धनगढीके सामुदायिक विद्यालयके शैक्षिक सुधारके लाग ६१ लाख ९५ हजार सहयोग प्राप्त
पहुरा समाचारदाता
धनगढी, ३ असार । धनगढी उपमहानगरपालिकासे सञ्चालन करल ग्रामीण क्षेत्रके सामुदायिक विद्यालयके शैक्षिक सुधारके लाग हालसम रू.६१ लख ९५ हजार ७५० सहयोग प्राप्त हुइल बा ।
ग्रामीण क्षेत्रके सामुदायिक विद्यालयके शैक्षिक सुधार कैना टमान वित्तीय सहयोगी संघ सस्था ओ व्यक्तिसे रू. ५९ लाख ४० हजार ७५० हुइल रहे । सोम्मारके रोज सिद्धार्थ बैंक लिमिटेडसे रू.२ लाख ५५ हजार सहयोग करल नगर प्रमुखके सचिवालय जनैले बा ।
सामुदायिक विद्यालयके शैक्षिक सुधारके लाग ग्रामीण क्षेत्रके विद्यालयके विद्यार्थीहुकनहे पोशाक सामग्री वितरणके लाग सिद्धार्थ बैंकसे सिद्धार्थ बैंकके सुदूरपश्चिम निर्देशक निराकार बहादुर सिंह ओ धनगढी क्याम्पस चोक शाखा कार्यालयके प्रमुख भुवन पन्तसे धनगढी उपमहानगरपालिकाके नगर प्रमुख गोपाल हमालहे उ सहयोग रकम हस्तान्तरण करल रहिट । उहे क्रममे धनगढी उपमहानगरपालिकाके ओरसे नगरप्रमुख हमाल सिद्धार्थ बैंक परिवारहे हार्दिक धन्यवाद व्यक्त करल रहिट ।
सहयोग प्राप्त रकमसे धनगढी उपमहानगरपालिका सामुदायिक विद्यालयके शैक्षिक सुधारके लाग ग्रामीण क्षेत्रके विद्यालयके विद्यार्थीहुकनहे पोशाक सामग्री वितरण करटी आइल बा ।
