कैना खाद्य पदार्थके स्वच्छता ओ गुणस्तर नियमन ओर आर्थिक बर्ष २०८१÷८२ के चौमासिक अवधि तथा चाडपर्व लक्षित करके खाद्य निरिक्षण अधिकारी ओ संयुक्त अनुगमन टोलीसे जम्मा यी अवधिमे कार्यालयके निरीक्षण टोली तथा संयुक्त अनुगमन टोलीसे ८७ चो होटल रेस्टुरेन्ट दाना बजारके तथा १३४ ठो खाद्य तथा दाना उद्योगके अनुगमन निरिक्षण करल बा । यैसिक अनुगमनके क्रममे पसल तथा होटल रेस्टुरेन्टहे स्वच्छता सुधारके लाग परामर्श डेना ओ उपभोग्य अवधि समाप्त हुइल तथा गुणस्तरहीन खाद्य वस्तु जफत करके नष्ट कैना ओ आवश्यक कारबाही प्रकृया आघे बह्राके नियमन कार्य करके बजार तथा होटलसे विक्री हुइना खाद्य वस्तुके गुणस्तर सुधारमे टेवा पुगैटी रहल बा ।

हालसम रु. १३ लाख मूल्य बराबरके टमान उपभोग्य मिति सेकल मिसावट पाइल, खाद्य स्वच्छता कायम नैरहल, दुषित तथा न्यूनस्तरके खाद्य पदार्थ जफत करके नष्ट करल सूचना अधिकारी लामिछाने बटैलै । यैसिन खाद्य पदार्थमे पाउरोटी, डुनट, अखाद्य रंग, कोला, मिठाइ, सस, मसला, रंग मिसाइल दाल, सुजि, मह, चाउल, विषादीके अवशेष अत्याधिक रहल आम, दुध रहल उहाँ जनैलै ।

खाद्य तथा दाना नमूना संकलनमे खाद्य स्वच्छता तथा गुणस्तर ऐन अनुरुप खाद्य निरिक्षण अधिकारीसे उद्योग, बजार तथा होटल रेस्टुरेन्ट अनुगमन कैना क्रममे शंकास्पद नमूना संकलन करके ऐन अनुरुप कारवाही प्रकया आघे बह्रैटी आइल बा । यी सन्दर्भमे चालु आ.व.के चौमासिक अवधिमे यी कार्यालयसे ३८ ठो ऐन वमोजिम खाद्य नमूना ओ १८१ ठो सर्भिलेन्सके लाग करके कुल २१९ ठो नमुना संकलन करल बा ।

हाल कार्यालयमे दाना निरीक्षक कुहीहे नैतोकल कारणसे दाना नमूना संकलन कैना कानूनी बन्देज लागल ओरसे हालसम दाना ऐन बमोजिम दाना नमूना संकलन शुन्य रहल बा ।

खाद्य तथा दाना नमूना विश्लेषण अन्र्तगत सुदुरपश्चिम क्षेत्रमे टमान स्रोतसे संकलन हुई आइल खाद्य तथा दाना नमूनाके विश्लेषण सेवा प्रदान कैना एक ठो केल प्रयोगशाला यी कार्यालयमे रहल बा । यी चौमासिक अवधिमे टमान प्रयोजनके लाग जस्टे खाद्य तथा दाना अनुज्ञापत्र जारी तथा नवीकरणके, अनुरोध हुके आइल, बजार अनुगमनसे ऐन बमोजिम निरिक्षण अधिकारीसे संकलित ओ अनुसन्धानात्मक करके जम्मा १५ सय ८७ ठो खाद्य तथा दाना नमूनाके विश्लेषण करल सूचना अधिकारी जनैलै ।

खाद्य स्वच्छता तथा गुणस्तर सम्बन्धी उजुरी तथा गुनासो सम्बोधन एवं व्यवस्थापन अन्र्तगत यी अवधिमे यी कार्यालयमे टमान माध्यमसे प्राप्त ९ ठो खाद्य स्वच्छता तथा गुणस्तर सम्बन्धीके उजुरी तथा गुनासो सम्बोधन तथा व्यवस्थापन कैना कार्य करल बा ।
राजश्व संकलन तथा वित्तिय प्रगतिओर यी अवधिमे यी कार्यालयमे प्राप्त नमूनाके विश्लेषण दस्तुर तथा अनुज्ञापत्र जारी, नवीकरण ओ सिफारिस दस्तुर बापत रु १५ लाख ६० हजार ६१५ राजश्व संकलन करल बा । कलेसे कार्यालयसे चालु ओ पुँजीगत खर्च करके जम्मा ८९.१२ प्रतिशत वित्तीय प्रगति हासिल करल उहाँ जनैलै ।