कैलारीसे नयाँ इप्रका प्रमुखहे स्वागत, गैल प्रमुखहे विदाई
पहुरा समाचारदाता
हसुलिया, ३० जेठ । कैलाली जिल्लाके कैलारी गाउँपालिका आज एक कार्यक्रमके विच इलाका प्रहरी कार्यालय हसुलियामे आइल नयाँ प्रमुखहे स्वागत ओ सरुवा हुके गैल प्रमुखहे विदाई कैगिल बा ।
गाउँपालिका अध्यक्ष राजसमझ चौधरी, गाउँपालिका उपाध्यक्ष भगवतीकुमारी चौधरी, प्रमुख प्रशासकीय अधिकृत खगेन्द्रराज जोशी, वडा अध्यक्षहुक्रे, कार्यपालिका सदस्यहुक्रे, विषयत शाखाके प्रमुखहुक्रनसे इलाका प्रहरी कार्यालय हसुलियामे आइल प्रमुख ऐनबहादुर पालहे स्वागत ओ ६ महिना यी क्षेत्रमे सेवा प्रदान कैके कञ्चनपुर सरुवा हुके गैल प्रमुख डिगज ठकुराठीहे विदाई कैगिल हो ।
स्वागत तथा विदाई कार्यक्रममे गाउँपालिका अध्यक्ष राजसमझ चौधरी डिगज ठकुराठीके कार्यकाल मजा रहल ओरसे आघे आउर प्रगतीके कामना व्यक्त करलै । ओस्टेक करके कानूनी जटिल एक ठाउँ हुइलेसे कतिपय ठाउँमे व्यवहारिक रुपमे जाके समस्या आइलबेर समन्वय सहकार्य करके आघे बह्रना जरुरी रहल बटैलै ।
कैलारी गाउँपालिका सिमानासे जोरल ओरसे लागु औषध दुव्र्यशनीके ढेर समस्या बा । ओहोर ओर ध्यान डेना आग्रह करलै ।
गाउँपालिका उपाध्यक्ष भगवतीकुमारी चौधरी डिगज ठकुराठीसे प्रदान करल सेवा महत्वपूर्ण रहल कहटी अगामी दिन यी पालिकाके सुरक्षाके लाग समन्वय सहकार्य ओ सुझाव निरन्तर रहे पर्नामे जोर डेहल रहिट । गाउँपालिका उपाध्यक्ष कहली, ‘उहाँ जनताके सुरक्षाके लाग रातदिन नैकहिके सेवा प्रदान करलै । उहाँक कार्यकालमे ओसिन खासै अप्रिय घटना नैघटल ।’
विदाई हुके गैल डिगज ठकुराठी आपन ६ महिना कार्यकालमे यहाँसे मजा सहयोग पाइल ओ यहाँक समाज मिलनसार भेटाइल बटैलै । उहाँ कहलै, ‘कैलारी थारु समुदायके बसोबास रहल पालिका हो । यहाँक समाज मिलनसार, मेलमिलाप रहल पैनु । भल्मन्सा प्रथाके कारण झन सहजुल हुइल रहे ।’
कैलारीमे आत्महत्या मुख्य समस्या रहल ओरसे अपने आइलपाछे कुछ न्यूनिकरण हुइल बटैलै । ओस्टेक करके सुरक्षाके दृष्टिकोणसे वडा नम्बर ८ मे चुनौती भेटल उहाँ बटैलै । कार्यक्रम संचालन सामाजिक विकास शाखा प्रमुख यगम कलेल करल रहिट ।
