विद्यालयहे जग्गादाता चन्द्रसिंह चौधरी सम्मानित

पहुरा समाचारदाता
धनगढी, २६ जेठ । कैलाली जिल्लाके कैलारी गाउँपालिका वडा नम्बर ७ स्थित रास्ट्रिय चन्द्र आधारभुत बिद्यालयहे जग्गादाता चन्द्रसिंह चौधरी सम्मानित हुइल बटै । रास्ट्रिय चन्द्र आधारभुत बिद्यालयसे अँटवारके रोज एक कार्यक्रमके विच उहाँहे सम्मान तथा अभिनन्दन करल हो ।

कैलारी गाउँपालिकाके अध्यक्ष राजसमझ चौधरी जग्गादाता चौधरीहे दोसल्ला ओढाके सम्मान करटी धन्यवाद ज्ञापन समेत करल रहिट । उहाँ कहलै, ‘यहाँ धन हुके केल नैहुई, मनफे हुई परठ । यी योगदानके लाग चन्द्रसिंहहे केल नाही, उहाँहे उच्च संस्कारसहित हुरकाइल उहाँक पुर्खाहुकनहेफे सम्मान करे चाहठु ।’

विद्यालयके प्रअ डम्मर शाह दिनप्रति दिन सामुदायिक विद्यालयके अवस्था खस्कटी रहल अवस्थामे चन्द्रसिंह जैसिन दानवीर, दाता जल्मना कना समाजके लाग यिहीसे महत्वपूर्ण कुछ नैरहल बटैलै । उहाँके दानसे विद्यालयके शैक्षिक गुणस्तर सुधारमे अतुलनीय योगदान पुगलफे बटैलै ।

जग्गादाता चन्द्रसिंह चौधरी उ विद्यालय अपने शिक्षाके पाइला टेकल विद्यालय रहल बटैलै । उहाँ अपन नामके लागसेफे गाउँघरके विद्यालयहे कैसिक सुधार करे सेक्जाइठ कहिके सहयोग करल बटैलै ।

चौधरी कहलै, ‘बसन्ता मोर जन्म गाउँ हो । यी ठाउँमे जौन मेरके शैक्षिक विकास हुई पर्ना रहे । उ नैहुइल । झन खस्कटी गैल बा । अपनहे आर्थिक रुपमे कुछ सबल हुइल महसुस हुइलपाछे यहाँके विद्यालयके शैक्षिक अवस्था सुधार होए कहिके सहयोग करल हुँ ।’

कैलालीके धनगढी उपमहानगरपालिका १ बैठटी आइल ४७ वर्षिय चन्द्रसिंह चौधरी शैक्षिक विकास, सामाजिक सचेतना तथा विद्यालयके स्थायी उन्नतीके लाग अपन नाममे रहल कैलारी गाउँपालिका ७ बसन्तास्थित २ विघा जमिन उहेक राष्ट्रिय आधारभूत विद्यालयहे दान डेहल बटै । विद्यालयहे जग्गादान करलपाछे विद्यालयके नाउँ रास्ट्रिय चन्द्र आधारभुत बिद्यालय नामाकरण बा ।
ओस्टेक उहेविच विद्यालयसे विद्यार्थीहुकनहेफे सम्मान करले बा ।

विद्यालय व्यवस्थापन समिति अध्यक्ष टुनीराम चौधरीके अध्यक्षतामे कार्यक्रममे कैलारी गाउँपालिका–७ के वडा अध्यक्ष तथा प्रवक्ता दिपेन्द्रबहादुर बम, कार्यपालिका सदस्य सुन्दरी चौधरीलगायत, अभिभावक, शिक्षकहुकनके सहभागिता रहे ।