पत्रकार आवस गृहके लाग बजेट माग

पहुरा समाचारदाता
धनगढी, २७ जेठ । पत्रकारहुक्रनके लाग आवास गृह निर्माणके लाग बजेट विनियोजनके माग कैटी मुख्यमन्त्री कमल बहादुर शाहहे माग पत्र बुझाइल बा ।

नेपाल पत्रकार महासंघ कैलाली जिल्ला अध्यक्ष श्रवण देउवाके नेतृत्वमे गैल टोलीसे कैलाली शाखामे पत्रकारहुक्रनके लाग आवास गृह निर्माणके लाग आवश्यक बजेट विनियोजन कैना माग सहित माग पत्र बुझाइल हो ।

ओस्टके स्वास्थ्य बीमा कार्यक्रम ओ प्रदेश मातहतके अस्पतालमे ५० प्रतिशत उपचारमे छुटके व्यवस्था कैना माग करल बावै । ओस्टके टोलीसे कानून मन्त्रालयसे सञ्चार माध्यमलहे डेटी आइल लोककल्याणकारी विज्ञापनके बजेट बह्रैना ओ विज्ञापनके लाग सञ्चार माध्यमसे अनलाइनहे आवेदन डेना व्यवस्था करे पर्ना माग रहल बा ।

ओस्टके लोककल्याणकारी विज्ञापन डेहेबर अपाङ्गगता, अल्पसंख्यक तथा महिला श्रमजीवी पत्रकारसे सञ्चालन करल सञ्चार माध्यमहे प्राथमिकता डेहे पर्र्ना, प्रदेशमे प्रेस रजिष्टारके कार्यालय स्थापना करे पर्ना, मिडिया सम्बन्धी विधेयक सहित सञ्चार सम्बद्ध कानुन पत्रकार महासंघ लगायत सरोकारवालासँग छलफल तथा परामर्श कैके लन्ना ओ ओइसीन कानुनमे महासंघके सरोकारके विषय समेटे पर्ना रहल बा ।

ओस्टके पत्रकारहुक्रनके पेशागत सीप, क्षमता विकास तथा फेलोसिपके कार्यक्रम बजेटमे समावेश करे पर्ना ओ पत्रकार महासंघ कैलाली शाखामे सञ्चार कक्ष स्थापना कैना तथा महासंघके भौतिक पूर्वाधार विकासके लाग बजेटके व्यवस्था कैडेना आग्रह कैटी मागपत्र बुझाइल हो ।

उहीसे आघे आन्तरिक मामिला तथा कानून मन्त्री हिरा सार्कीहे फेन उ माग सहित मागपत्र बुझागिल बावै । ओस्टके उद्योग पर्यटन वन तथा वातावरण मन्त्री रामेश्वर चौधरीहे फेन उहीसे आघे तीनबुँदे मागपत्र बुझागिल बावै । मागपत्रमे पर्यटकीय क्षेत्रके प्रवद्र्धन हुइना मेरके पर्यटनके विषयमे पत्रकारहे फेलोसिपके व्यवस्था करे पर्र्ना, पत्रकारनके लाग पर्यटन तथा पर्यावरणके विषयमे क्षमता विकास तालिम ओ पर्यटन प्रर्वद्धनके कार्यक्रमके लाग समन्वय कैना आग्रह करल बा ।

ओस्टके सामाजिक विकासमन्त्री मेघराज खड्काहे फेन चारबुँदे मागपत्र बुझागैल बावै । मागपत्रमे उपचारमे छुट, पत्रकारहुक्रनके लाग स्वास्थ्य सम्बन्धि क्षमता विकास कैना तालिम, गोष्ठी सञ्चालन कैना बजेट विनियोजन करे पर्र्ना, स्वास्थ्य, शिक्षा, खेलकुद, श्रम आदि विषयमे पत्रकारहे फेलोसिपके कार्यक्रम बजेटमे समावेश करे पर्ना ओ पत्रकारहुक्रनके लाग स्वास्थ्य तथा दुर्घटना बिमाके लाग रकम विनियोजन करे पर्र्ना माग करल रहे ।

मागपत्र बुझाइ नेपाल पत्रकार महासंघ कैलाली भावना जोशी, उपाध्यक्ष विराज रोस्यारा, सचिव तेजराज भट्ट, जिल्लास्थित पेशागत टमान संगठन प्रेस युनियन कैलालीके अध्यक्ष सिताराम ओझा, प्रेस चौतारी कैलालीके अध्यक्ष जनक बिष्ट, प्रेस सेन्टर नेपाल कैलालीके अध्यक्ष सुरेन्द्र ताम्राकार, नेपाल आदिवासी जनजाति पत्रकार महासंघ (फोनिज) कैलाली अध्यक्ष राम दहित सहितके पत्रकारके टोली रहल रहे ।