शिक्षामे सुधार ल्यन्ना प्रोत्साहन कार्यक्रम सुरु करले बटीः गाउँपालिका अध्यक्ष

पहुरा समाचारदाता
धनगढी, ३० जेठ । कैलाली जिल्लाके कैलारी गाउँपालिकामे अनिवार्य तथा निःशुल्क शिक्षाके लाग सरोकारवालाहुकनसंग अभिमुखीकरण कार्यक्रम कैगिल बा ।

सामाजिक विकास कार्यालय धनगढी कैलालीके आयोजनामे शुकके रोज हसुलियामे अनिवार्य तथा निःशुल्क शिक्षाके लाग सरोकारवालाहुकनसंग अभिमुखीकरण कार्यक्रम कैगिल हो । कार्यक्रममे गाउँपालिका अध्यक्ष राजसमझ चौधरी शिक्षा क्षेत्रमे सुधार ल्यानेक लाग प्रोत्साहन कार्यक्रम ल्यानल बटैलै ।

यहाँके शैक्षिक गुणस्तर हेरेबेर एकदम खस्टी गैल बा,’ गाउँपालिका अध्यक्ष कहलै, एक्के जनहनहे दोष लगाके कुछ नैहुई । यम्ने विद्यालय, शिक्षक, अभिभावक, विद्यार्थी, परिवार समाज साथ डेहे पर्ना जरुरी बा ।’

उहाँ कहलै, ‘गाउँपालिकासे विद्यार्थीनहे हौसला प्रदान करेक लाग पुरस्कारके व्यवस्था करले बा । विद्यार्थीसंगे मजा नतिजा ल्यन्ना विद्यालयहेफे नगद पुरस्कारके व्यवस्था करल बा ।’

कैलारी गाउँपालिकासे सामुदायिक विद्यालयमे अध्ययन करुइया विद्यार्थी एसइइ परिक्षामे उत्कृष्ट अंक ल्यन्लेसे विद्यार्थी ओ विद्यालयहे पुरस्कृत कैना निर्णय करल उहाँ जनैलै । ३.६ जिपिएसे ढेर ४ जिपिएसे कम ल्यनुइया विद्यार्थीनहे ५० हजार रुप्या पुरस्कार डेना ओ ४ जिपिए ल्यनुइया विद्यार्थी १ लाख रुप्या पुरस्कार डेना निर्णय हुइल गाउँपालिका अध्यक्ष राजसमझ चौधरी जनैलै ।

ओस्टेक सामुदायिक विद्यालय ओर कक्षा ८, १० ओ १२ मे मजा नतिजा ल्यन्ना विद्यालयहे क्रमश रु १५ हजार, २० हजार ओ २५ हजार नगद तथा सम्मानपत्र डेना निर्णय हुइल उहाँ जनैलै ।

ओस्टे संस्थागत विद्यालयसे कक्षा ८, १० ओ १२ मे मजा नतिजा ल्यन्ना विद्यालयहे क्रमश १० हजार, १५ हजार ओ २० हजार नगद रुप्या ओ सम्मानपत्र डेना निर्णय हुइलफे गाउँपालिका अध्यक्ष जनैलै । गाउँपालिकासे विद्यार्र्थीनहे प्रोत्साहन करेक लाग पुरस्कृत कैना निर्णय करल जनैलै ।

हम्रे निर्वाचित हुके आइलबेला ढेर विद्यालय जिर्ण अवस्थामे रहिट । हम्रे ओकर मर्मत सम्हार कैली, भवनके अपुग रहल विद्यालयमे भवन निर्माणसंगे विद्यालय समायोजन कार्यक्रमफे करल बा ।’

विद्यार्थी विद्यालय जाके केल्ह नैहुइना ओकर लाग आपन लर्कनके लाग अभिभावकफे जिम्मेवार बनेपर्ना उहाँ बटैलै । लर्का विद्यालय गैल नैगैल विद्यालयमे समय समय सोधपुछ करेपर्ना, विद्यालयमे डेहल गृहकार्य करल नैकरल कपी जाँच करेपर्ना, ओ खास कैके सबसे विगर्ना गलत संगतसे बचाई पर्ना जरुरी रहल गाउँपालिका अध्यक्ष बटैलै ।

कार्यक्रममे सामाजिक विकास कार्यालय धनगढी कैलालीके प्रमुख कुलराज सोती विद्यालय शिक्षा प्रणालीके रुप, शिक्षा मानवअधिकार ओ मौलिक हकमे रुप,शिक्षा सम्बन्धी नीतिगत, कानूनी तथा संस्थागत व्यवस्था, अनिवार्य तथा निशुल्क ऐन २०७५ के व्यवस्था, विद्यालय शिक्षा ओ अनिवार्य तथा निशुल्क शिक्षामे सरोकारवालाके भूमिकाबारे जानकारी डेहल रहिट ।
नेपालके संविधान २०७२ के भाग ३ मे मौलिम हकके धारा ३१ मे शिक्षा सम्बन्धी हकमे प्रत्येक नागरिकहे आधारभूत शिक्षामे पहुँचके हक हुइना कहल बा । नागरिकहे राज्यसे आधारित शिक्षा अनिवार्य ओ निशुल्क तथा मावि तहसम निशुल्क शिक्षा पैना हक हुइना कहल बा ।

