पत्रकारिताहे व्यावसायिक ओ मर्यादित बनैना जरुरी
पहुरा समाचारदाता
धनगढी, २६ जेठ । नेपाल पत्रकार महासंघके अध्यक्ष निर्मला शर्मा लोकतन्त्र बलगर हुइलेसे किल पत्रकारिता बलगर हुइना बटैले बटी ।
नेपाल पत्रकार महासंघ सुदूरपश्चिम प्रदेशसे सोम्मारके धनगढीमे आयोजना करल प्रदेशस्तरीय संवाद एवं ‘फ्रि मिडिया नेटवर्क गठन’ कार्यक्रममे उहाँ आमनागरिकहे सु–सूचित कैना काममे पत्रकारके भूमिका महत्त्वपूर्ण हुइल ओरसे पत्रकारिताहे व्यावसायिक ओ मर्यादित बनैना जरुरी रहल उल्लेख करल रही ।
पाछेक समय पत्रकारिता पेसामे टमान चुनौती डेखा परल उल्लेख कैटी उहाँ पत्रकार स्वयं आपन सुरक्षाक लाग विशेष ध्यान डेना आवश्यक रहल धारणा राखल रहिट । उहाँ प्रदेशस्तरमे गठन हुइल फ्रि मिडिया नेटवर्कसे आमनागरिकके स्वतन्त्रता, प्रेस स्वतन्त्रता ओ पत्रकारके सुरक्षाके सुनिश्चितता प्रदान कैना मद्दत मिल्ना बटैलै ।
उहाँ नेटवर्कमे नागरिक समाजके अगुवा, सरकारी निकायके प्रतिनिधि लगायतके सहभागिता रहना हुइल ओरसे पत्रकारहे सुरक्षासँगे सूचनाके पहुँच बह्राइक लाग सहयोग पुग्ना कहाइ राखल रही । आमनागरिक समाजके पत्रकारिताप्रति रहटी आइल विश्वासहे बचाइक लाग पत्रकार विशेष ध्यान डेना जरुरी रहल उहाँके कहाइ रहे ।
अध्यक्ष शर्मा देशभरके आमसञ्चार माध्ययमसे टमान सङ्कट झेल्टी आइल उल्लेख कैटी सञ्चारमाध्यमसे झेल्टी आइल आर्थिक सङ्कटके कारण पत्रकार पलायन हुइना अवस्था रहल स्मरण करल रही ।
इहे बिच नेपाल पत्रकार महासङ्घ सुदूरपश्चिम प्रदेश समितिके अध्यक्ष भरत शाहके नेतृत्वमे १७ सदस्यीय फ्रि मिडिया नेटवर्क गठन करल बा । उक्त नेटवर्कमे नागरिक समाज, सरकारी निकाय ओ पत्रकार सम्बद्ध टमान सङ्गठनके प्रतिनिधि रहल बटै ।
