हमारे पालामे बडघर ऐन ल्यानबः नगर उपप्रमुख बम

पहुरा समाचारदाता
धनगढी, ३ असार । कैलाली जिल्लाके गौरीगंगा नगरपालिकाके नगर उपप्रमुख भोजबहादुर बम अपने पालामे बरघर÷भल्मन्सा ऐन ल्यन्ना प्रतिवद्धता जनैले बटै ।

गौरीगंगा नगरपालिकाके आर्थिक सहयोग तथा पहुरा मिडिया प्रालिके आयोजनामे अँटवारके रोज चौमालामे हुइल भल्मन्सा÷बरघर, धामी तथा धार्मिक गुरुवाहुकनके लाग एक दिने कानून सचेतना सम्बन्धी अभिमुखीकरण कार्यक्रममे सम्बोधन करटी उहाँ अपने पालामे भल्मन्सा÷बरघर ऐन ल्यन्ना प्रतिवद्धता जनाइल रहिट । उहाँ कहलै, ‘प्रदेश सरकारसे यी ऐन ल्यन्ना तयारीमे बा । प्रदेश सरकार ओ हमार ल्यानल ऐन बाँझी कलेसे हमार ल्यानल ऐन खारेज हुजाई । प्रदेश सरकारसे ल्यन्टीकी हम्रेफे ल्यानब । अपनेहुक्रे ढुक्क रही ऐन हमारे पालामे आई ।’

ऐन कानूनके बाट करेबेर बरघर÷ भल्मन्साहुकन अभिनफे मेलमिलापकर्ताके रुपमे स्वीकरल नैहो हो, मने हम्रे मेलमिलापकर्तामे भल्मन्साहुकनहे धरले बटी, नगर उपप्रमुख बम कहलै ।

अब्बे टमान ऐन कानून आसेकल बा, कानून मिचके बाट मिलैना, फैसला करे नैसेक्जाइठ । टबमारे ढेर बाट सिखेपर्ना बा । भल्मन्सा÷बरघर, धामी तथा धार्मिक गुरुवाहुकनके लाग एक दिने कानून सचेतना सम्बन्धी अभिमुखीकरण कार्यक्रम बहुट मजा हो यिहीसे ढेर कानूनी ज्ञान सिख्ना अवसर मिली । ओ गाउँघरमे विवाद मिलैना मजा हुइना उहाँ बटैलै । सक्कु जाने मिल्लेसे केल्ह समाज रुपान्तरण हुइनाफे उहाँ बटैलै ।

दिनेश दहितके अध्यक्षतामे हुइल कार्यक्रममे गौरीगंगा नगरपालिकाके सक्कु वडाके वडा अध्यक्ष, कार्यपालिका सदस्य, वडा सदस्य, गौरीगंगा नगरपालिका अन्र्तगत पर्ना गाउँक भल्मन्सा, धामी तथा धार्मिक गुरुवाहुकनके सहभागिता रहे । उदघाटन पाछे सहजकर्ता बल्लु चौधरी कानून सचेतना सम्बन्धी सहजीकरण करल रहिट ।