वन संरक्षणके लाग समन्वय कैना जरुरी बाः गाउँपालिका उपाध्यक्ष भगवती

पहुरा समाचारदाता
हसुलिया, २८ जेठ । वन क्षेत्र सरक्षणके लाग सक्कु जानेक समन्वय जरुरी रहल गाउँपालिका उपाध्यक्ष भगवतीकुमारी चौधरी बटैले बटी ।

बसन्ता सव डिभिजन वन कार्यालय कैलालीसे बुधके रोज हसुलियामे आयोजना कैगिल सरोकारवालाहुकनसंग समन्वय बैठक तथा वन ऐन, नियम, सामुदायिक वनके कार्यविधि निर्देशिका सम्बन्धी उपभोक्ता समुहहे जानकारीमुलक तालिममे गाउँपालिका उपाध्यक्ष उ बाट बटवाइल रहिट ।

वन क्षेत्र अतिक्रमण तथा विनास हुइटी गैलबेला संरक्षण कैना चुनौती ठपल बा, उहाँ कहली, ‘अक्केली प्रयाससे बन नैजोगी यम्ने सक्कु जानेक समन्वय सहकार्य जरुरी बा । सव डिभिजन वन कार्यालय, स्थानीय सरकार, सामुदायिक वन उपभोक्ता, उपभोक्ता समुहके समन्वय नैहुइट वन संरक्षण कैना गाह्रो बा । एक दुसरमे दोष लगैनासेफे सक्कु जाने आ–अपन ओरसे भूमिका निर्वाह कैना आवश्यक बा ।’

सामुदायिक वनसे स्थानीय तहके डेहे राजश्व डेलेसे गाउँपालिकासे कुछ समन्वय करके विकास करे सेक्ना उहाँ बटैली । वन क्षेत्र विनास हुइल कारण मानव स्वास्थ्यमे असर परटी रहल उहाँ बटैली ।

कार्यक्रममे कैलारी गाउँपालिका वडा नम्बर ५ के वडा अध्यक्ष विष्णु प्रसाद चौधरी वनके अवस्था हेरेबेर राष्ट्रिय वनसे हिस्सासे आइल सामुदायिक वनमे ढेर आम्दानी ओ वगरमे रहल सामुदायिक वनके आम्दानीमे फरक रहल बटैलै । सामुदायिक वन खुल्ला चरिचरणके कारण विनाश हुइटी गैल ओरसे एक हातसे थोपरी नैबज्ना कहटी यकर संरक्षणमे सक्कु तह तप्का लागे पर्ना बटैलै ।

सक्कु सामुदायिक वनमे छाडा चौपाय ओ खुल्ला चरिचरणके समस्या बा । पालिकासे सक्कु सामुदायिक वनहे तारजाली डेहे सेक्ना अवस्था नैहो । जौन जौन सामुदायिक वनमे आम्दानी बा केलेसे अपनेहे लगानी करी । जेकर आवस्था नाजुक बा, ओकर लाग पालिकासे पहल करी । सामुदायिक वनसे टिरना १० प्रतिशत कर टिरलेसे गाउँठाउँमे विकासमे टेवा पुग्ना बटैलै । गत बर्ष गाउँपालिकासे गौशाला निर्माण करेबेर अवरोध हुइल ओ बनल गौशाला भत्कागिलपाछे राज्य पैसा निवाश हुइल ओ यी बरष वडा नम्बर ३ मे गौशाला बनैना उहाँ बटैलै ।

वडा नम्बर १ के वडा अध्यक्ष धोज हरिपाल बोहरा सामुदायिक वनहे कर्तव्य ओ अधिकार बुझके आघे बह्रना आग्रह करलै । सामुदायिक वन संरक्षणके लाग कार्य समिति जागरुक हुइना जरुरी बा । सक्कु जाने उपभोक्ता हुई एक जाने संरक्षण कैना और जाने विनाश करटी गैलेसे बन कबु संरक्षण नैहुइना उहाँ बटैलै ।

बसन्ता सव डिभिजन वन कार्यालय कैलालीसे प्रमुख केशवराज पौडेल वन ऐन, नियम, सामुदायिक वनके कार्यविधि निर्देशिका सम्बन्धी उपभोक्ता समुहहे जानकारी डेहल रहिट । कार्यक्रममे सिएफसीसी बसन्ताके अध्यक्ष रमेश चौधरीलगायत उ अन्र्तगत पर्ना सामुदायिक वनके पदाधिकारीहुक्रे आ अपन बाट रख्टी सामुदायिक वनमे खुल्ला चरिचरण, छाडा चौपाया, लडिया कटानके समस्याबारे जानकारी करैले रहिट ।

कैलारी गाउँपालिकाके वन वाताकरण तथा विपद व्यवस्थापन समितिके संयोजक तथा वडा नम्बर ४ के अध्यक्ष ठागुराम चौधरीके अध्यक्षमे हुइल कार्यक्रमके संचालन बसन्ता सव डिभिजन वन कार्यालय कैलालीके बन रक्षक सुकुम कुमाल करल रहिट । कार्यक्रममे सरोकारवाला निकाय कैलारी गाउँपालिकाभिटर सामुदायिक वनके पदाधिकारी, बसन्ता सव डिभिजन वन कार्यालय कैलालीके प्रतिनिधि, सुरक्षा निकायके सहभागिता रहे ।