अपाङता हुइल ओ आर्थिक रुपसे विपन्न नागरिकहे कानून बमोजिम निशुल्क उच्च शिक्षा पैना हक हुइना कहल उहाँ जनैलै । दृष्टिविहिन नागरिकहे ब्रेललिपि तथा बहिरा ओ स्वर वा बोलाई सम्बन्धी अपाङता हुइल नागरिकहे सांकेटिक भाषाके माध्यमसे कानून बमोजिम निशुल्क शिक्षा पैना हक रना कहल बा ।

नेपालमे बसोबास कैना प्रत्येक नेपाली समुदायहे कानून बमोजिम आपन मातृभाषामे शिक्षा पैना ओ ओकर लाग विद्यालय तथा शैक्षिक क्षेत्र खोल्न ओ संचालन कैना हक हुइना कहल उहाँ जानकारी डेलै ।

दिगो विकासके लक्ष्य २०१५–२०३०) मे लक्ष्य नम्बर ४ के बुन्दामे सबै बालबालिकाहे समावेशी, समन्यायिक, गुणस्तरी शिक्षा ओ सक्कु वयस्कालाई जीवनपर्यत्व शिक्षाके अवसर उपलब्ध करैना कहल बा ।

यकर कार्यान्वयनके लाग आवधिक योजना ओ शिक्षा क्षेत्र विकास योजनामे बजेट तथा कार्यक्रम व्यवस्था गरिएको छ ।
ओस्टेक मानवअधिकार, बालअधिकार ओ मौलिक हकके रुपम शिक्षा, विद्यालय संचालनके लाग कानूनी व्यवस्था, अनिवार्य तथा निशुल्क शिक्षा सम्बन्धी ऐन २०७५ बारे जानकारी डेहल रहिट ।

योग्य नहुइनामे प्रचलित कानूनमे जौनफे बाट लिखल हुइलेसेफे सक्कु नागरिकसे आधारभूत शिक्षा अनिवार्य रूपमे प्राप्त कैना वातावरण सिर्जना कैना प्रयोजनके लाग सम्वत् २०८५ साल वैशाख १ गतेपाछे आधारभूत शिक्षा प्राप्त नैकरल व्यक्ति देहायके कौनो अवसर प्राप्त कैना योग्य नैमन्ना कहल बा ।

नेपाल सरकार, प्रदेश सरकार वा स्थानीय तहके कौनोफे सरकारी सेवामे वा नेपाल सरकार, प्रदेश सरकार वा स्थानीय तहो पूर्णः वा. आशिक स्वामित्व, अनुदान वा नियन्त्रणमे रहल कौनो संस्थाके सेवामे प्रवेश कैना वा कौनोफे सरकारी, गैरसरकारी वा निजी क्षेत्रमे स्थापित कौनोफे संस्थामे कौनोफे पदमे निर्वाचित, नियुक्ति वा मनोनयन हुइना कौनो रोजगारी नैपना कहल बा ।
ओस्टेक करके कौनोफे कम्पनी, फर्म, सहकारी सस्था वा गैरसरकारी संस्थाके संस्थापन कैना वा ओसिन कम्पनी वा सस्थाके संस्थापक सेयरधनी, सञ्चालक चा सदस्य वा कौनो पदाधिकारी बने नैपैना कहल बा ।

सामाजिक विकास कार्यालय धनगढी कैलालीके प्रमुख सोती कहलै, ‘भौतिक पूर्वाधारके विकास एक दुई बर्ष ढिला करी मने उहीसे आघे शैक्षिक गुणस्तर ओ शिक्षामे विकास करी । प्रतिस्पर्धाके शिक्षामे एक दुसरके गोर टन्ना काम कैजाइठ । अब्बे सहकार्य समन्वयत्मक शिक्षाके आवश्यकता बा ।

कार्यक्रममे गाउँपालिका उपाध्यक्ष भगवतीकुमारी चौधरी, वडा अध्यक्षहुक्रे, कार्यपालिका सदस्य, शिक्षा समितिके सदस्य, विषयगत शाखाके प्रमुखहुक्रे, सामाजिक विकास कार्यालय धनगढी कैलालीके महिला विकास अधिकृत प्रतिभा श्रेष्ठलगायतके सहभागिता रहे । कार्यक्रमके संचालन कैलारी गाउँपालिकाके सामाजिक शाखा प्रमुख यगम कलेल करल रहिट ।