धनगढी उपमहानगरसे घरदैलोमे विशेषज्ञ सेवा

पहुरा समाचारदाता
धनगढी, ३ असार । धनगढी–३ के ७२ वर्षीया गौरा मल्लहे न्यून रक्तचापसे घरी घरी अस्पताल जाइ पर्ना बाध्यता रहे । अस्पताल जाइक लाग यातायातके साधन फेन सजिले पैना कर्रा रहे । बलजबरे अटो खोजके अस्पतालसम पुग्लेसे फेन उपचार बहुट खर्चिलो रहे ।

‘डाक्टर भेटक लाग फेन पैसा परे,’ उहाँ कहली, ‘औषधि ओ जाँच लगाके महिनामे २÷३ हजार रुपैयाँ खर्च लागे ।’ धनगढी–७ के ४६ वर्षीया कमली बिकहे तल्लो पेट दुःख्ना समस्यासे बारम्बार सटैटी रहठ् । उहाँ कबु सरकारी अस्पताल टे कबु निजी क्लिनिकमे जाके उपचार करैना करल रही ।

पहिले अस्पतालसम पुग्ना कर्रा ओ अस्पताल पुगलपाछे उपचार करैना बहुट महंगा रहे । ‘५÷६ हजार रुपैयाँ नैहोके अस्पताल जाइ नैसेक्ना अवस्था रहे,’ उहाँ कहली, ‘घरी घरी अटराके खर्च कैना कर्रा रहे ।’

धनगढी उपमहानगरपालिकासे ‘विशेषज्ञ वडा स्वास्थ्य क्लिनिक’ सञ्चालन करलपाछे बिक ओ मल्लके यी समस्या कुछ हदसम अन्त्य हुइल बा । उहाँहुक्रे अपने वडामे निःशुल्क रुपमे विशेषज्ञ डाक्टरके परामर्श, कुछ औषधि ओ जाँच सेवा पैले बटै । वडाके स्वास्थ्य केन्द्रमे वडा क्लिनिक आइल बेला स्वास्थ्य सेवा लेना करल मल्ल बटैली । ‘घर लग्गेहे बा, नेंग्के पुगजैठु,’ मल्ल कहली, ‘डाक्टर भेटक लाग फेन पैसा नैपरठ् । कुछ औषधि निःशुल्क डेठै । कुछ औषधि लिखके डेठै । पर्चामे लिखल औषधि छावाहे लानक कठु ।’ वडामे विशेषज्ञ क्लिनिक आइ लागलपाछे अस्पताल जाके जाँच कराइ पर्ना समस्या टरल बिक बटैली । उहाँ क्लिनिकमे ल्याब जाँच ओ कुछ औषधि निःशुल्क पैना हुइल ओरसे उपचारके लाग पहिले जस्टे ढेर खर्च करे पर्ना बाध्यता हटल बटैली ।

मल्ल ओ बिक जस्टे १९ हजार ११४ जाने ७० बरस टरेक ज्येष्ठ नागरिक विशेषज्ञ वडा क्लिनिकसे स्वास्थ्य सेवा लेहल बटै । धनगढी उपमहानगरपालिकाके विशेषज्ञ वडा क्लिनिकके इञ्चार्ज कृष्ण बोहरा सक्कु उमेर समूहके सेवाग्राहीहे विशेषज्ञ वडा क्लिनिकसे सेवा डेलेसे फेन ज्येष्ठ नागरिकहे विशेष ग्राह्यता डेके उपचार सेवा डेना करल बटैलै । ओहकान अनुसार वडा क्लिनिकसे १६ हजार २४४ जाने गर्भवती महिला सेवा लेले बटै । गर्भवती महिलामध्ये आठ हजार ६५७ जाने अल्ट्रासाउण्ड सेवा लेले बटै । उपमहानगरपालिकासे विशेषज्ञ वडा क्लिनिकके लाग छुट्टे गाडी व्यवस्था कैके गाडीमे प्रयोगशाला, अल्ट्रासाउण्ड, इसिजी लगायतके सामाग्री ढुवानी कैना व्यवस्था मिलैले बा । हरेक महिना विशेषज्ञ वडा क्लिनिकके क्यालेण्डर सार्वजनिक कैके प्रत्येक वडामे महिनाके एकचो सेवा डेना करल इञ्चार्ज बोहरा बटैलै ।

२०७९ के स्थानीय निर्वाचनमे विजयी हुइलपाछे नगरप्रमुख गोपाल हमाल विशेषज्ञ वडा क्लिनिक सञ्चालन कैना निर्णय करल रहिट । उहाँ उ निर्णय कार्यान्वयन कैटी २०७९ साउन १ गतेसे विशेषज्ञ वडा क्लिनिक सेवा सुरु करल रहिट । तत्कालीन मुख्यमन्त्री त्रिलोचन भट्ट उ क्लिनिक उद्घाटन करल रहिट कलेसे सुदूरपश्चिम प्रदेश सरकारके सामाजिक विकास मन्त्रालयसे अल्ट्रासाउण्ड मसिन सहयोग करल रहे । सामान्य उपचारके लाग घरके जिन्सी सामान बेचके ग्रामीण क्षेत्रके नगरवासी अस्पताल जाइ पर्ना बाध्यता हटैना सोचके साथ नगरप्रमुख हमालसे सुरु करल विशेषज्ञ वडा क्लिनिकसे विपन्न नगरवासीहे सहज हुइल बा । अपने घर लग्गे उपचार सेवा पाइबर खुसी लागल गौरा मल्ल बटैली ।

२०८१ चैत्र मसान्तसम कुल एक लाख २७ हजार ८८३ जाने विशेषज्ञ वडा क्लिनिकसे उपचार सेवा लेहल उपमहानगरपालिकाके स्वास्थ्य शाखा जनैले बावै । जनरल फिजिसियन डाक्टरसे ६५ हजार ५६१ जाने, स्त्रीरोग विशेषज्ञसे २४ हजार ६०९ जाने, आँखा उपचार सेवा ३४ हजार ६४३ जाने लेहल इञ्चार्ज बोहरा बटैलै । वडा क्लिनिकमे सेवा लेहुइया मध्ये २९ हजार ७५ जाने प्रशोगशाला ओ छ हजार ४१४ जाने इसिजी सेवा लेले बटै । सेवा लेहे आइल ११ हजार ३४३ जनहनहे रेफर कैके अस्पताल पठाइल उपमहानगरके स्वास्थ्य शाखा जनैले बावै ।

नियमित रुपमे विशेषज्ञ वडा क्लिनिक सञ्चालन हुइबर नियमित स्वास्थ्य जाँच करे पर्र्ना ज्येष्ठ नागरिक, गर्भवती तथा दीर्घ रोगीहे उपचारमे सहज हुइल इञ्चार्ज बोहरा बटैलै । उहाँ आर्थिक अभावके कारण स्वास्थ्य उपचार कैना असमर्थ नागरिक फेन घरदैलोमे निःशुल्क विशेषज्ञ उपचार पैटी रहल बटैलै । उपमहानगरपालिकासे विशेषज्ञ वडा क्लिनिक सञ्चालन कैना मासिक दुई
लाख रुपैयाँ विशेषज्ञ डाक्टरके सेवा शुल्कमे खर्च कैटी आइल बा । इञ्चार्ज बोहरा नेपाल सरकारसे निःशुल्क वितरण कैना कहिके टोकल औषधि नै विशेषज्ञ वडा क्लिनिकमे वितरण कैटी आइल ओरसे औषधि खर्च एकीन नैरहल बटैलै । उहाँ गेटा आँखा अस्पतालके सहकार्यमे वडा क्लिनिकमे आँखा जाँच सेवा समेत डेटी आइल बटैलै ।

वडा क्लिनिक सुरु करल बरस उपमहानगरपालिकासे हाडजोर्नी ओ दाँत रोग सम्बन्धी विशेषज्ञ सेवा समेत
डेहल रहे । मने, बजेटके अभावस उ सेवा डोसर बरससे वडा क्लिनिकमे समावेश नैरहल इञ्चार्ज बोहरा बटैलै । ओहकान अनुसार हाडजोर्नी सम्बन्धी सेवा १०९ ओ दाँत उपचार सेवा दुई हजार ९६१ जाने लेहल रहिट ।